ސިވިލް ސާވެންޓުންގެ މުސާރަ ބޮޑުކުރުމަށް ގޮވާލައި ރާއްޖޭގެ އެކި ކަންކޮޅުތަކުގައި އިހުތިޖާޖު ކުރަމުންދާއިރު، އެ މައްސަލައަށް އަވަސް ހައްލެއް ގެނައުމަށް ގޮވާލައި، ރައްޔިތުންގެ މަޖިލީހަށް މިއަދު ކުއްލި މައްސަލައެއް ހުށަހަޅައިފި އެވެ.

ސިވިލް ސާވަންޓުންގެ އެސޯސިއޭޝަނުން އިސްވެ އިއްޔެއިން ފެށިގެން އިހުތިޖާޖެއް ފަށާފައިވާއިރު، ބިލެތްދޫ ދާއިރާގެ މެމްބަރު އަހުމަދު ހަލީމް މިއަދު ހުށަހެޅުއްވި ކުއްލި މައްސަލައިގައި ވަނީ ސިވިލް ސާވިސް މުވައްޒަފުންގެ މުސާރަ ބޮޑުކޮށް، އެއްހަމަ ކުރުމުގެ މަސައްކަތް އަވަސް ކުރުމަށް ސަރުކާރަށް ގޮވާލައިފަ އެވެ.

އެ މައްސަލަ 30 މެމްބަރުންގެ އިއްތިފާގުން ބަލައިގެންފައިވާއިރު، އެ މައްސަލައިގެ ބަހުސްގައި އަހުމަދު ހަލީމް ވިދާޅުވީ ސިވިލް ސާވަންޓުގެ މުސާރައިގެ މައްސަލަ ހައްލުކުރުމަކީ އެމްޑީޕީގެ ވައުދެއް ކަމަށެވެ.

އެހެންކަމުން، މުސާރަތައް މުރާޖައާކޮށް، އެއްހަމަ ކުރުމުގެ އިތުރުން މިނިމަމްވޭޖެއް ކަނޑައެޅުމުގެ މަސައްކަތް އަވަސް ކުރަންޖެހޭކަމަށް އޭނާ ވިދާޅުވި އެވެ.

ދިވެހި ސިވިލް ސާވެންޓު އެސޯސިއޭޝަނުން އިސްނަގައިގެން މުޅި ރާއްޖޭގައި ކުރިއަށްގެންދާ އިހުތިޖާޖަކީ މުވައްޒަފުންގެ މުސާރައިގެ މައްސަލަތައް ސަރުކާރުގެ ސަމާލުކަމަށް ގެނައުމަށް ފަށާފައިވާ ހިމޭން އިހުތިޖާޖެކެވެ. ކަޅުހެދުމުގައި އިއްޔެ އޮފީސްތަކަށް ނުކުތްއިރު މިއަދު މަސައްކަތް ނުކުރަން އެ މުވައްޒަފުން ވަނީ ނިންމައިފަ އެވެ.

އެއާއެކު ޕޭ ކޮމިޝަނުން މިއަދު ނެރުނު ބަޔާނެއްގައި ބުނެފައިވަނީ މުސާރައިގެ އާ އޮނިގަނޑާއެކު ސިވިލް ސާވިސް މުވައްޒަފުންގެ މުސާރައާމެދު ހުރި ގިނަ ކަންބޮޑުވުންތަކަކަށް ހައްލު ލިބިގެން ދާނެ ކަމަށެވެ.

އެގޮތުން ދައުލަތުގެ ހުރިހާ ފަންނުތަކެއް ހިމެނޭގޮތަށް ޕޭ ކޮމިޝަނުން އެކުލަވާލާ އެއްހަމަ ޕޭ ފްރޭމްވޯކްގެ މަސައްކަތް މިހާރު އޮތީ ފަހު މަރުހަލާގައި ކަމަށް އެ ކޮމިޝަނުން ބުންޏެވެ. އަދި އެ މަސައްކަތް މިއަހަރު ނިމޭނެ ކަމަށް ބުންޏެވެ.

"މި އާ ޕޭ ފްރޭމްވޯކްގެ ސަބަބުން ދައުލަތުގެ އިދާރާތަކުގެ މެދުގައި ހުރި މުސާރައިގެ ފަރަގުތައް ނައްތާލެވި، އެއްހަމަ މިންގަނޑަކުން މުސާރައާއި އިނާއަތްތައް ކަނޑައެޅިގެން ދާނެ. މި ޕޭ ފްރޭމްވޯކްގައި ދައުލަތުގެ އިދާރާތަކަށް ބޭނުންވާ ހުރިހާ ފަންނުތަކުގެ ގިންތިތަކާއި ފަންތިތައް ކަނޑައަޅައި، ކޮންމެ ފަންނަކަށް ވެސް އެކަށޭނަ މުސާރަ އާއި އިނާޔަތްތައް ކަނޑައެޅިގެން ދާނެ،" ބްރީފިންގައި ބުނެފައިވެ އެވެ.

އޭރަށް މުސާރަ ކަނޑައަޅާއިރު މަގާމުގެ މަސްއޫލިއްޔަތު އަދާ ކުރުމަށް އިލްމާއި ގާބިލްކަމާއި މަސައްކަތުގެ ބުރަކަމުގެ އިތުރުން މަސައްކަތު މާހައުލުގައި ކުރިމަތިލާން ޖެހޭނެ ބުރަތަކަށް ރިއާޔަތް ކުރާނެ ކަމަށް ވެސް ކޮމިޝަނުން ބުނެ އެވެ.

މިނިމަމް ވޭޖެއް ކަނޑައަޅައި މިއަހަރު އިއުލާން ކުރާނެ ކަމަށް ވެސް ބަޔާނުގައި ބުނެ އެވެ. އޭރަށް ސިވިލް ސާވިސްގައި ހިމެނޭ އެންމެ ދަށް ފަންތީގެ މުވައްޒަފުންނަށް ލިބޭ އިނާޔަތްތަކަށް ހެޔޮ ބަދަލެއް އަންނާނެ ކަމަށް ވެސް ކޮމިޝަނުން ބުނެ އެވެ.

އިހުތިޖާޖު ކުރަމުން އަންނަ ސިވިލް ސާވިސް މުވައްޒަފުން އަންނަނީ ގިނަ ކަންތައްތަކަކަށް ޑިމާންޑް ކުރަމުންނެވެ.

ސިވިލް ސާވިސް މުވައްޒަފުން އެދޭ ބައެއް ކަންކަމުގެ ތެރޭގައި:

• ސެޓެފިކެޓަށް ވަޒީފާގެ ކުރިއެރުން ދިނުން.
• ސިޔާސީ މަގާމުތަކުގައި ތިބޭ މީހުންނަށް ލިވިން އެލަވެންސް ދޭ ގޮތަށް ސިވިލް ސާވިސް މުވައްޒަފުންނަށްވެސް ލިވިން އެލަވެންސް ދިނުން.
• ދަށް ފަންތީގެ މުވައްޒަފުންގެ މުސާރަ ބޮޑުކުރުން.
• އެންމެ ކުޑަ އުޖޫރަ ކަނޑައެޅުން އަވަސްކުރުން.
• ސުކޫލުތަކުގެ އިދާރީ މުވައްޒަފުންނަށް އިތުރު އެލަވެންސް ދިނުން.