ރާއްޖޭގައި ޓޫރިޒަމް ފެށިތާ 50 އަހަރު ފުރުމުގެ ރަންޔޫބީލް ފާހަގަކުރަމުންދާއިރު ގައުމުގެ "ރަން ބިސް އަޅާ ކުކުޅު" ގެ މަގާމަށް އެ ދާއިރާ އައިސްފައި ވަނީ ގިނަ އަދަދެއްގެ މީހުންގެ ބުރަ މަސައްކަތާއި އެތަކެއް ކުންފުނިތަކުގެ މިންނެތް މަސައްކަތުންނެވެ. ރޭވުންތެރިކަމާއެކު ލިބިފައިވާ ގުދުރަތީ ވަސީލަތްތައް އެންމެ ފުރިހަމައަށް ބޭނުންކޮށް މިއަދު ރާއްޖެއަކީ ޓޫރިޒަމުގައި "ބެންޗުމާކު" އެކެވެ.

ވަކިން ހާއްސަކޮށް ދުނިޔޭގެ އެއް ނަންބަރު މަންޒިލަށް އަންނަ ފަތުރުވެރިން އެމީހުންގެ އަމިއްލަ ގައުމާ ގުޅާލަދޭ މޯބައިލް އޮޕަރޭޓަރުންގެ ހިއްސާ ބޮޑެވެ. އޭގެ ތެރެއިން ވެސް އުރީދޫ މޯލްޑިވްސްއަކީ ޓޫރިޒަމު އިންޑަސްޓްރީ ކުރިއަރައި ގޮސް ދުނިޔޭގެ ފެންވަރުގެ ބްރޭންޑަކަށް ރާއްޖެ ވުމުގައި ހިއްސާ ބޮޑު ކުންފުންޏެކެވެ.

އެކަމުގެ އަގުވަޒަންކޮށް އެ ކުންފުންޏަށް ވަނީ ފަތުރުވެރިކަމުގެ ރަން ޔޫބީލް ގާލާ އިވްނިންގައި ހާއްސަ އެވޯޑެއް ވެސް ދީފަ އެވެ. މިފަހުގެ ތާރީހެއްގައި ރާއްޖޭގެ ޓޫރިޒަމަށް އެންމެ ފައިދާކުރަނިވި ހަރަކާތްތައް ހިންގާފައި ވަނީ އުރީދޫގެ ބައިވެރިވުމާ އެކު އެވެ. އަމިއްލަ އިސް ނެގުމަށް މިއަހަރު ވެސް އެ ކުންފުނިން އަންނަނީ ޓޫރިޒަމްގެ ރަންޔޫބީލާ ދިމާކޮށް ގިނަ ޕްރޮމޯޝަންތައް ހިންގަމުންނެވެ.

ކޮވިޑު ފެނުމާއި ގުޅިގެން ރާއްޖޭގެ ބޯޑަރު ބަންދުކޮށް ޓޫރިޒަމް ހުއްޓިފައި އޮތުމަށް ފަހު އަލުން ފަށައިގަތުމާ ދިމާކޮށް ކުރިއަށް ގެންދިޔަ "ވިޒިޓް މޯލްޑިވްސް ނައު" ގެ ޑެސްޓިނޭޝަން ޕާޓްނަރެއްގެ ގޮތުގައި ވެސް އެ ކުންފުނިން މަސައްކަތްކުރި އެވެ. އެއީ 10 ގައުމެއްގެ 117 މިލިއަނަށްވުރެ ގިނަ މީހުންނަށް އަމާޒުކޮށް ކުރިއަށްގެންދިޔަ ބޮޑު ކެމްޕޭނެކެވެ.

އެގޮތުން، އެެ ކުންފުނިން އަހަރު ފެށީ ރަންޔޫބީލް އަހަރަށް ހާއްސަ ސިމް ޕެކެއް ތައާރަފް ކުރަމުންނެވެ. ރާއްޖޭގައި ހޭދަކުރާ ޗުއްޓީގެ މަންޒަރުތައް ފަސޭހަކަމާ އެކު ސޯޝަލް މީޑިއާގައި ހިއްސާކުރުމުގެ އަމާޒުގައި ޓޫރިސްޓުންނަށް ހާއްސަކޮށް އުފެއްދި މި ސިމް ޕެކްގެ އިތުރުން ރާއްޖޭގެ ރީތި މަންޒަރުތައް އޮގުމެންޓެޑް ރިއަލިޓީ މެދުވެރިކޮށް ގެނެސްދިނުމަށް ހާއްސަ ކަލަންޑަރެއް ވެސް އެކުންފުނިން މިއަހަރު ތައާރަފްކުރި އެވެ.

ދިވެހިންގެ މެދުގައި މަގުބޫލު ސޯޝަލް މީޑިއާ ޕްލެޓްފޯމެއް ކަމުގައިވާ "ސްނެޕްޗެޓް" ބޭނުންކޮށްގެން ރާއްޖޭގެ ޓޫރިޒަމް ޕްރޮމޯޓްކުރަން އުރީދޫ މޯލްޑިވްސް އިން ހާއްސަ ފިލްޓާތަކާއެކު "ސްނެޕް، ސްނެޕް އެންޑް ސްޓްރީކް" ޕްރޮމޯޝަނެއް ވެސް ކުރިއަށްގެންދިޔަ އެވެ. މިވެސް ރަންޔޫބީލް ފާހަގަކުރަން ސްނެޕްޗެޓާ ގުޅިގެން އެ ކުންފުނިން ފެށި ޕްރޮމޯޝަނެކެވެ. ހަމައެހެންމެ، ޓޫރިޒަމް މިނިސްޓްރީން ބޭއްވި "ނަލަ ނަލަ ރާއްޖެ" ކެމްޕޭނުގެ ޕާޓްނަރެއްގެ ގޮތުން އުރީދޫ ހަރަކާތްތެރިވި އެވެ.

ޓޫރިޒަމް ކުރިއެރުވުމަށް ކުރިއަށްގެންދާ ހަރަކާތްތައް ކަމަށްވާ ޓްރެވަލް ޓްރޭޑު މޯލްޑިވްސް (ޓީޓީއެމް)، ސައުތު އޭޝިއަން ޓްރެވަލް އެވޯޑްސް (ސަޓާ) އަދި މޯލްޑިވްސް މެރިން އެކްސްޕޯ ހިމެނޭހެން ގިނަ އަދަދެއްގެ ފަރާތްތަކަށް އުރީދޫން އަންނަނީ އެހީތެރިކަން ފޯރުކޮށްދެމުންނެވެ.