ކަރަންޓީނާ ނުލާ ތައިލެންޑަށް ދަތުރުކުރެވޭ ގައުމުތަކުގެ ލިސްޓަށް ދިވެހިރާއްޖޭގެ ނަން އިތުރުކޮށްފި އެވެ.

މިހާރު ދުނިޔޭގެ ކޮވިޑުގެ ހާލަތަށް ބަލައި، ދަތުރުވެރިން ކަރަންޓީނުވާން ޖެހޭ ގައުމުތަކުގެ ލިސްޓަށް ގެނައި ބަދަލުތަކާ އެކު އެ ލިސްޓުގައި 63 ގައުމެއް ވަނީ ހިމަނައިފަ އެވެ.

ރާއްޖޭގެ އިތުރުން ދެން އެ ލިސްޓުގައި ހިމެނޭ މި ސަރަހައްދުގެ ގައުމުތަކުގެ ތެރޭގައި އިންޑިއާ، ނޭޕާލް، ސްރީ ލަންކާ، އަދި ބޫޓާން ހިމެނެ އެވެ.

ތައިލެންޑަކީ ވިޔަފާރި އާއި ސިއްހީ ކަންކަމަށް ދިވެހިން ވަރަށް ގިނައިން ދަތުރުކުރާ ގައުމެކެވެ.

ރާއްޖޭގެ ކޮވިޑުގެ ހާލަތު މިދިޔަ އޭޕްރިލް މަހާ ހިސާބުން އިންތިހާއަށް ގޯސްވުމާ ގުޅިގެން ބައެއް ގައުމުތަކުން ވަނީ ރާއްޖެއިން އެގައުމުތަކަށް ދަތުރުކުރާ ފަރާތްތައް ކަރަންޓީނު ވާން ޖެހޭނެ ގޮތަށް ފިޔަވަޅު އަޅައިފަ އެވެ. އޭގެ ފަހުން ރާއްޖޭގައި ކޮވިޑުގެ ހާލަތު ވަރަށް ބޮޑަށް ރަނގަޅުވެގެން ދިޔުމާއެކު ގިނަ ގައުމުތަކަކުން ވަނީ އެ ފިޔަވަޅުތައް އުވާލާފަ އެވެ.

މިދިޔަ ދެ ދުވަހު ރާއްޖޭގައި ދުވާލެއްގެ މައްޗަށް ކޮވިޑު ޖެހޭ މީހުން އަދަދުތައް ސަރުކާރުން ހާމަކޮށްފައި ނުވެ އެވެ. އެހެންނަމަވެސް ރާއްޖެއިން މިފަހުން ފެންނަ ކޭސްތަކުގެ އަދަދު ގިނަ ދުވަސްދުވަހު ހުންނަނީ 100-200 އާ ދެމެދުގަ އެވެ. ރާއްޖޭގައި ވެކްސިން ޖެހި މީހުންގެ އަދަދު ވެސް ވަނީ 355،250 އަށް މިހާރު އަރައިފަ އެވެ. މިއީ އާބާދީގެ ވަރަށް ބޮޑު އިންސައްތަ އެކެވެ.

ތައިލެންޑަށް ކަރަންޓީނާ ނުލާ ދަތުރުކުރެވޭ ގައުމުތަކުގެ ލިސްޓަށް ރާއްޖެ އިތުރުކުރި ނަމަވެސް، ކޮވިޑުގެ އަދަދުތައް ދިރާސާކުރާ ވޯލްޑޮމީޓާޒް ވެބްސައިޓުގައިވާ ގޮތުންނަމަ، ތައިލެންޑުގެ ކޮވިޑުގެ ހާލަތު ދަނީ ގޯސްވަމުންނެވެ.

އެގޮތުން އޭޕްރިލް މަހުން ފެށިގެން އެގައުމުގެ ކޭސްތައް އިތުރުވަމުންދާއިރު، އިއްޔެ އެކަނިވެސް އެގައުމުން 9،000 އަށްވުރެ ގިނަ ކޭސް ފެނުނުކަމަށް އެ ވެބްސައިޓުގައި ވެ އެވެ. ބަލީގައި ތައިލެންޑުން މަރުވާ މީހުންގެ އަދަދު ވެސް ވަނީ މިފަހުން އިތުރުވާން ފަށައިފަ އެވެ.