"އަހަރެމެންނަށް މީގެ ކުރިން ރަށްފުށުގެ ދިރިއުޅުން ތަޖުރިބާކޮށްލާނެ މާ ބޮޑު ފުރުސަތެއް ނުލިބޭ. ރާއްޖެއަށް އަހަރެމެން އަންނަނީ ހަމައެކަނި ގުދުރަތީ ރީތިކަން ދެކިލާކަށް ނޫން، ތިމީހުން (ދިވެހިން) ގެ ދިރިއުޅުން އެއަށްވުރެ މާ ހިތްގައިމު."

ބައިގަރުނުވީ ރާއްޖޭގެ ޓޫރިޒަމް ސިނާއަތުގެ ތެރެއިން ރަށްފުށު ދިރިއުޅުމާއި، ސަގާފަތާއި، އާސާރުތައް ބަލާލުމަށް ކެތްމަދުވެފައި ހުރި ދުނިޔޭގެ މަޝްހޫރު ސެލިބްރިޓީ ޔޮޓް، "ސެއިލިންގ ޒަޓާރާ" ގެ ޖެކް ވިޓެކަރ (18) ބުންޏެވެ.

ރިޔަލު ޔޮޓް ފަހަރުގައި ރާއްޖެ އަށް އަންނަ ޓޫރިސްޓުންނަށް ހާއްސަކޮށް އިންތިޒާމުކުރާ، ރާއްޖޭގެ އެންމެ ފުރަތަމަ ޔޮޓް ރެލީ، "ސަވާދީއްތަ ދަތުރު" ގައި ބައިވެރިވުމަށް އިއްޔެ ހއ. އުލިގަމުގައި ކުރިއަށް ދިޔަ ރަޖިސްޓްރޭޝަނަށް ފަހު އޭނާ ހުރީ އެ ދަތުރުގައި ރާއްޖޭގެ މީހުން ދިރިއުޅޭ 10 ރަށަށް ދެވޭތީ ނުހަނު އުފަލުންނެވެ.

ހއ. އިން ފެށިގެން ބ. އަތޮޅަށް، ފަޅުރަށްތަކާއި އެކު ޖުމްލަ 15 ރަށެއްގައި ބަނދަރުކުރާ މި ދަތުރުގައި ބައިވެރިވުމަށް ދުނިޔޭގެ އެކި ގައުމުތަކުން 11 ޔޮޓެއްގައި 31 މީހަކު އައެވެ. ޔޮޓުތައް ދުރުގައި އަޅާފައި ބޭއްވުމަށްފަހު، އުލިގަމުގެ ދޮންވެލި ތުޑިއަށް އިންޖީނުލީ ކުޑަ ޑިންގީއެއްގައި ބީއްސާލި ކޮންމެ ފަތުރުވެރިއަކަށް އެރަށުން ހޫނު މަރުހަބާއެއް ކިޔެވެ. އަދި ދިވެހި ރަހަތައް އެ ފަތުރުވެރިންނަށް ދައްކާލުމަށްޓަކައި ކުޑަ ސަޔެއް ބޭއްވި އެވެ.

"މީ ރާއްޖޭގެ ސަޅި ތަންކޮޅަކީ، އަދި ތަޖުރިބާކޮށްލަން ބޭނުންވާ ކަމަކީވެސް. ރިސޯޓްތަކަށް ހޮލިޑޭ ހަދަން ދިއުމަށް ވުރެ މާ ސަޅި ކޮންމެ ރަށެއްގެ ކަލްޗާ އެކްސްޕީރިއެސް ކުރުން ވެސް. އެ ހިތްހަމަޖެހުން މާބޮޑު." އެމެރިކާގައި ހުރި އަމިއްލަ ގޯތި ވިއްކާލުމަށްފަހު ހަތަރު ދަރިންނާއި އަނބިމީހާ ގޮވައިގެން ކަނޑުމައްޗަށް ނިކުމެ އުޅޭ ޒަޓާރާގެ ކައްޕި، ކެއިތު (50) ބުންޏެވެ. ފާއިތުވެ ދިޔަ ފަސް އަހަރު އެ އާއިލާއިން އަންނަނީ ކަނޑުމަތީ، ދުނިޔޭގެ އެކި ހިސާބުތަކަށް ދަތުރުކުރުމުގަ އެވެ.

