މީގެ ދެ އަހަރު ކުރިން، ރާއްޖޭގެ ބެޑްމިންޓަންގެ ޗެމްޕިއަންކަން ގިނަ ފަހަރުތަކެއް މަތިން ހޯދާފައިވާ، މުހައްމަދު އަޖުފާން ރަޝީދު ބެޑްމިންޓަން އެކެޑަމީއެއް ފެށިއިރު ވެސް ހާއްސަަ އަމާޒަކަށްވެފައި އޮތީ ޒުވާން ކުޅުންތެރިންނަށް ބެޑްމިންޓަނުގެ ތެރެއިން ކުރިއަށްދެވޭނެ ޕްލެޓްފޯމެއް ގާއިމްކުރުމެވެ. އެ ގޮތުން 2020، ނޮވެމްބަރުގައި އަޖުފާން އިންޓަނޭޝަނަލް ބެޑްމިންޓަން އެކަޑަމީ (އައިބާ) ވުޖޫދަށް ގެނެސް، ޓާގެޓް ކުރި ޖޫނިއާ މުބާރާތް މި ވަނީ މި މަހު 23-25 އަށް ކުރިއަށް ގެންގޮސްފަ އެވެ.

ފޯރީގައި ގިނަ ބައެއްގެ ތަރުހީބު ލިބިގެންދިޔަ މި މުބާރާތުގައި 167 ކުދިން ބައިވެރިވި އެވެ. އޭގެ ތެރޭގައި އައިބާ، އަފްނާން ރަޝީދު ބެޑްމިންޓަން އެކަޑެމީ (އަރްބާ)، ބެޑްމިންޓަން އެސޯސިއޭޝަންގެ ވައިޑީޕީގެ އިތުރުން ރިވައިވަލް ސްޕޯޓްސް ކްލަބް، އައްޑޫ ސިޓީގެ އެމް ސްޕޯޓްސް ކްލަބް އަދި ވ. ކެޔޮދޫ ޓީމެއް ހިމެނެ އެވެ.

އަޖުފާން އެކެޑަމީން މުބާރާތް ބޭއްވީ، 8، 12، 14، 16 ދެން 18 އަހަރުން ދަށަށެވެ. މުބާރާތުގެ ވަނަތަކަށް ބަލާއިރު، އަށް އަހަރުން ދަށުގެ އަންހެން ސިންގަލްސް ޗެމްޕިއަނަކީ، އަރްބާގެ އައިޝަތު ސަނާޔާ ބިންތި އަފްރާހު އެވެ. ބާރަ އަހަރުން ދަށުގެ އަންހެން ޗެމްޕިއަަންކަން، އައިބާގެ އައިޝަތު ޔޫހާ އަހުމަދު، ހޯދިއިރު، 16 އަހަރުން ދަށުގެ އަންހެން ޗެމްޕިއަނަކީ ބީއޭއެމް ވައިޑީޕީގެ ޝުބާ މުހައްމަދު ޝަރީފް އެވެ. އަދި 18 އަހަރުން ދަށުގެ އަންހެން ޗެމްޕިއަންކަން އައްޑޫގެ މަރިޔަމް އުޒްކާ ހަަސަން ހޯދިއިރު، 14 އަހަރުގެ އަންހެން ޗެމްޕިއަނަކީ ބީއޭއެމް ވައިޑީޕީގެ އައިޝަތު ޒޯޔާ ހުސެއިން އެވެ.

