ސިފައިންގެ ކޯޕަރޭޓިވް, ސިފްކޯއިން ހުޅުމާލޭގައި އިމާރާތްކުރަމުންދާ ސިފްކޯހިޔާގެ ފްލެޓްގައި މިހާރު ތައްޔާރުކުރެވިފައިވާ "މޮކަޕް ރޫމް" ބަލާލުމަށް ބޭނުންވާ ފަރާތްތަކަށް ނަން ނޯޓް ކުރުމުގެ ފުރުސަތު ހުޅުވާލައިފި އެވެ.

ސިފްކޯއިން ބުނީ "ސިފްކޯހިޔާ" ލިބިފައިވާ މީހުންގެ ތެރެއިން، މޮކަޕް ރޫމް ބެލުމަށް ބޭނުންވާ މީހުން ސިފްކޯއިން ނެރެފައިވާ އިއުލާނުގައިވާ ކިއުއާރު ކޯޑް މެދުވެރިކޮށް މި މަހުގެ 20 ވަނަ ދުވަހުގެ ކުރިން ނަން ނޯޓް ކުރެއްވޭނެ ކަމަށެވެ.

އަދި, މޮކަޕް ރޫމް ބެލުމަށް އަންނަ އިރު އާއިލާގެ އެއް މެމްބަރަކު ގެންނެވޭނެ ކަމަށެވެ.

ސިފްކޯހިޔާގެ ފްލެޓްގައި މިހާރު ތައްޔާރުކުރެވިފައިވާ "މޮކަޕް ރޫމް" ބަލަން ނަން ނޯޓް ކުރުމުގެ ފުރުސަތު ހުޅުވާލިނަމަވެސް، "މޮކަޕް ރޫމް" ދައްކާލުމަށް ހަމަޖެހިފައިވާ ތާރީހު އަދި އިއުލާނެއް ނުކުރެ އެވެ.

ސިފްކޯއިން ބުނީ "މޮކަޕް ރޫމް" ދައްކާލުމަށް ހަމަޖެހިފައިވާ ތާރީހު ފަހުން އިއުލާނު ކުރާނެ ކަމަށެވެ.

ސިފައިންނާއި ސިފައިންގެ އާއިލާތަކަށް ބޯހިޔާވަހިކަން ފޯރުކޮށްދިނުމަށްޓަކައި ސިފްކޯހިޔާ ފްލެޓް ނަމުގައި ބިންގާ އެޅިގެންދިޔަ 330 ފުލެޓްގެ ޢަމަލީ މަސައްކަތް ފަށާފައިވަނީ 2013 ސެޕްޓެމްބަރު މަހުގެ 02 ވަނަ ދުވަހު އެވެ. އެއީ ރައީސް ވަހީދުގެ ވެރިކަމުގަ އެވެ.