ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) އިން މިހާރު ކުރިއަށްގެންދާ މޯލްޑިވްސް ބީޗްވޮލީބޯޅަ ޗެލެންޖުގެ ފައިނަލް މެޗުތަކުގައި ވާދަކުރާ ޕެއާތައް ފައިނަލްވެއްޖެ އެވެ.

ހުޅުމާލޭ ބީޗްވޮލީބޯޅަ ކޯޓުގައި މިރޭ ހަތަރު އިވެންޓެއްގެ ފައިނަލް ކުޅޭނެ އެވެ.

މިދިޔަ މަހުގެ 30 ވަނަ ދުވަހު، ހުޅުމާލޭ ޔޫތު ޕާކުގެ ބީޗްވޮލީބޯޅަ ކޯޓުގައި ފެށި މި މުބާރާތަކީ 2021 ވަނަ އަހަރުގެ ނޮވެމްބަރު މަހުގެ ފަހުން ކުޅޭ ގައުމީ ލެވެލްގެ ފުރަތަމަ ބީޗްވޮލީބޯޅަ މުބާރާތެވެ.

ފައިނަލް މެޗުތައް މިރޭ 21:30 ގައި ފަށާއިރު، ކުޅޭނެ ފުރަތަމަ ފައިނަލަކީ 4x4 އަންހެން ޑިވިޝަން ފައިނަލެވެ. ފައިނަލުގައި ވާދަކުރާނީ ފިއޮންތީ ސްޕޯޓްސް ކުލަބާއި ދިވެހި ވޮލީބޯޅަ ވެޓެރަންސް އެވެ. އެ ގޮތުން، 4x4ގެ ފިރިހެން ޑިވިޝަންގެ ފައިނަލުގައި ވާދަކުރަނީ އެމްވީވީގެ ޓީމާއި ލެޖެންޑްސް އެވެ.

މި މުބާރާތުގެ ރަސްމީ ދެ ޑިވިޝަންގެ ފައިނަލުތަކުގެ ތެރެއިން އެންމެ ފޯރިގަދަ ވާނެކަމަށް ބެލެވޭ 2x2ގެ އަންހެން ޑިވިޝަންގެ ފައިނަލުގައި އާމިނަތު އަރީޝާ އާއި އައިޝަތު މާޖިދާގެ ޕެއާ ނުކުންނާނީ ހާއްވާ ރާޝިދާ (ހައްވަ) އާއި ފާތިމަތު ޒީނިޔާ (ޒީ)ގެ ޕެއާ އާ ދެކޮޅަށެވެ.

ފިރިހެން ބައިގެ ފައިނަލުގައި އެންމެ ފަހުގެ ގައުމީ ޗެމްޕިއަނުން ކަމަށްވާ މުހައްމަދު އަލީ (ޑެންޒޯ) އާއި އަހުމަދު މުހައްމަދު (ކޯކޭ)ގެ ޕެއާ ނިކުންނާނީ އިސްމާއިލް ސާޖިދު (ކުޑަ ކާއްޓޭ) އާއި އާދަމް ނަސީމްގެ ޕެއާ އާ ދެކޮޅަށެވެ. އެޑަމް އާއި ކުޑަކާއްޓެގެ ޕެއާ އަކީ މި ވަގުތު ރާއްޖޭގައި އެއް ވަނަ އަށް ރޭންކް ކުރެވިފައިވާ ބީޗްވޮލީބޯޅަ ޕެއާ އެވެ.

މޯލްޑިވްސް ވޮލީބޯޅަ ޗެލެންޖަކީ މި އަހަރު ބީޗްވޮލީބޯޅަ އަށް ހާއްސަކޮށް ވީއޭއެމުން ކުރިއަށްގެންދާ ބީޗް ޗެލެންޖާސް ސީރީސްގެ ފުރަތަމަ މުބާރާތެވެ. ދެވަނަ މުބާރާތް މި މަހުގެ ފަހުކޮޅު ބާއްވަން ނިންމާފައިވާއިރު، މިއަހަރުގެ ބީޗްވޮލީބޯޅަ ގައުމީ މުބާރާތް އޮންނާނީ އޮކްޓޯބަރު މަހުގެ ފަހުކޮޅުގަ އެވެ.

ބީޗް ޗެލެންޖާސް ސީރީސް އަށްފަހު ގައުމީ ބީޗްވޮލީބޯޅަ ޓީމްގެ ފަރިތަކުރުންތައް އަނެއްކާވެސް ފަށާނެ އެވެ. މިއަހަރު ބީޗްވޮލީބޯޅައިގައި ގައުމީ ބީޗް ޓީމަށް އޮތް އެންމެ މުހިންމު މުބާރާތަކީ އިންޑިއަން އޯޝަން އައިލެންޑް ގޭމްސް އެވެ.