ވިލާ ކޮލެޖާއި ޖެހިގެން އޮންނަ ހުސްބިމުގައި އަޅާ ދަރުމަވަންތަ ސްކޫލުގެ އާ އިމާރާތުގެ މަސައްކަތް ނިންމަން ދިން ތާރީހު ފަހަނައަޅާ ގޮސްފައި ވާއިރުވެސް ނިމިފައި ނުވަނީ ރާއްޖެއިން ބޭރުން ގެންނަން ޖެހޭ ބައެއް ތަކެތި ނުލިބިގެން ކަމަށް އެޑިއުކޭޝަން މިނިސްޓްރީން ބުނެފި އެވެ.

އެ ސްކޫލުގެ މަސައްކަތް އެންމެ ފުރަތަމަ ފަށާފައި ވަނީ ސެޕްޓެމްބަރު 2020, ގަ އެވެ. ނަމަވެސް, ކޮވިޑާ ހެދި އޭރު އެ އިމާރާތުގެ މަސައްކަތް ނިންމަން ދީފައި އޮތް އެއް އަހަރު ދުވަހުގެ މުއްދަތުގެ ތެރޭގައި ނިންމިފައެއް ނުވެ އެވެ.

އޭގެ ފަހުން މި އަހަރުގެ އޭޕްރީލް މަހު ކޮންޓްރެކްޓަރުންނާ ހަވާލާދީ މިނިސްޓްރީން ބުނެފައި ވަނީ އެ އިމާރާތުގެ ގިނަ މަސައްކަތްތަކެއް ކުރަން ޖެހޭ ނަމަވެސް ޖުލައި 15 ވަނަ ދުވަހަށް ނިމޭނެ ކަމަށެވެ.

އެ މުއްދަތު ފަހަނައަޅާ ގޮސްފައިވާއިރު ކޮންޓްރެކްޓަރުންނާ ހަވާލާދީ މިނިސްޓްރީން ބުނީ މި އަހަރު ނިމުމުގެ ކުރިން އެ ސްކޫލު މަސައްކަތް ނިންމާނެ ކަމަށެވެ. މަސައްކަތް ލަސްވަނީ އިމާރާތަށް ބޭނުންވާ ތަކެތި ލިބުން ލަސްވާތީ ކަމަށްވެސް މިނިސްޓްރީން ބުންޏެވެ.

"މި އަހަރު ނިންމުމަށް މަސައްކަތް މި ކުރަނީ. ހުޅުވުން ލަސްވަނީ މަސައްކަތަށް ކުރަން ބޭނުންވާ ބައެއް ތަކެތި ބޭރުން ގެންނަން ހުރި ދަތިތަކަކާހެދި މަސައްކަތް ލަސްވެގެން،" މިނިސްޓްރީން ބުންޏެވެ.

އެސްޖޭ ކޮންސްޓްރަކްޝަނާއި ހަވާލުކޮށްގެން 74.9 މިލިއަން ރުފިޔާއަށް އަޅާ އެ އާ އިމާރާތަކީ މުޅިން ތަފާތު އަދި އެންމެ ޒަމާނީ ފެންވަރުގެ ކޮންސެޕްޓަކަށް ތައްޔާރުކުރާ ސްކޫލެއް ކަމަށް އެޑިއުކޭޝަން މިނިސްޓްރީން ބުނެ އެވެ.

ދަރުމަވަންތައިގެ އާ އިމާރާތަކީ 1،000 ދަރިވަރުންގެ ޖާގައިގެ 41 ކުލާސްރޫމް ހިމެނޭހެން އިމާރާތްކުރާ ތަނެކެވެ. އެ އިމާރާތް ޑިޒައިންކުރީ ކޮންމެ ކުލާހެއްގައި ވެސް ގިނަވެގެން 25 ދަރިވަރުން ތިބޭ ގޮތަށެވެ.

އާ އިމާރާތުގައި ޕްރައިމަރީ އަދި ސެކަންޑްރީ ގްރޭޑްތަކަށް ދެ ފްލޯގެ ލައިބްރަރީއެއް ހާއްސަ ކުރާނެ އެވެ. އޭގެ އިތުރުން، އެ އިމާރާތުގައި މަސައްކަތު މީހުންނަށް ހާއްސަ ޖާގަތަކާއި އިތުރު ހަރަކާތްތައް ހިންގަން ގިނަ ޖާގަ ހުންނާނެ ކަމަށް ވެސް މިނިސްޓްރީން ބުނެ އެވެ.

ދަރުމަވަންތައިގެ އާ އިމާރާތެއް އަޅަން ސަރުކާރުން ނިންމީ، 2002 ވަނަ އަހަރު މަޖީދިއްޔާ ސްކޫލު އިމާރާތް ދެ ބައިކޮށް ދަރުމަވަންތަ ސްކޫލު ފެށިއިރު، ކިޔަވައިދެމުންދިޔަ އިމާރާތް ބާވެ ވީރާނާވާން ފެށުމުންނެވެ. އޭގެ ފަހުން ދަރުމަވަންތައިގެ ދަރިވަރުން ކިޔަވަމުންދިޔައީ އެމްއައިބީ ކުރިމައްޗަށްވާ ގޮތަށް ތައްޔާރުކުރި ވަގުތީ އިމާރާތެއްގަ އެވެ.