ތިރީސް އެއް ވަނަ ޓޭބަލް ޓެނިސް އެސޯސިއޭޝަން ޗެމްޕިއަންޝިޕްގެ ޗެމްޕިއަންކަން، މުހައްމަދު ޝައްފާން އިސްމާއީލް އާއި މަލާކް ބިންތި މުއިއްޒު ހޯދައިފި އެވެ.
މާލޭ ޓީޓީ ހޯލުގައި ކުޅުނު މި މުބާރާތުގެ ފިރިހެން އެއް ވަނަ ޑިވިޝަނުގެ ސިންގަލްސް ފައިނަލް މެޗުގައި ޝައްފާން ކުޅުނީ ރާއްޖޭގެ އެންމެ ކާމިޔާބު އެއް ޓީޓީ ކުޅުންތެރިޔާ، މޫސާ މުންސިފް އަހުމަދުއާ ދެކޮޅަށެވެ. މުންސިފްގެ މައްޗަށް ޝައްފާން ވަނީ ސީދާ ހަތަރު ސެޓުން ކާމިޔާބު ހޯދައިފަ އެވެ. ގައުމީ މުބާރާތުގެ އެންމެ ފަހުގެ ޗެމްޕިއަން، ޝައްފާން މި މެޗުގެ ސެޓުތައް ގެންދިޔައީ 11-02، 11-08، 11-07 އަދި 11-06 އިންނެވެ.
އެއް ވަނަ ޑިިވިޝަނުގެ އަންހެން ސިންގަލްސް ޗެމްޕިއަންކަން މަލާކް ހޯދީ ފައިނަލުގައި އައިޝަތު މަލާކް ތަހުސީން ބަލިކޮށްފަ އެވެ. މެޗު ކޮންޓްރޯލް ކޮށްގެން ރަނގަޅު ކުޅުމެއް ދެއްކި މަލާކް ސެޓުތައް 11-08، 11-08، 11-09 އަދި 11-08 އިންނެވެ.
ރާއްޖޭގައި މި ވަގުުތު ކުޅެމުން އަންނަ އެންމެ ކާމިޔާބު ދެ ޓީޓީ އަންހެން ކުޅުންތެރިން ކަމަށްވާ ފާތިމަތު ދީމާ އަލީ އާއި އައިޝަތު ރަފާ ނާޒިމް، މި ވަގުތު ރާއްޖޭގައި ނެތުމުން އެސޯސިއޭޝަން ކަޕްގައި ނުކުޅެ އެވެ.
އެއް ވަނަ ޑިވިޝަންގެ ފިރިހެން ސިންގަލްސް ދެ ވަނަ ރަނަރަޕަށް ހޮވުނީ، ފާޒް އިމްޔާޒް ލަތީފް އާއި މުހައްމަދު ހަލަފް ރާފިއު އެވެ. އަންހެން ސިންގަލްސްގެ ދެ ވަނަ ރަނަރަޕަށް ހޮވުނީ، ސާރާ މޫސާ ޖަމީލް އާއި މިޝްކާ މުހައްމަދު އިބްރާހިމް އެވެ.
އެއް ވަނަ ޑިވިޝަން ފިރިހެން ޑަބަލްސް ޗެމްޕިއަނަކީ، ޝައްފާން އާއި ހަލަފްގެ ޕެއާ އެވެ. އެއީ، ފައިނަލުގައި އަހްޔާލް އަލީ ނަޒީރު އާއި މަދޫރާ ޑެވިންޑާ ކަރުނަރަޖަގޭގެ ޕެއާ ބަލިކޮށްފަ އެވެ. އަންހެން ޑަބަލްސް ޗެމްޕިއަންކަން ހޯދީ މިޝްކާ އާއި މަލާކް ތާސީން އެވެ. އެއީ، ފައިނަލުގައި އައިޝަތު އެލީން އާއި ސާރާގެ ޕެއާ ބަލިކޮށްފަ އެވެ.
މިކްސް ޑަބަލްސް ޗެމްޕިއަންކަން ހޯދީ މުންސިފް އާއި މަލާކް ބިންތި މުއިއްޒުގެ ޕެއާ އިންނެވެ. އެއީ ފައިނަލުގައި ހަލަފް އާއި މިޝްކާގެ ޕެއާ ބަލިކޮށްފަ އެވެ.
ދެ ވަނަ ޑިވިޝަނުގެ ފިރިހެން ޗެމްޕިއަންކަން، އަލީ ނިޝާމް ހޯދީ ފައިނަލުގައި އިމްރާން އިބްރާހިމް ބަލިކޮށްފަ އެވެ. ނަވާރަ އަހަރުން ދަށުގެ ފިރިހެން ސިންގަލްސް ތަށި މުހައްމަަދު އާލް އިމްރާން ހޯދީ ފައިނަލުގައި އުމެއިރު މުހައްމަދު މުއިއްޒު ބަލިކޮށްފަ އެވެ. ސަތާރަ އަހަރުން ދަށުގެ މިކްސް ޑަބަލްސް ޗެމްޕިއަންކަން ހޯދީ ހަލަފް އާއި މަލާކް ތާސީން އެވެ. ސަތާރަ އަހަރުން ދަށުގެ ފިރިހެން ޑަބަލްސް ޗެމްޕިއަނުންނަކީ، ހަލަފް އާއި އުމެއިރު އެވެ.
ސަތާރަ އަހަރުން ދަށުގެ އަންހެން ސިންގަލްސް ޗެމްޕިއަންކަން އާމިނާ އާޔާތު އާދަމް ހޯދިއިރު، ފިރިހެން ސިންގަލްސް ތަށި އުފުލާލީ ހަލަފް އެވެ.
ފަނަރަ އަހަރުން ދަށުގެ އަންހެން ޑަބަލްސް ޗެމްޕިއަންކަން، މަލާކް ތާސީން އާއި ސާރާ ހޯދިއިރު، ފިރިހެން ޑަބަލްސް ޗެމްޕިއަންކަން ހޯދީ ހަލަފް އާއި އައްޔޫބް އިޒްކާން ސަލީމް އެވެ. ފަނަރަ އަހަރުން ދަށުގެ އަންހެން ސިންގަލްސް ޗެމްޕިއަންކަން ސާރާ ހޯދިއިރު، ފިރިހެން ސިންގަލްސް ޗެމްޕިއަނަކީ، އިބްރާހިމް އަޝްއަލް އާސިފް އެވެ. ތޭރަ އަހަރުން ދަށުގެ ފިރިހެން ސިންގަލްސް ޗެމްޕިއަނަކީ ވެސް އަޝްއަލް އެވެ. އެގާރަ އަހަރުން ދަށުގެ އަންހެން ސިންގަލްސް ޗެމްޕިއަންކަން ލަޔާނާ ޝާމިއު ހޯދިއިރު، ފިރިހެން ސިންގަލްސް ޗެމްޕިއަނަކީ، އަޔާލް އަހުމަދު ޝިމާލް އެވެ. ނުވަ އަހަރުން ދަށުގެ ފިިރިހެން ސިންގަލްސް ޗެމްޕިއަންކަން ދިލްފް އަމްޒަތު އަހުމަދު ހޯދިއިރު، އަންހެން ސިންގަލްސް ޗެމްޕިއަނަކީ، އާޔާ އިހްސާން ސޯދިގު އެވެ.
