ހދ. ނޮޅިވަރަމުގައި އަނބިމީހާ މަރާލިކަމުގެ ތުހުމަތު ކުރެވޭ އަބޫބަކުރު ފައިސަލް އޭނާ ބަންދުކޮށްފައި ހުރި ކުޅުދުއްފުށީ ޕޮލިސް ސްޓޭޝަންގެ ޖަލު ގޮޅި ތެރޭގައި ދަންޖެހުނު މައްސަލައިގައި ފުލުހުންނަށް ފާޑުކިޔުން އަމާޒުވަމުން ދަނިކޮށް، ހޯމް މިނިސްޓަރު އިމްރާން އަބްދުﷲ އެ އިދާރާ ދިފާއު ކުރައްވައިފި އެވެ.

މި ނޫހަަށް އެނގިފައިވާ ގޮތުގައި މިދިޔަ އަންގާރަ ދުވަހުގެ ރޭ ފައިސަލް ދަންޖެހުނީ ނިދަން ބޭނުން ކުރާ ބާލީހުގެ އުރައެއް ޖަލުގެ ތޭރިގަނޑުގައި އައްސައިގެނެވެ.

ފައިސަލްގެ ރައްކާތެރިކަން ފުލުހުންނަށް ކަށަވަރުނުކޮށްދެވުނު މައްސަލައިގައި ފާޑުކިޔުން އަމާޒުވެފައި އޮއްވާ "އަދަދު" އާ ވާހަކަ ދައްކަވަމުން އިމްރާމް ވިދާޅުވީ ފުލުހުން ދިޔައީ ގަވާއިދުން ކޮންމެ 10 މިނެޓަކުން ފައިސަލް މޮނީޓާ ކުރަމުން ކަމަށެވެ.

"ދަންޖެހިފައި ހުއްޓައި ފެނިގެން ގޮސް އަވަހަށް ހޮސްޕިޓަލަށް ގެންދިޔައީ. އޭނާ މޮނިޓަ ކުރެވެމުން ދިޔައީމަ ފުރާނަ ސަލާމަތުން ހުއްޓައި ފަރުވާ ދޭން ގެންދެވުނީ،" މިނިސްޓަރު ވިދާޅުވި އެވެ.

އދ. ފެންފުއްޓަށް އުފަން ފައިސަލް، 32، ހައްޔަރު ކުރީ މިދިޔަ ހޮނިހިރު ދުވެހެވެ. އޭނާ ދަންޖެހުނީ އޭގެ ތިން ދުވަސް ފަހުންނެވެ. މިހާރު އޭނާއަށް ފަރުވާދެމުން ދަނީ އޭނާ ހައްޔަރުކުރި ރަށް ހދ. ކުޅުދުއްފުށީ ހޮސްޕިޓަލުގަ އެވެ. އޭނާގެ ހާލަތު ވަރަށް ދެރަ ކަމަށް ހޮސްޕިޓަލުން ބުނާއިރު ނޭވާ ލައްވަނީ މެޝިނެއްގެ އެހީގަ އެވެ.

އެ ހާދިސާ ހިނގުމާއެކު ހިއުމަން ރައިޓްސް ކޮމިޝަން، ނެޝަނަލް އިންޓަގްރިޓީ ކޮމިޝަން އަދި އިންސްޕެކްޓަ އޮފް ކަރެކްޝަނަލް ސާވީސް އަށް އަންގައިގެން މައްސަލަ ތަހުގީގު ކުރަން ފަށާފައިވާ ކަމަށާއި "އެއްވެސް މީހެއްގެ އިހުމާލެއް އޮތް ނަމަ ފިޔަވަޅު އަޅާނެ" ކަމަށް އިމްރާން ވިދާޅުވި އެވެ.

އިންސްޕެކްޓަ އޮފް ކަރެކްޝަނަލް ސާވިސްއަކީ ޖަލުތަކާއި ޕެރޯލްގެ ގާނޫނުގެ ދަށުން ހޯމް މިނިސްޓަރު އައްޔަނު ކުރާ މަގާމެކެވެ. މިހާރު އެ މަގާމުގައި ހުންނެވީ ނޫރާ މުހައްމަދެވެ. ހޯމް މިނިސްޓްރީން ބުނީ އެ މައްސަލަ ނޫރާ ބައްލަވަމުން ގެންދަވާ ކަމަށެވެ. އޭނާ ތައްޔާރުކުރާ ރިޕޯޓް ފޮނުވަން ޖެހޭނީ މިނިސްޓަރަށެވެ.

ކަސްޓޯޑިއަލްތަކާއި ޕޮލިސް ސްޓޭޝަންގެ ހާލަތު

ހިއުމަން ރައިޓްސް ރިޕޯޓުގައި ޕޮލިސް ސްޓޭޝަންތަކުގެ ހާލަތު ވަރަށް ތަފްސީލުކޮށް ބަޔާންކޮށްފައިވެ އެވެ. އެ ތަންތަނުގައި މީހުން ބަންދުކުރުމަށް ބޭނުންކުރާ ގިނަ ގޮޅިތަކަކީ ގުދުރަތީ އަލިކަމާއި، ފިނި ހޫނުމިން އަދި ވައި ދައުރުވާނެ ގޮތަށް ފަރުމާކޮށްފައިވާ ގޮޅިތަކެއް ނޫނެވެ. އަދި ރޭގަނޑުގެ ވަގުތުތަކުގައި ފޮތް ކިޔާލެވޭ މިންވަރަށް ގޮޅިތަކަށް އާޓިފިޝަލް އަލި ނުލިބޭތީ އެކަންކަން ރަނގަޅުކުރަން ވަނީ އަންގައިފަ އެވެ.

"ނަމަވެސް އެދެވޭވަރަކަށް އިސްލާހީ ފިޔަވަޅުއަޅާފައި ނުވާ ކަންތައްތައްކަން ފާހަގަކުރެވިފައިވޭ،" އެ ރިޕޯޓުގައި ބުނެފައިވެ އެވެ.

މީގެ އިތުރަށް މޮނިޓަ ކުރެވޭ ގޮތަށް ސީސީޓީވީ ހަރުކުރެވިފައި ނެތްކަމަށް ވެސް ރިޕޯޓުގައި ބަޔާންކޮށްފައިވެ އެވެ.

އިސްލާހީ ފިޔަވަޅު އަޅަންޖެހޭ އެހެން ކަންކަން ވެސް ހިއުމަން ރައިޓްސް ރިޕޯޓުގައި ފާހަގަ ކޮށްފައިވެ އެވެ.