ޓިއުރިން (ޖުލައި 28) - ޔުވެންޓަސްގެ ތަރި ކްރިސްޓިއާނޯ ރޮނާލްޑޯ އަންނަ ސީޒަނުގައި ވެސް ފެންނާނީ އެ ޓީމުން ކަމަށް އެ ކްލަބްގެ ކޯޗު މެސިމޯ އަލެގްރީ ބުނެފި އެވެ.

އުމުރުން 36 އަހަރުގެ ރޮނާލްޑޯ މި ފަހަރުގެ ޓްރާންސްފާ މާކެޓްގައި އޭނާގެ ކުރީގެ ކްލަބް މެންޗެސްޓާ ޔުނައިޓެޑް ނޫނީ ފްރާންސްގެ ޕީއެސްޖީ އަށް ބަދަލުވާން އުޅޭ ކަމަށް މީޑިއާގައި އޮތީ އަޑުފެތުރިފަ އެވެ. އެ ވާހަކަތައް ކޮންމެ ވެސް ވަރަަކަށް މަޑުޖެހުނީ ޔުވެންޓަސްގެ ނައިބު ރައީސް ޕަވެލް ނެޑްވެޑް ދިން އިންޓަވިއުއެއްގައި ރޮނާލްޑޯ އެ ކްލަބްގައި މަޑުކުރާނެ ކަމަށް ވިދާޅުވުމުންނެވެ.

ޔުވެންޓަސް ޓީމަށް 2018 ވަނަ އަހަރު ރޮނާލްޑޯ ގެނައީ އަލެގްރީ ހުއްޓަ އެވެ. ޔުވެންޓަސްގެ ކޯޗުކަމާ އަލެގްރީ ދެ ވަނަ ފަހަރަށް ހަވާލުވެ، މަސައްކަތް ކުރަމުން އަންނައިރު، ދާދި ފަހުން ރޮނާލްޑޯ ވަނީ އެ ޓީމުގެ ޕްރީ ސީޒަން ޕްރެކްޓިހުގައި ބައިވެރިވާން ފަށައިފަ އެވެ.

"ރޮނާލްޑޯ އެނބުރި އައިސް އެ ހުރީ ވަރަށް ވަރުގަދަ ރޫހެއްގައި. ރޮނާލްޑޯ އަކީ ޗެމްޕިއަނެއް. އާދަޔާހިލާފު ހުނަރުވެރި ކުޅުންތެރިއެއް،" ޕްރީ ސީޒަނުގެ ތެރެއިން އަލެގްރީ ދިން އިންޓަވިއުއެއްގައި ބުންޏެވެ.

"އެހެން ކުޅުންތެރިންނެކޭ އެއްގޮތަށް އަހަރެން ވާނީ ރޮނާލްޑޯއާ ވެސް މަޝްވަރާތަކެއް ކޮށްފައި. އަންނަ ސީޒަނަކީ ވަރަށް މުހިއްމު އަހަރެއްކަން އަހަރެން ރޮނާލްޑޯ ގާތުގައި ބުނިން. އޭނަ ވެސް ހުރީ ޓީމަށް އެހީވާން ތައްޔާރަށް،"

އަލެގްރީ ބުނީ މީގެ ތިން އަހަރު ކުރިން އަހަރެން ހުރިއިރު ކުރި މަސައްކަތަށް ވުރެ ރަނގަޅު ކަންތައްތަކެއް މި ފަހަރު ހާސިލްކުރަން ބޭނުންވާ ކަމަށެވެ.

ޔުވެންޓަސްއާ އެކު ރޮނާލްޑޯ ހަދާފައިވާ އެއްބަސްވުން ހަމަވާނީ އަންނަ އަހަރު ޖޫން މަހު އެވެ.

ޔުވެންޓަސް އިން ރޮނާލްޑޯ ގެނައި އެންމެ ބޮޑު ސަބަބަކީ ޗެމްޕިއަންސް ލީގު ކާމިޔާބު ކުރުމެވެ. ޔުވެންޓަސް އިން އެންމެ ފަހުން ޗެމްޕިއަންސް ލީގު ކާމިޔާބުކުރީ 1996 ވަނަ އަހަރު އެވެ.

އަލެގްރީ ބުނީ ކުރިއަށް އޮތް ސީޒަނަށް ވެސް އެންމެ ބޮޑު ޓާގެޓަކީ ޗެމްޕިއަންސް ލީގު ކާމިޔާބު ކުރުން ކަމަށެވެ. އެކަމަކު އެންމެ ފުރަަތަމަ ވިސްނަން ޖެހޭނީ ގްރޫޕް ސްޓޭޖު ފަހަނައަޅައި ދިއުމަށް ކަމަށް އަލެގްރީ ގަބޫލުކުރެ އެވެ.