ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލަން މިދިޔަ އަހަރު ބަޔަކު ދިން ބޮމުގެ ހަމަލާއާ ގުޅުވައި މަޖިލީހުގެ ހެންވޭރު ދެކުނު ދާއިރާގެ މެންބަރު ހުސައިން ޝަހީމް (އަނދުން ހުސައިން) އަށް ތުހުމަތުތަކެއް ކުރައްވައި ފޮނުއްވި މެސެޖްތައް ތަހުގީގަށް ދޭން މަޖިލީހުގެ އާންމު ކޮމިޓީން މިއަދު ފާސްކޮށްފި އެވެ.
މިދިޔަ އަހަރުގެ މެއި މަހުގެ ހަވަނަ ދުވަހު ދިން ހަމަލާއަށް އަހަރެއް ފުރި އެ ވާހަކަތައް އަލުން ގަދަވެފައިވަނިކޮށް، ރައްޔިތުންގެ މަޖިލީހުގެ ވަޓްސްއެޕް ގްރޫޕްއަށް ނަޝީދު ފޮނުއްވި މެސެޖެއްގައި ވަނީ ހަމަލާގެ ތަހުގީގަށް މެންބަރު ހުސައިން ޝަހީމް ހުރަސް އަޅަމުންދާ ކަމަށް ލިޔުއްވައިފަ އެވެ.
ވަޓްސް އެޕް ގްރޫޕަށް ނަޝީދު ފޮނުއްވި މެސެޖްތައް ހުސައިނަށް ދޭން އެދި ހުށަހެޅި މައްސަލާގައި އާންމު ކޮމިޓީގެ ލަފައަކަށް މަޖިލީހުގެ ރައީސްގެ ހައިސިއްޔަތުން ނަޝީދު ފޮނުވި މައްސަލަ މެންބަރު ހުސައިން ބޭނުންވާ ގޮތަށް ފާސްކުރަން ހުށަހެޅުއްވީ ފުނަދޫ ދާއިރާގެ މެންބަރު މުހައްމަދު ޝާހިދެވެ.
ޝާހިދު ވިދާޅުވީ މެންބަރު ހުސައިން ހުށަހެޅުއްވި މައްސަލައިގައި ވަނީ ތަހުގީގީ އިދާރާއަށް މައްސަލަ ހުށަހެޅުމަށް މެންބަރަށް ލިޔުންތައް ދިނުމަކީ ތަހުގީގީ އިދާރާއަށް އެ ލިޔުންތައް ދިނުން ކަމަށް ވިޔަސް އެ މެންބަރަކާ ގުޅޭ ގޮތުން ކުރާ ތުހުމަތުތައް ބަލަން އެދެވެން ވާނެ ކަމަށެވެ.
ޝާހިދުގެ ހުށަހެޅުއްވުމަށް ތާއީދު ކުރައްވަމުން ކޮމަންޑޫ ދާއިރާގެ މެންބަރު މުހައްމަދު ރާޝީދު (ރާޑޯ) ވިދާޅުވީ ނަޝީދު ފޮނުއްވި މެސެޖްތަކުގައި ލިޔުއްވާފައިވާ ކަންކަމުގެ ޒިންމާ ނަޝީދަށް ނެގެން ވާނެ ކަމަށް ގަބޫލު ކުރައްވާ ކަމަށެވެ. ނަޝީދު ނަން ވިދާޅުނުވެ ރާޝީދު މުހާތަބު ކުރެއްވީ "މެސެޖް ފޮނުއްވި ބޭފުޅާ" އެ ގޮތަށެވެ.
"އެ ބޭފުޅަކު ލިޔުއްވާ މެސެޖްތަކުގެ ޒިންމާ އެ މެސެޖެއް ލިޔުއްވާ ބޭފުޅަކަށް (ރައީސް ނަޝީދަށް) ނެގެން ވާނެ، މިހެން ހުންނަ މެސެޖްތައް [ތަހުގީގީ އިދާރާއަކަށް ވެސް] ދިނުމަކީ މާ ބޮޑު މައްސަލައެއް ކަމުގައި ނުދެކެން،" ރާޝިދު ވިދާޅުވި އެވެ.
ޝާހިދުގެ ހުށަހެޅުއްވުމަށް މެންބަރަކު ތާއީދު ކުރެއްވުމުން ކޮމިޓީގެ މުގައްރިރު އަދި ހެންވޭރު ހުޅަނގު ދާއިރާގެ މެންބަރު ހަސަން ލަތީފް ވޯޓަށް އެއްސެވި އެވެ. ކޮމިޓީގައި ބައިވެރިވެވަޑައިގެންނެވި މެންބަރުންގެ އަޣުލަބިއްޔަތުން އެ ގޮތަށް ފާސްވި އެވެ.
ނަޝީދަށް އެެޑްރެސް ކުރައްވައި ހުސައިން ފޮނުއްވި ސިޓީގައި ވަނީ އެމަނިކުފާނަށް ދިން ބޮމުގެ ހަމަލާގެ ފަހަތުގައި ހުސައިންގެ ބައިވެރިވުމެއް އޮތް ކަމަށް ދޭހަވާ ގޮތަށް މިދިޔަ އާދީއްތަ ދުވަހު އެމަނިކުފާނު ދެއްކެވި ވާހަކަފުޅުތަކަކީ އޭނާގެ ހައްގާއި އިމްތިޔާޒްތަކަށް އުނިކަން އަންނަ ގޮތަށް ދެއްކެވި ވާހަކަފުޅުތަކެއް ކަމަށެވެ.
ހުސައިން ފޮނުވި ސިޓީގެ މައްސަލަ ބަލަން ރައްޔިތުންގެ މަޖިލީހުގެ އިމްތިޔާޒުތަކާއި ސުލޫކު ކޮމިޓީން ވެސް ވަނީ ނިންމައިފަ އެވެ.
ހުސައިންގެ ސިޓީއާ ގުޅޭ މައްސަލައެއް އާންމު ކޮމިޓީއަށް ނަޝީދު ފޮނުވީ އެ ސިޓީގައި މައްސަލަ ކަމާ ބެހޭ އިދާރާތަކަށް ހުށަހެޅުމަށްޓަކައި މި މަހުގެ އަށްވަނަ ދުވަހުގެ ރޭ 7:01 އިން 8:26 އަށް މަޖިލީހުގެ ވަޓްސްއެޕް ގްރޫޕަށް ފޮނުވި މެސެޖްތަކުގެ ކޮޕީއެއް ދިނުމަށް އޭނާ އެދިވަޑައިގެންފައިވާތީ އެވެ.
