ނީލަން ފިހާރަތައް ހިންގުމަށް މާލޭ އިންްޑަސްޓްްރިއަލް ޒޯނު ސަރަހައްދުން ބިމެއް ހޯދުމަށް އެދުމުން އެކަމަށް ޕްލޭނިން މިނިސްޓްރީން ހުއްދަ ދީފައި ނުވާ ކަމަށް މާލެ ސިޓީ ކައުންސިލުން ބުނެފި އެވެ.
މިދިޔަ މަހުގެ ނުވަ ވަަނަ ދުވަހު ނީލަން ފިހާރަތައް ހިންގަމުން ދިޔަ ބިމުގައި އަލިފާން ރޯވެ އެނދައިގެން ދިޔަ ހާދިސާއަށް ފަހު މާލެ ސިޓީ ކައުންސިލުން ނިންމީ އިތުރަށް އެ ބިމުގައި ނީލަން ފިހާރަތައް ހިންގުމުގެ ހުއްދަ ނުދިނުމަށެވެ.
އިއްޔެ ނީލަންފިހާރަ ހިންގި ވިޔަފާރިވެރިންނާ ބައްދަލުކޮށް ވާހަކަ ދައްކަވަމުން މާލެ ސިޓީގެ މޭޔަރު ޑރ. މުހައްމަދު މުއިއްޒު ވިދާޅުވީ، މާލޭ އިންޑަސްޓްރިއަލް ޒޯން ސަރަހައްދަކީ އެފަދަ މަސައްކަތްތަކަށް ހާއްސަ ސަރަހައްދެއް ކަމަށާއި، އެތަނުގައި ނީލަން ފިހާރަ ހިންގުމުގެ ހުއްްދައަށް އެދުމުން ޕްލޭނިން މިނިސްޓްރީން ވަނީ އެކަމަށް އިންކާރުކޮށްފައި ކަމަށެވެ.
"މިގޮތަށް ދެންނެވުމުން [އިންޑަސްޓްރިއަލް ޒޯނުން ބިމެއް ހަމަޖައްސައިދިނުމަށް އެދުުމުން] އެކަމަކީ ކައުންސިލުން ކުރަންޖެހޭ ކަމެއް ކަމަށް ޖަވާބުދެއްވާފައިވޭ, އެހެންނަމަވެސް އެކަން ނުކުރެވިދަނީ އިންޑަސްޓްރިއަލް ވިލެޖް ބަލަހައްޓަނީ ކައުންސިލުން ނޫން ކަމަށްވެފައި ޕްލޭނިން މިނިސްޓްރީގެ ފަރާތުން ކަމަށްވެފައި އެ މުވައްސަސާއިން އެކަމަށް ހުއްދަދީފައިނުވާތީ." ސިޓީ ކައުންސިލުން ބުނެފައި ވެއެވެ.
މުއިއްޒު ވިދާޅުވީ، ކައުންސިލް ހުވާކުރީއްސުރެ މިކަމަށް މަސައްކަތްކުރިކަމުގައިވިއަސް މިހާތަނަށް އަލިމަގެއް ފެނިފައިނުވާ ކަމަށާއި، އެހެން ނަމަވެސް ނީލަން މުދާ ވިއްކާ ފަރާތްތަކުގެ އަޑުއަހައި ހައްލެއް ގެނެސްދިނުމަށް މަސައްކަތް ކުރައްވާނެ ކަމަށެވެ.
ނީލަން ފިހާރަތަކުގެ ވިޔަފާރިކުރި ފަރާތްތަކުން ވަނީ އަލިފާނުގެ ހާދިސާއަށް ފަހު ނީލަން ފިހާރަތައް އެ ސަރަހައްދުގައި ހިންގުމުގެ ހުއްދަ ނުދޭން ނިންމުމާ ގުޅިގެން އެމީހުން ކުރި ވިޔަފާރި ހުއްޓިފައިވާތީ އެ ކަންބޮޑުވުންްތައް ސިޓީ ކައުންސިލަށް ހިއްސާކޮށްފަ އެވެ.
2021 ވަނަ އަހަރުގެ އޮގަސްޓު މަހުގެ ތެރޭގައި ބޭއްވި ކައުންސިލްގެ މި ދައުރުގެ 12 ވަނަ އާންމު ޖަލްސާގައި ނީލަން ފިހާރަތައް މާލޭ އިންޑަސްޓްރިއަލް ވިލެޖަށް ބަދަލުކުރުމަށް ނިންމާ އެކަން ސަރުކާރުގެ ރަސްމީ އިދާރާތަކަށް އެންގުމަށް ކައުންސިލަރުންގެ އިއްތިފާގުން ނިންމި އެވެ.
އަލިފާނުގެ ހާދިސާގައި ނީލަން ފިހާރަ ހިންގި ބިމުގައި ހުރި ހުރިހާ މުދަލެއް އަނދައިގެން ދިޔަ އެވެ. އަދި މާލެ ސިޓީ ކައުންސިލުގެ ބިދޭސީ މުވައްޒަފުން ދިރިއުޅެމުން ދިޔަ އެކޮމަޑޭޝަން ބްލޮކެއް ވެސް އަނދާ ހުލިވެގެން ދިޔަ އެވެ.
ނީލަން ފިހާރައަކީ އެތައް ޒަމާނެއް ވަންދެން އެކި ކަހަލަ މުދާ ވިއްކަމުން ދިޔަ ބިމެކެވެ. އެތަނުގައި ދަގަނޑު، ލަކުޑި، ބޭނުންކޮށްފައި ހުންނަ ފަރުނީޗަރު ފަދަ ސާމާނު ވިއްކި އެވެ.
