މި ފަހަރުގެ ގައުމީ ބެޑްމިންޓަން މުބާރާތުގައި ރިވައިވަލް ސްޕޯޓްސް ކްލަބުން ކަނޑައެޅި ޓާގެޓްތަކާ އެއްވަރުގެ ކާމިޔާބީތަކެއް ހާސިލްވި ކަމަށް އެ ކްލަބުން ބުނެފި އެވެ.

ރާއްޖޭގެ އިތުރުން ބައިނަލްއަގުވާމީ މުބާރާތުގައި ވެސް ކުރިއެރުން ހޯދަމުން އަންނަ ރިވައިވަލް ސްޕޯޓްސް ކްލަބުން ވަނީ މީގެ ކުރިން ގައުމީ ބެޑްމިންޓަން މުބާރާތުގެ ޓީމު އިވެންޓްގެ ޗެމްޕިއަންކަން ހޯދައިފަ އެވެ. އަދި ބެޑްމިންޓަން އެސޯސިއޭޝަން އޮފް މޯލްޑިވްސް (ބީއޭއެމް) އިން މީގެ ދެ އަހަރު ކުރިން އަލަށް ފެށި މިކްސް ޗެމްޕިއަންޝިޕް ވެސް ރިވައިވަލް އިން މީގެ ކުރިން ވަނީ ކާމިޔާބުކޮށްފަ އެވެ.

މި ފަހަރުގެ ގައުމީ ބެޑްމިންޓަން މުބާރާތުގައި ޓީމް އިވެންޓް ބައެއް ނެތެވެ. ބެޑްމިންޓަން އެސޯސިއޭޝަނުން ގައުމީ މުބާރާތް މިކްސް އިވެންޓެއްގެ ގޮތުގައި ކުރިއަށްގެންދަން ނިންމައި، މުބާރާތުގެ ގަވާއިދު އެކުލަވާލި ގޮތުން މުބާރާތުގެ ޓީމު އިވެންޓް ބައިގައި ޓީމުތައް ބައިވެރިނުވާތީ، އެ އިވެންޓް ނުބާއްވަ އެވެ.

ފުރަތަމަ ޑިވިޝަނުގެ އޯޕަންސް އިވެންޓްތަކަށް ބަލާއިރު، ފިރިހެން ސިންގަލްސް ފައިނަލުގައި ރިވައިވަލްގެ ޒަޔާން ޒަކީ އަތުން މޮޅުވެ، ނިބާލް އަހުމަދު ވަނީ ރަން މެޑަލް ހޯދައިފަ އެވެ. އަންހެން ސިންގަލްސް ޗެމްޕިއަންކަން ފާތިމަތު ނަބާހާ ހޯދީ ފައިނަލުގައި އައިމިނަތު ނަބީހާ ބަލިކޮށްފަ އެވެ. ރިވައިވަލްގެ ޒަޔާން އާއި އަހުމަދު ތޯއިފް މުހައްމަދުގެ ޕެއާ އިން ވަނީ ފިރިހެން ޑަބަލްސް ޗެމްޕިއަންކަން ހޯދައިފަ އެވެ. އަންހެން ޑަބަލްސް ޗެމްޕިއަންކަން ހޯދީ ނަބީހާ އާއި ނަބާހާގެ ޕެއާ އެވެ. އަދި މިކްސް ޑަބަލްސް ޗެމްޕިއަންކަން ހޯދީ ޒަޔާން އާއި ނަބާހާގެ ޕެއާ އިންނެވެ.

ގައުމީ ބެޑްމިންޓަން މުބާރާތުގެ ފިރިހެން ޑަބަލްސް އިވެންޓުން މެޑަލް ހޯދި ޕެއާތައް.-- ފޮޓޯ: މުހައްމަދު ޝާބިން/ އަދަދު

ރިވައިވަލް އިން މި ފަހަރުގެ ގައުމީ މުބާރާތް ނިންމާލީ ދެ ރަން މެޑަލާއި އެއް ރިިހި މެޑަލްގެ އިތުރުން އެއް ލޯ މެޑަލާ އެކު އެވެ.

ރިވައިވަލްގެ ކޯޗު، ނަޝްފާން މުހައްމަދު، "އަދަދު" އަށް ބުނީ ގައުމީ މުބާރާތަށް ކަނޑައެޅި ޓާގެޓްތަކާ އެއްވަރުގެ ޕާފޯމަންސްތަކެއް ކުޅުންތެރިންގެ ފަރާތުން ފެނިގެންދިޔަ ކަމަށެެވެ.

"ޕާފޯމަންސް ހަމަ ވަރަށް ރަނގަޅު މުޅިއަކުން ގޯހެއް ނޫން. ޖުމްލަކޮށް ބަލާނަމަ ވަރަށް ރަނގަޅު، އަހަރެމެން ޓާގެޓް ކުރީ ކްލަބް ވައިސްކޮށް ހުރިހާ ކޮޅަކަށް ބަލާފައި ފަސް އިވެންޓަށް، ދެން ސިންގަލްސް އެކަނި ނުލިބުނީ ގޯލްޑް، އެހެން ނޫނީ މީނީ ކްލަބްގެ އިންވޯލްމަންޓާ އެކު ހުރިހާ ފުރަތަމަ ޑިިވިޝަނުގެ އިވެންޓްތަކެއް، ދެން ސިންގަލްސްގައި ވެސް ފައިނަލުގައި ކުޅެފައި ސިލްވާ މި ލިބުނީ، ސެމީގައި ވެސް އަަހަރެމެންގެ ޕެއާސް ކުޅުނު، އެހެންވީމަ ރަނގަޅޭ ބުނެވޭނީ،" ނަޝްފާން ބުންޏެވެ.