އޭނާ އުންމީދު ކުރަނީ ސަވާދިއްތަ ދަތުރާއި އެކު ޔޮޓްތަކަށާއި، ކްރޫޒާތަކަށް ރާއްޖޭގެ ފަތުރުވެރިކަން ހުޅުވިގެން ދާނެ ކަމަށެވެ.

ސަވާދިއްތަ ދަތުރުގެ ރެޖިސްޓްރޭޝަން އިއްޔެ ކުރިޔަށްދަނީ -- ފޮޓޯ: އެމްއައިޓީޑީސީ

"ބޭނުންވަނީ ލަގްޒަރީ ހިދުމަތްތަކެއް ނޫން. ދިވެހިންގެ ސާދާ ދިރިއުޅުން ބަލާލަން ބޭނުމީ، ވާހަކަ ދައްކާ ހަދާލަން، ތާރީހީ ވާހަކަތައް އަޑުއަހާލަން، މުއްސަނދި ދިރިއުޅުން ދޫކޮށް އަހަރެމެން ކަނޑުމައްޗަށް އެރީ އެ މަގްސަދުގައި، ދިވެހިންނަކީ ތަފާތު ބައެކޭ ބުނާތީ އަޑުއަހަން، އުންމީދުކުރަނީ މިފަހަރު އެ ފެންނާނެ ކަމަށް" ކެލެފޯނިއާއިން ފުރައިގެން 2017 ވަނަ އަހަރުން ފެށިގެން ކަނޑުމަތީ އުޅޭ އެކުއޭރިއަސް ޔޮޓްގައި ދަތުރު ކުރާ ކެން އާއި އޭނާގެ އަންހެނުން ޒިވީލް ބުންޏެވެ.

މިއީ އެ ދެމަފިރިން ރާއްޖެ އައި ފުރަތަމަ ފަހަރު ކަމަށްވާއިރު، އެ ދެމީހުން އުންމީދު ކުރަނީ ހަނދާނުން ފިލައިގެން ނުދާނެ ވަރުގެ ތަފާތު ތަޖުރިބާއެއް ރާއްޖޭގައި ކުރުމަށެވެ.

އުލިގަމުގައި އިއްޔެ ކުރިޔަށްދިޔަ ރެލީގެ ރެޖިސްޓްރޭޝަންގެ ތެރެއިން -- ފޮޓޯ: އެމްއައިޓީޑީސީ

ސަވާދީއްތަ ދަތުރުގެ ވެބްސައިޓު ގައި ދަތުރު އިންތިޒާމު ކޮށްފައިވާ ގޮތާއި ދަތުރުގައި މަޑުކުރާނެ ތަންތަނާއި އޮންނާނެ ހަރަކާތްތައް ވަނީ ވަރަށް ތަފުސީލުކޮށް ހިމަނާފަ އެވެ. ދަތުރުގައި މަޑުކުރާ، މީހުން ދިރިއުޅޭ ރަށްރަށުގެ ކައުންސިލު ތަކުން އަންނަނީ ދަތުރުގެ ބައިވެރިންނަށް ތަފާތު ހަރަކާތްތައް އިންތިޒާމު ކުރަމުންނެވެ. ކޮންމެ ރަށެއްގައި ވެސް ކުޅެ އުޅޭ ސަގާފީ ކުޅިވަރުތައް ކުޅުމާއި ރަށްރަށުގައި ކުރާ މަސައްކަތައް ދައްކާލުމާއި ތާރީހީ ތަންތަނަށް ޒިޔާރަތް ކުރުން ފަދަ ކަންތައްތައް އޭގެ ތެރޭގައި ހިމެނެ އެވެ.

ރާއްޖޭގެ ޓޫރިޒަމަށް ބައި ގަރުނު ފުރުނު އިރު ނުލިބޭކަށް އެވޯޑެއް ނެތެވެ. އެންމެ ރީތި ހަނީމޫން ޑެސްޓިނޭޝަނުން ފެށިގެން އެންމެ ފެންވަރު ރަނގަޅު ފާހާނައިގެ އެވޯޑުގެ ޝަރަފުވެސް މި ޖަޒީރާ ކުޑަ ގައުމަށް ލިބެއްޖެ އެވެ. މެހްމާންދާރީ އަދާކުރުމުގެ ލާމަސީލު މިސާލަކަށް ދުނިޔެ ގަބޫލުކުރާ މި ފަސްގަނޑަށް ނުލިބެނީ ކޮމިޔުނިޓީ ފަތުރުވެރިކަމުގެ އެވޯޑް ކަމަށް އެމްއައިޓީޑީސީގެ މެނޭޖިން ޑިރެކްޓަރު މުހައްމަދު ރާއިދު ވިދާޅުވި އެވެ.

