ލިޒްބަން (05 ފެބްރުއަރީ) - ރަޝިޔާއާ ދެކޮޅަށް ޔޫކްރޭނުން ކުރަމުންދާ ހަނގުރާމާގައި އެ ގައުމަށް އެހީވުމަށް ޕޯޗުގަލްއިން ލެޕާޑް ޓޭންކުތަކެއް ހަދިޔާކުރަން ނިންމާފައިވާ ކަމަށް ޕޯޗުގަލްގެ ބޮޑުވަޒީރު އެންޓޯނިއޯ ކޯސްޓާ އިއުލާންކުރައްވައިފި އެވެ.

ކޯސްޓާ އިއްޔެ މިކަން އިއުލާންކުރެއްވި ނަމަވެސް ހަދިޔާކުރަނީ ކިހާ އަދަދެއްގެ ޓޭންކެއް ކަމެއް ވިދާޅުވެފައެއް ނުވެ އެވެ. އަދި މިހާރު ބޭނުންނުކުރެވޭ ހާލަތުގައި ހުރި ޓޭންކުތަކެއް މަރާމާތުކުރުމަށް ބޭނުންވާ ބައެއް ތަކެތި ހޯދުމަށް ޖަރުމަނާ މަޝްވަރާ ކުރަމުންދާ ކަމަށްވެސް ކޯސްޓާ ވިދާޅުވި އެވެ.

"މިހާރު މަސައްކަތް ކުރަމުންދަނީ ބައެއް ޓޭންކުތައް ދޫކޮށްލެވޭތޯ، ޔޫކްރޭނަށް ދެވޭނެ ޓޭންކުގެ އަދަދަކީ ކޮބައިކަން އަދި ނޭނގޭ، ނަމަވެސް އެ އަދަދު ވަރަށް އަވަހަށް އިއުލާން ކުރާނަން," ކޯސްޓާ ވިދާޅުވި އެވެ.

މީގެއިތުރުން ކޯސްޓާގެ އޮފީހުން ވެސް ހަދިޔާކުރާ ޓޭންކުތަކާ ބެހޭ އިތުރު މައުލޫމާތެއް ދީފައެއް ނުވެ އެވެ.

ޕޯޗުގަލް އަސްކަރިއްޔާގެ ހެޑް، އެޑްމިރަލް އެންޓޯނިއޯ ސިލްވާ ރިބެއިރޯ މިދިޔަ މަހު ވިދާޅުވި ގޮތުގައި އެ ގައުމުގެ އަސްކަރިއްޔާގައި މިވަގުތު 37 ލެޕާޑް ޓޭންކު އެބައޮތް ކަމަށެވެ. ނަމަވެސް އެ ގައުމުގެ މީޑިއާތަކުން ރިޕޯޓުކުރާ ގޮތުގައި އޭގެ ތެރެއިން ގިނަ ޓޭންކަކީ މިވަތު އޮޕަރޭޓްކުރެވޭ ހާލަތުގައި ހުރި ޓޭންކުތަކެއް ނޫނެވެ.

ރިޕޯޓުތައް ބުނާގޮތުގައި ޕޯޗުގަލްއިން އުންމީދުކުރަނީ އަންނަ މާޗު މަހު ޔޫކްރޭނަށް ޓޭންކު ހަދިޔާ ކުރުމަށެވެ.