އެފްއޭއެމް ސެންޓްރަލް ލީގުގެ ދެ ޑިވިޝަނުން މެޗެއް ނުކުޅެ، ބ. އޭދަފުށީގެ ކްލަބް، އޭދަފުށްޓާއި އއ. މާޅޮސް ފުރަތަމަ ޑިވިޝަނަށް ޕްރޮމޯޓްވެއްޖެ އެވެ.

މި ދެ ޓީމަށް ފުރަތަމަ ޑިވިޝަންގެ ޖާގަ ޔަގީންވީ އެ ޓީމުތައް ކުޅެން އޮތް ގްރޫޕްގައި ދެން އޮތް ރަށްތަކުން ބައިވެރިނުވާތީ އެވެ. އެ ގޮތުން، ގުރޫޕްއޭ ގެ އެއް ވަނަ ކްލަބް އޭދަފުށްޓަށް ލިބިފައިވަނީ ދެން އެ ގްރޫޕްގައި ހިމެނުނު، ޅ. ނައިފަރު އާއި ހިންނަވަރު ސްޕޯޓްސް ކްލަބް ވާދަނުކުރަން ނިންމުމުންނެވެ.

މަޝްހޫރު ކޯޗު މުހައްމަދު އާތިފްގެ އިރުޝާދުގެ ދަށުން ދިވެހި ޕްރިމިއާ ލީގަށް ދުރާލާ ތައްޔާރުވި ކްލަބް އޭދަފުށި ވަނީ މުބާރާތުގެ އޯޕަން ރައުންޑްގައި ވާދަކޮށްފަ އެވެ. އޯޕަން ރައުންޑަކީ އެއް ރަށަކުން އެއް ޓީމަށް ވުރެ އިތުރަށް ބައިވެެެރިވެއްޖެނަމަ އެ ރަށެއް ތަމްސީލްކުރާނެ ޓީމެއް ކަނޑައަޅަން ކުޅޭ ބުރެެކެވެ. އޭދަފުށި ފުޓްބޯލް ޓީމު އަތުން ދެ ލެގަށް ކުޅެގެން ކުރިހޯދައި، ކްލަބް އޭދަފުށި މި ވަނީ ސެންޓްރަލް ލީގުގެ ފުރަތަމަ ޑިވިޝަނަށް ދަތުރުކޮށްފަ އެވެ.

ކުރިން ދިވެހި ޕްރިމިއާ ލީގުގައި ވާދަކުރި އއ. މާޅޮހަށް ސެންޓްރަލް ލީގުގެ ފުރަތަމަ ޑިވިޝަނުގެ ފުރުސަތު ލިބުނީ އެ ޓީމު ވާދަކުރަން އޮތް ސެންޓްރަލް ލީގުގެ ދެ ވަނަ ޑިވިޝަނުގެ ގްރޫޕް ސީގައި ހިމެނުނު، އއ. އުކުޅަހާއި އދ. ފެންފުށީ ޓީމު މުބާރާތުން ވަކިވުމުންނެވެ.

އެފްއޭއެމުން ބުނީ ހިންނަވަރާއި ފެންފުށިން މުބާރާތުގައި ވާދަނުކުރަން ނިންމިކަން މުބާރާތުގެ ލިޔެކިޔުންތައް ހުށަހަޅަންޖެހޭ މުއްދަތުގެ ތެރޭގައި އަންގާފައިވާ ކަމަށެވެ. އެކަމަކު، ނައިފަރާއި އުކުޅަހުން މުބާރާތުގައި ބައިވެރިވާން އެންމެ ފުރަތަމަ ނިންމައި، ލިޔެކިޔުންތައް ހުށަހަޅަން ޖެހޭ މުއްދަތުގައި އެކަން ކޮށްފައިނުވާތީ، ގަވާއިދުގެ ދަށުން ޑިސިޕްލިނަރީ ކޮމިޓީ އަށް އެކަން ހުށަހަޅާނެ ކަމަށެވެ.

ދާދި ފަހުން ކުރިއަށްދިޔަ ސެންޓްރަލް ލީގުގެ ދެ ވަނަ ޑިވިޝަނުގެ ގްރޫޕް ބީގައި ކ. ހިންމަފުށިން ވެސް ވާދަނުކުރެ އެވެ. މާލޭގައި ކުރިއަށްދިޔަ އެ ގްރޫޕްގެ މެޗުތައް ނިމުނުއިރު، އެއް ވަނަ ހޯދީ ކ. ގުރައިދޫ އެވެ. އެ ޓީމަށް ވަނީ ފުރަތަމަ ޑިވިޝަނުގެ ޖާގަ ލިިބިފަ އެވެ.

ގުރައިދޫ އެއް ވަނަ ހޯދީ ހަތަރު މެޗުން 10 ޕޮއިންޓް ހޯދައިގެންނެވެ. ދެ ވަނަ އަށް ދިޔަ ކ. ގުޅި އަށް ވަނީ ހަތަރު މެޗުން ހަ ޕޮއިންޓް ލިބިފަ އެވެ. އަދި އެންމެ ފުލުގައި ނިންމާލި މާފުށްޓަށް ލިބުނީ އެންމެ ޕޮއިންޓެކެވެ.

ސެންޓްރަލް ލީގުގެ ދެ ވަނަ ޑިވިޝަން ފަސް ގްރޫޕަކަށް ބަހާފައިވާއިރު، ހުރިހާ ގްރޫޕެއްގެ ދެ ވަނަ ޓީމުތަކުގެ ތެރެއިން އެންމެ ރަނގަޅު ނަތީޖާ ނެރޭ ތިން ޓީމެއް ސެންޓްރަލް ލީގުގެ ފުރަތަމަ ޑިވިޝަނަށް ޕްރޮމޯޓްވާނެ އެވެ. އެ ގޮތުން ބަލާއިރު، ކ. ގުޅި އަށް ފުރަތަމަ ޑިވިޝަނުގެ ޖާގަ ލިބިފައިވަނީ، ގްރޫޕް އޭ އާއީ ސީގައި ދެ ވަނަ ޓީމެއް ނެތުމުންނެވެ.

ސެންޓްރަލް ލީގުގައި ބާކީ އޮތް ދެ ގްރޫޕުން ވެސް އެއް ވަނަ އަދި ދެ ވަނަ ޓީމު ފުރަތަމަ ޑިވިޝަނަށް ޕްރޮމޯޓްވާނެ އެވެ. ބާކީ އޮތް ދެ ގްރޫޕްގެ މެޗުތައް ކުޅޭނީ އަންނަ ނޮވެމްބަރު މަހު އެވެ.