ލަންޑަން (15 މެއި) - މެންޗެސްޓާ ސިޓީގެ ކެޕްޓަން އިލްކާއި ގުންޑޮގާން އެ ކްލަބުގައި މަޑުކުރުމަށް އުންމީދުކުރާ ކަމަށް ސިޓީގެ ކޯޗު ޕެޕް ގާޑިއޯލާ ބުނެފި އެވެ.

މި ސީޒަންގައި ތިން ތަށި ހޯދުމަށް ސިޓީން ކުރަމުންދާ މަސައްކަތުގައި އެ ޓީމުގެ އެންމެ މުހިންމު އެއް ކުޅުންތެރިއެއްގެ ގޮތުގައި ފާހަގަކުރެވިފައިވަނީ ގުންޑޮގާން، 32، އެވެ. އިނގިރޭސި ޕްރިމިއާ ލީގުގައި ރޭ އެވަޓަން އަތުން މޮޅުވެ، ސިޓީން ލީގު ޗެމްޕިއަންކަން ހޯދުމާ ގާތަށް ޖެހިލިއިރު، ގުންޑޮގާން ވަނީ އެ މެޗުގައި ދެ ލަނޑު ޖަހައިފަ އެވެ. ލީގު އެންމެ ފަހުން ކުޅުނު ދެ މެޗުގައި ގުންޑޮގާން ވަނީ ހަތަރު ލަނޑު ޖަހައިފަ އެވެ. ސިޓީން ފާއިތުވި އަހަރުތަކުގައި ލީގު ޗެމްޕިއަންކަން ހޯދިއިރު، ލީގުގެ ފަހު މެޗުތަކުގައި ތަފާތު ދައްކާ އެއް ކުޅުންތެރިއަކީ ކުރިން ބޮރޫޝިއާ ޑޯޓްމަންޑަށް ކުޅުނު ގުންޑޮގާން އެވެ.

ލީގުގެ ޗެމްޕިއަންކަން ކަށަވަރުކުރުމަށް ބާކީ އޮތް ތިން މެޗުން ސިޓީ މިހާރު ބޭނުންވަނީ އެންމެ މޮޅެކެވެ.

ސިޓީ އޮތީ އެފްއޭ ކަޕްގެ ފައިނަލުން ޖާގަ ހޯދައިފަ އެވެ. އަދި ޗެމްޕިއަންސް ލީގުގެ ސެމީ ފައިނަލްގެ ދެ ވަނަ ލެގުގައި ރެއާލް މެޑްރިޑާ ދެކޮޅަށް އަމިއްލަ ދަނޑުގައި ކުޅެންޖެހޭ މެޗު ކުރިއަށް އޮތްއިރު، ޗެމްޕިއަންސް ލީގު ކާމިޔާބުކުރުމުގެ އުންމީދު ވެސް އެ ޓީމުގެ އެބައޮތެވެ.

އެކަމަކު، އަންނަ މަހުގެ 10 ވަނަ ދުވަހު ކުޅޭ ޗެމްޕިއަންސް ލީގުގެ ފައިނަލުން ސިޓީ ޖާގަ ހޯދައިފިނަމަ، އެއީ ގުންޑޮގާން ސިޓީ އަށް ކުޅޭ ފަހު މެޗަށް ވެދާނެ އެވެ. އެއީ އެ ކްލަބާ އެކު އޭނާ ހަދާފައިވާ ކޮންޓުރެކްޓް މި ސީޒަންގެ ނިޔަލަށް ހަމަވާނެތީ އެވެ. ސިޓީގެ ކޮންޓުރެކްޓް ހަމަވުުމުން ގުންޑޮގާން ބާސެލޯނާ އަށް ބަދަލުވާނެ ކަމަށް ވަނީ އަޑު ފެތުރިފަ އެވެ.

ގާޑިއޯލާ ބުނީ އޭނާގެ އުންމީދަކީ ގުންޑޮގާން އެ ކްލަބުގައި މަޑުކުރުން ކަމަށެވެ. އަދި އޭނާ އެ ކްލަބުގައި ބެހެއްޓުމަށް، ސިޓީ އަށް ކުރެވެން އޮތް ހުރިހާ ކަމެއްކުރުމަށް އެ ކްލަބުގައި އެދިފައިވާނެ ކަމަށެވެ.

"ދެން މި ވަގުތު ނޭނގެ ވާނެގޮތެއް ބުނާކަށް. އެކަމަކު، އަހަރެންގެ އުންމީދަކީ ގުންޑޮގާން މަޑުކުރުން،" ގާޑިއޯލާ ބުންޏެވެ.

ގާޑިއޯލާ ބުނީ ގުންޑޮގާން އަކީ ސިޓީގައި ޓީމުގައި ވަރަށް މުހިންމު ކުޅުންތެރިއެއް ކަމަށެވެ. އަދި އޭނާ އަކީ ވަރަށް ރަނގަޅު "ލީޑަރެއް" ކަމަށެވެ.

"ގުންޑޮގާން އަކީ މާ ވާހަކަ ގިނަ ކުޅުންތެރިއެއް ނޫން. އެކަމަކު އޭނާ ވާހަކަދައްކާ ފަހަރަކު، ހުރިހާ ކުޅުންތެރިން ވެސް އޭނާ ދައްކާ ވާހަކަ އަޑުއަހާ," ގާޑިއޯލާ ބުންޏެވެ.

ބަޔާން މިއުނިކް ދޫކޮށް 2016 ވަނަ އަހަރު ގާޑިއޯލާ ސިޓީއާ ހަވާލުވުމަށް ފަހު އެ ޓީމަށް ފުރަތަމަ ސޮއިކުރުވި ކުޅުންތެރިއަކީ ގުންޑޮގާން އެވެ. މި ސީޒަނަށް ފަހު ހިލޭ ޓްރާންސްފާއެއްގައި ގުންޑޮގާންގެ ސޮއި ހޯދަން މަސައްކަތް ކުރާ އެއް ޓީމަކީ ސްޕެއިނުގެ ބާސެލޯނާ އެވެ. މީގެ އިތުރުން އިޓަލީގެ ޔުވެންޓަސް އާއި އިންޓަ މިލާނުން ވެސް ޖަރުމަނު ގައުމީ ޓީމަށް ކުޅޭ ގުންޑޮގާންގެ ސޮއި ހޯދަން މަސައްކަތް ކުރެ އެވެ.