ފިރިހެން ބައިގެ ސިންގަލްސް އަށް ބަލާއިރު، ހަ އަހަރުން ދަށުގެ ޗެމްޕިއަންކަން އައިބާގެ ޒުލްކިފްލި ހުސެއިން ހޯދިއިރު، އަށް އަހަރުން ދަށުގެ ސިންގަލްސް ޗެމްޕިއަނަކީ ބީއޭއެމް ވައިޑީޕީގެ އާލް އިބްރާހިމް ޝަރީފް އެވެ. ދިހަ އަހަރުން ދަށުގެ ފިރިހެން ސިންގަލްސް ޗެމްޕިއަންކަން ބީއޭއެމް ވައިޑީޕީގެ މަނޫފް ބިން ހަސަން ރަޝީދު ހޯދިއިރު، 12 އަހަރުން ދަށުގެ ޗެމްޕިއަނަކީ އައިބާގެ އަލީ އިޒްއާން މުހައްމަދު އެވެ. ސާދަ އަހަރުން ދަށުގެ ޗެމްޕިއަންކަން، އަރްބާގެ ސުނައިހު ނާސިހު މުހައްމަދު ހޯދިއިރު، 16 އަހަރުން ދަށުގެ ޗެމްޕިއަނަކީ ބީއޭއެމް ވައިޑީޕީގެ މުހައްމަދު ސާލިމް އަބްދުއްސަމަދު އެވެ. އަދި 18 އަހަރުން ދަށުގެ ފިރިހެން ޗެމްޕިއަނަކީ ރިވައިވަލް ސްޕޯޓްސް ކްލަބްގެ ހައިޝަމް އިބްރާހިމް އެވެ.

އައިބާގެ ފައުންޑާ އަޖުފާން، ޖޫނިއާ މުބާރާތް ފެށުމުގެ ގޮތުން ބޭއްވި ރަސްމިއްޔާތުގައި ވާހަކަ ދައްކަނީ.

އަޖުފާން، "އަދަދު" އަށް ބުނީ އުންމިދުކުރި ވަރަށް ވުރެ ރަނގަޅަށް މުބާރާތް ދިޔަ ކަމަށެވެ. އަދި މުބާރާތުގައި ބައިވެރިވާން ދިން މުއްދަތު ދިގުކޮށްލިނަމަ ގިނަ ރަށްރަށާއި ކްލަބްތަކުން ބައިވެރިވުމުގެ ފުރުސަތު ބޮޑުވާނެ ކަމަށެވެ.

"ވަރަށް ކޮމްޕެޓިޓިވް، އެންމެ އުފާވީ އަހަރެމެންގެ ޕްލޭޔަރުން އެންމެ ޔަންގް ކެޓަގަރީތަކުން ފެށިގެން ހުރިހާ އެއްޗެއްގެ ކަހަލަ ގޮތަކަށް ފައިނަލްގައި އުޅުނީމަ، އެހެންވެ، އަހަރެމެންނަށް އެނގިއްޖެ ޔޫތު ޑިވެލޮޕްމަންޓަށް މި ކުރާ މަސައްކަތް އެބަ ކުރިއަށްދާތަން، ޕްރޮގްރެސްވާކަން، ރިޒަލްޓް އެބަ ފެންނަކަން. މީގެ މާނަ އަކީ ޒުވާން އުމުރުގައި ކުދިންތަކެއް އެބަ އުފެދެއޭ،" މުބާރާތުން ފެނުނު މަންޒަރުތައް ކިޔައިދެމުން އަޖުފާން ބުންޏެވެ.

މި ފަހަރުގެ މުބާރާތުން ފެނުނު މަންޒަރުތަކަށް ބަލައި، އަޖުފާން ނިންމައިގެން ހުރީ ޖޫނިއާ މުބާރާތް އަަހަރަކު އެއް ފަހަރު ބޭއްވުމަށެވެ.

"އިރާދަކުރެއްވިއްޔާ ކޮންމެ އަހަރަކު ޖޫނިއާ ކުދިންނަށް މި މުބާރާތް ބާއްވާނަން، ޖޫނިއާ ކުުޅުންތެރިންނަށް މި ވާދަކުރަން ފުރުސަތު ހޯދައިދޭން ދެން ކުދިން ވަރަށް އެންޖޯއި ކުރި، ކޮމްޕެޓިޓިވްކޮށް އެންޖޯއީ ކޮށްފައި، މުބާރާތް ކާމިޔާބުކޮށް ނިމުނީމަ އުފާވި،" އަޖުފާން ބުންޏެވެ.