ރިވައިވަލް އިން ވަނީ މި އަހަރު، ބައިނަލްއަގުވާމީ ގިނަ މުބާރާތްތަކެއްގައި ވާދަކޮށްފަ އެވެ. ބައިނަލްއަގުވާމީ މުބާރާތްތަކުގައި ވާދަކުރަން ރަނގަޅު ލެވަލަކަށް ތަމްރީންތައް ހެދުމުގެ ގޮތުން ރިވައިވަލް އިން ވަނީ މިދިޔަ ޖޫން މަހު، މެލޭޝިއާގައި ޓުއާ އެއް ވެސް ކުރިއަށްގެންގޮސް، މުހިންމު ތަޖުރިބާތަކެއް ހޯދައިފަ އެވެ.

ރިވައިވަލްގެ ޕްރެކްޓިހެއްގެ ތެރެއިން އެ ޓީމުގެ ކޯޗު ނަޝްފާން ޓީމުގެ ކުޅުންތެރިންނަށް ބުނެދެނީ.--- ފޮޓޯ: އަބްދުﷲ އިޔާން/ އަދަދު

ރިވައިވަލް އިން މިހާރު ތައްޔާރުވަމުން އަންނަނީ ބަހްރޭނާއި ބަންގްލަދޭޝްގައި ކުރިއަށްދާ މުބާރާތްތަކަށެވެ.

ނަޝްފާން ބުނީ މި އަހަރު ހާސިލްކުރެވޭނެ ކަމަށް ބެލި، ގިނަ ކަންކަން ކާމިޔާބުކަމާ އެކު ކުރިއަށްދާ ކަމަށާއި އެންމެ ބޮޑު ހިތްހަމަޖެހުމަކީ މުބާރާތްތަކުގައި ކުޅުންތެރިންގެ ކުޅުމުން ފެންނަ "އިމްޕްރޫވްމަންޓް" ކަމަށެވެ.

"ފޯކާސްޓްކުރި ވަރު ހަމަ އެބަވޭ، ކުޅުމުން ވެސް ހަމަ ތަފާތު އެބަފެނޭ. ސްކިލް ވައިސްކޮށް މި ފެންނަ އިމްޕްރޫވްމަންޓް ވެސް ވަރަށް ރަނގަޅު، ރަނގަޅު މެޗުތަކެއް ކުޅޭވަރަކަށް އެ ފެންނަ ތަފާތު ވެސް ރަނގަޅުވަމުން މި އަންނަނީ. ފިޒިކަލީ ވެސް އިމްޕްރޫވް، މި ލިބުނު އެކްސްޕީރިއަންސްތަކުގެ އަލީގައި ދެން ކުރަން ހުރި މަސައްކަތްތަކަށް މި ފޯކަސް ކުރަނީ،" ނަޝްފާން ބުންޏެވެ.

ރިވައިވަލް އިން އިސްނަގައިގެން، މިދިޔަ އަހަރުގެ ގައުމީ ޗެމްޕިއަން، ތޯއިފް އަންނަނީ ރާއްޖޭން ބޭރުގައި ޓްރެއިނިން ސްކޮލަޝިޕެއް ފުރިހަމަކުރަމުންނެވެ. އަދި ރިވައިވަލްގެ ސްކޮލަޝިޕެއްގައި، އެ ކްލަބްގެ ހައި ޕާފޯމަންސް ޓީމާ އެކު ޓްރެއިނިން ކުރިއަށްގެންދަމުން އަންނަ ޒުވާން ކުޅުންތެރިޔާ، ހައިޝަމް އިބްރާހިމް އަލީ ވެސް އަންނަނީ ކޮންމެ މުބާރާތެއްގައި ކަހަލަ ގޮތަކަށް ކުރިއެރުން ހޯދަމުންނެވެ.

މީގެ އިތުރުން، ރިވައިވަލް ޓީމުގައި ހިމެނޭ ރިޝްވާން ޝިޔާމް، ވަނީ މި އަހަރުގެ ކޮމަންވެލްތު ގޭމްސްގައި ވާދަކުރި ގައުމީ ބެޑްމިންޓަން ޓީމުގައި ހިމެނި މުހިންމު ތަޖުރިބާތަކެއް ހޯދައިފަ އެވެ. ގައުމީ މުބާރާތުގެ ފިރިހެން ޑަބަލްސް ބައިން ލޯ މެޑަލް ހޯދީ ރިވައިވަލްގެ ރިޝްވާން އާއި އިބްރާހިމް ރާޝިހު އާދަމްގެ ޕެއާ އެވެ.