މިދިޔަ ސީޒަނުގައި ކްލަބް ވެލެންސިއާގެ ކެޕްޓަން، އަލީ ފާސިރު (ސެންޓޭ) ކުރިއަށް އޮތް ސީޒަނަށް ރާއްޖޭގެ ޗެމްޕިއަން، މާޒިޔާ ސްޕޯޓްސް އެންޑް ރެކްރިއޭޝަނަށް ސޮއިކޮށްފި އެވެ.

ސެންޓޭ އަކީ އާ ސީޒަނުގައި މާޒިޔާ އަށް ކުޅެން ނިންމައި، އެ ޓީމާ އެކު ކޮންޓްރެކްޓްގައި ސޮއިކުރި އަށް ވަަަަަނަ ކުޅުންތެރިޔާ އެވެ.

މާޒިޔާ އިން ވަނީ ކްލަބް އީގަލްސްގެ ހަސަން ރާއިފް އަހުމަދު (ހަންނަ) އާއި ހުސެއިން ސިފާއު ޔޫސުފް (ކުރޯ)، އަހުމަދު ނޫމާން (ހެލްމެޓް)، ސެންޓޭގެ އިތުރުން ކްލަބް ވެލެންސިއާގެ މުހައްމަދު ފައިސަލް އާއި މިސްރުގެ މިޑްފީލްޑަރު ހަލީލް ޖަމާލް، ކްލަބް ގްރީން ސްޓްރީޓްސްގެ ހަސަން ނަޒީމް ގާސިމް (ޗޯޓު) އަދި ނިއު ރޭޑިއަންޓަށް ކުޅުނު ފުލްބެކް، ޝަމްވީލް މުހައްމަދު (ބޮންޑާ)ގެ ސޮއި ހޯދައިފަ އެވެ.

މިއީ، ރާއްޖޭގެ އެންމެ މޮޅު ފުޓްބޯޅަ ކުޅުންތެރިޔާގެ މަގާމު ދެ ފަހަރެއްގެ މަތިން ހޯދި ސެންޓޭ، 34، މާޒިޔާ ޖޯޒީގައި ފެންނާނެ ފުރަތަމަ ފަހަރެވެ. މާޒިޔާ އަކީ ފުރަތަމަ ޑިވިޝަނުގައި ސެންޓޭ ކުޅޭނެ ހަތް ވަނަ ކްލަބް އެވެ.

ބ. އޭދަފުށްޓަށް އުފަން ސެންޓޭގެ ކުޅުން އެންމެ ބޮޑަށް ފާހަގަވާން ފެށީ ފުރަތަމަ ޑިވިޝަނުގައި އޯލްޔޫތުލިންކްއޭޖް (އޭވައިއެލް) ގައި ދެއްކި މޮޅު ކުޅުމުގެ ސަބަބުންނެވެ. ސެންޓޭ ވަނީ 2010 ވަނަ އަހަރު ކްލަބް ވެލެންސިއާގައި ހޭދަކުރުމަށް ފަހު ޖެހިގެން އައި އަހަރު ނިއު ރޭޑިއަންޓާ ގުޅިފަ އެވެ. އެކަމަކު، 2012 ވަނަ އަހަރުގެ ސީޒަނަށް ވިކްޓްރީ ސްޕޯޓްސް ކްލަބަށް ބަދަލުވެ، ސެންޓޭ އަށް ގައުމީ ޓީމުގައި ލިބުނު ސީރިއަސް އަނިޔާއަކާ ހެދި ގިނަ ދުވަހު ހުރީ ކުޅުމާ ދުރުގަ އެވެ.

ސެންޓޭ، މާޒިޔާ ޖޯޒީގައި ފޮޓޯ އަކަށް ހުއްޓިލައިގެން: މިއީ ސެންޓޭގެ ކެރިއަރުގައި ވެސް މާޒިޔާގެ ފެހި ޖޯޒީގައި ކުޅޭ ފުރަތަމަ ފަަަހަރު.