އެހެންވެ ފަތުރުވެރިންނާއި ދިވެހި މުޖްތަމައުއާ ދެމެދު އޮންނަ ގުޅުން އިތުރަށް ބަދަހިކޮށް، ރަށްވެހި ދިރިއުޅުމުގެ ތެރެއިން ކޮންމެ ރައްޔިތެއްގެ ޖީބަށްވެސް ތަނަވަސްކަން ގެނެސްދިނުމުގެ މަގުފަހިކޮށްދިނުމުގެ އަމާޒުގައި ފެށި ސަވާދީއްތަ ދަތުރުން ހޯމް ސްޓޭ ޓޫރިޒަމް ފުޅާ ދާއިރާއެއްގައި ފެށިގެން ދާނެ ކަމަށް އޭނާ ގަބޫލުކުރެ އެވެ.

"މީ ހޯމް ސްޓޭ ޓޫރިޒަމްގެ ފެށުން. ސަވާދީއްތަ ދަތުރުގައި އެމީހުން (ރެލީގެ ބައިވެރިން) ޒިޔާރާތް ކުރާ ކޮންމެ ރަށެއްގެ ރައްޔިތުންނަށް ފުރުސަތު އެބައޮތް އެ ރަށަކަށް ދެވަނަ ފަހަރަށް އެ ފަތުރުވެރިޔާ ގެނައުމަށް ހިތް ޖައްސަން،" ސަވާދިއްތަ ދަތުރާއި އެކު ރާއްޖޭގެ ޓޫރިޒަމަށް އިންގިލާބީ ބޮޑު ކުރިއެރުމެއް އަންނާނެކަން ފާހަގަކުރަމުން ރާއިދު ވިދާޅުވި އެވެ.

"މަޝްހޫރު އެތައް ހާސް ފޮލޯވަރުން ތިބި ސެލެބްރިޓީއިންވެސް އެބައުޅޭ، ހަމަ ގައިމުވެސް އެމީހުންނަށް ހަނދާނުން ފިލައިގެން ނުދާނެ ތަޖުރިބާއެއް ލިބެއްޖެ ނަމަ އެ ވާހަކަތައް އެމީހުންގެ ސޯޝަލް މީޑިޔާ ޕްލެޓްފޯމްތަކުގައި ހިއްސާކުރާނެ، އޭރުން އެރަށަކަށް އެތައް ބަޔަކު ޝައުގުވެރިވެ، ފަތުރުވެރިން އަންނަން ފަށާނެ،" ރާއިދު ވިދާޅުވި އެވެ.

އެމްއައިޓީޑީސީން ބުނި ގޮތުގައި މިފަހަރުގެ ދަތުރުގައި ބައިވެރިވީ ރާއްޖެއިން ބޭރުގެ ފަރާތްތައް އެކަންޏެވެ. އެއްހާސް ޑޮލަރުގެ ފީއެއް ދައްކައިގެން ރެލީގައި ބައިވެރިވެފައިވާ ބޭރުގެ ފަރާތްތަކުގެ ތެރޭގައި އިންޑިއާ އާއި ތައިލެންޑާއި މެލޭޝިޔާ ފަދަ ގައުމުތަކުން ދަތުރުކޮށްފައި އައި ޔޮޓްތައް ހިމެނެ އެވެ.

އެގޮތުން މާދަމާ ހެނދުނު ސަވާދިއްތަ ދަތުރު ފަށާނީ ހޯރަފުށީގެ ބަނދަރުން، އެކަމަށް ބާއްވާ ކުޑަ ރަސްމިއްޔާތަކަށް ފަހު އެވެ. އެ ރަސްމިއްޔާތު ޝަރަފްވެރި ކޮށްދެއްވާނީ ޓުއަރިޒަމް މިނިސްޓަރު ޑރ. އަބްދުﷲ މައުސޫމް އެވެ. އޭނާގެ އިތުރުން ހެރިޓޭޖް މިނިސްޓަރު، ޔުމްނާ މައުމޫންއާ، ހަޔާ އެޑިއުކޭޝަން މިނިސްޓަރު، އިބްރާހިމް ހަސަންވެސް އެ ރަސްމިއްޔާތަށް ވަޑައިގަންނަވާނެ އެވެ. ެ