"އެންމެ ބޮޑު ހިތްހަމަޖެހުމަކީ ޕޮޒިޓިވް ފީޑްބެކް ލިބުން ކުދިންގެ މައިންބަފައިންގެ ފަރާތުން. ދެން، އަހަރެމެންގެ ތެރޭގައި މި އުޅޭ ޕްލޭޔަރުންގެ ފަރާތުން ވެސް ވަރަށް ސަޕޯޓް ލިބުން، މި އަސްލު ވަރަށް މުހިންމު ކަމެއް އެންމެންގެ ބައިވެރިވުން،"

އަޖުފާން ބުނީ ކުޅިވަރެއް ކުރިއަރާނީ އެ ކުޅިވަރެއްގެ އާއިލާ ނޫނީ ކޮމިއުނިޓީ ގުޅިގެން އެއް މިސްރާބަކަށް މަސައްކަތް ކުރުމުން ކަމަށެވެ. އަދި އޭނާ ޖޫނިއާ މުބާރާތެއް ފަށައިގެން މި ކުރި ތަޖުރިބާގައި ގިނަ ކުޅުންތެރިންނާއި ކްލަބްތަކުގެ އެހީތެރިކަން ލިބުނު ކަމަށާއި ހާއްސަކޮށް ބެޑްމިންޓަނުގެ މީހުން މީގެ ބައިވެރިވުމަކީ ކުޅިވަރެއްގެ ގޮތުގައި ބެޑްމިންޓަން ރަނގަޅު ޓްރެކުގައި ކުރިއަށްގެންދަން ފަހިވި ފުރުސަތެއް ކަމަށެވެ.

"މީގެ އާހިރު ކަންނިމޭއިރު މުހިންމީ އިންޓަނޭޝަނަލީ ވާދަކުރެވޭނެ މޮޅެތި ކުޅުންތެރިން އުފެއްދުން، އެކަމު ޔަންގް އޭޖްގައި، 18 އަހަރަށް ދިއުމުގެ ކުރިން އެބަޖެހޭ ޔަންްގް އޭޖްގައި ބީޑަބްލިއުއެފް މުބާރާތަކަށް ދާން، އަހަރެމެންގެ އެންމެ ބޮޑު އަމާޒަކީ ރަނގަޅު ކެޓަގަރީ އަކުން ބީޑަބްލިއުއެފްގެ ޖޫނިއާ އިންޓަނޭޝަނަލް މުބާރާތެއްގައި ވާދަކުރެވޭ ވަރަށް ކުދިން ޓްރެއިނިން ކުރުވުން، އެ މަގްސަދު ހާސިލްވީމަ ފޭސް ވަން އެ ކޮމްޕްލީޓްވީ،" ދުުުރުރާސްތާ ޓާގެޓްތަކެއް ވެސް އޮތްކަން ހާމަކޮށްދިނުމުގެ ގޮތުން އަޖުފާން ބުންޏެވެ.

އަޖުފާން ބުނީ އޭނާގެ އެކެޑަމީން މުބާރާތް ބޭއްވި ކަމުގައި ވިޔަސް މިއީ ވަރަށް ބިނަ ބަޔެއްގެ ބަައިވެރިވުން އޮވެގެން ކުރި މަސައްކަތެއް ކަމަށެވެ. އެ ގޮތުން ޔޫތު މިނިސްޓްރީ އާއި ބެޑްމިންޓަން އެސޯސިއޭޝަންގެ އިތުރުން ސްޕޮންސަރުން ދިން އެހީ އަޖުފާން ވަރަށް ބޮޑަށް ފާހަގަކުރެ އެވެ. އަދި މުބާރާތް ހުޅުވުމުގެ ރަސްމިއްޔާތަށް ނައިބު ރައީސް ފައިސަލް ނަސީމް ވަޑައިގެންނެވިއިރު، އެ މުބާރާތުގެ މެޗުތައް ބަލަން ކުޅިވަރުގެ އެކިއެކި ނަން މަޝްހޫރު ފަރާތްތައް އައުން ވެގެންދިޔައީ، މި މުބާރާތް އޭގެ އަސްލު މާނައިގައި ކުރިއަށްގެންދަން ލިބުނު ފަސޭހައެއްގެ ގޮތުގައި އަޖުފާން ފާހަގަކުރެ އެވެ.