އަލުން ދެ ވަނަ ފަހަރަށް 2013 ވަނަ އަހަރު ނިއުއާ ގުޅި 2015 ވަނަ އަހަރުގެ ނިޔަލަށް އެ ޓީމަށް ކުޅެ އެ ހަތަރު އަހަރުތަކުގައި ސެންޓޭ ވަނީ ނިއުއާ އެކު ބޮޑެތި ކާމިޔާބީތަކެއް ހޯދައިފަ އެވެ. އެ ގޮތުން، ބަލްގޭރިއާގެ ކޯޗު، ވެލިޒާ ޕޮޕޯވްއާ އެކު 2013 ވަނަ އަހަރުގެ ސީޒަނުގައި ހުރިހާ މެޗަކުން މޮޅުވެ، ހުރިހާ ތަށްޓެއް ނެގިއިރު، ޓީމުގައި ސެންޓޭ އިސް ރޯލެއް ކުޅުނެވެ. ސެންޓޭ ވަނީ ނިއު އަށް 2015 ވަނަ އަހަރުގެ ސީޒަނުގެ ނިޔަލަށް ކުޅެފަ އެވެ.

ނިއު ދޫކޮށް 2016 ވަނަ އަހަރު ޓީސީ ސްޕޯޓްސް ކްލަބަށް ބަދަލުވެ، އެ ޓީމުގައި ތަފާތު ފޯމެއްގައި ކުޅެ، ރާއްޖޭގެ މޮޅު ކުޅުންތެރިޔާގެ މަގާމާއި ރަން ބޫޓު ހޯދި އެވެ. އަދި ޓީސީ ދޫކޮށް ކެރިއަރުގައި ތިން ވަނަ ފަހަރަށް ސެންޓޭ ވަނީ 2017 ވަނަ އަހަރު ނިއު އަށް ބަދަލުވެފަ އެވެ. އެ ޓީމުގައި ވެސް މޮޅަށް ކުޅެ، ރާއްޖޭގެ މޮޅު ކުުޅުންތެރިޔާގެ މަގާމު ހޯދި އެވެ. އޭގެ ފަހުން، 2018 ވަނަ އަހަރު ކްލަބް އީގަލްސް އަށް ކުޅުނު ސެންޓޭ މިދިޔަ ދެ ސީޒަން ހޭދަކުރީ ވެލެންސިއާގަ އެވެ.

ވެލެންސިއާ އިން މިދިޔަ އަހަރު ޖެނުއަރީ މަހު މާޒިޔާ ބަލިކޮށް ޕްރެޒިޑެންޓްސް ކަޕްގެ ޗެމްޕިއަންކަން ހޯދި މެޗުގައި ސެންޓޭގެ ކަކުލަށް ސީރިއަސް އަނިޔާއެއްވެ، އޭނާ ކުޅުމާ ދުރަށް ދާން ޖެހުނެވެ. އަލުން، އެނބުރި އައިސް މިދިޔަ ޖޫން މަހު އޭޝިއަން ކަޕް ކޮލިފައިންގައި ރާއްޖެ އާއި އުޒްބެކިސްތާން ކުޅުނު މެޗުގައި ސެންޓޭ ކަކުލަށް އަނެއްކާ އަނިޔާވި އެވެ.

ސެންޓޭ ވަނީ މިދިޔަ އަހަރުގެ އޮގަސްޓް މަހުގެ ތެރޭގައި ކަކުލުގެ އޮޕަރޭޝަނެއް ކޮށްފަ އެވެ. މިއީ ސެންޓޭ، ކެރިއަރުގައި ކަކުލުގެ އޮޕަރޭޝަނެއް ކުރި ދެ ވަނަ ފަހަރެވެ. މާޒިޔާއާ ގުޅުނުއިރު، ސެންޓޭ އަންނަނީ އަނިޔާއިން ރަނގަޅުވުމަށް ރިހެބިލިޓޭޝަންގެ ކަންކަން ކުރަމުންނެވެ.

މާޒިޔާ އިން ވަނީ އެ ޓީމުގެ ކޯޗަކަށް ޔޫރަޕާއި އޭޝިއާ ފުޓްބޯޅައިގެ ތަޖުރިބާކާރެއް ކަމަށްވާ، ކޯޗު އިވާން ކޮލޭވްއާ އެކު އެއްބަސްވުމުގައި ސޮއިކޮށްފަ އެވެ. މާޒިޔާ އިން ޕްރީ ސީޒަން ޕްރެކްޓިސް ފެށުމަށް ހަމަޖެހިފައިވަނީ މިއަދު އެވެ.