ރިޔާދު، ސައުދީ އަރަބިއްޔާ (މާޗް 7) - އަލް ނަސްރަށް ކުޅެމުން އަންނަ ޕޯޗުގީސް ފޯވާޑް، ކްރިސްޓިއާނޯ ރޮނާލްޑޯ އަށް ކުރިމަތިވި އަނިޔާގެ މައްސަލަ ކުރިން ބެލެވުުނު ވަރަށް ވުރެން ސީރިއަސްވުމާ އެކު، އިތުރު ފަރުވާ އަށް ސްޕެއިނަށް ގޮސްފި އެެވެ.

އުމުރުން 41 އަހަރުގެ ރޮނާލްޑޯ ވަނީ އަލް ނަސްރަށް މި ސީޒަނުގައި ކުޅެދިން 22 މެޗުން 21 ލަނޑު ޖަހައިފަ އެވެ. މިދިޔަ ހަފްތާގެ ހޮނިހިރު ދުވަހު، އަލް ނަސްރުން އަލް ފައިހާ ބަލިކުރި މެޗުގައި ރޮނާލްޑޯ ވަނީ ބަދަލުކޮށްފަ އެވެ. އެ މެޗުގައި ރޮނާލްޑޯ އަތުން ޕެނަލްޓީއެއް ވެސް ނާކާމިޔާބުވި އެވެ.

އަލް ނަސްރުގެ ކޯޗު ޖޯޖް ޖީސޫސް ބުނީ، ރޮނާލްޑޯ، އެ މެޗުގައި ބަދަލުކުރަން ޖެހުނީ މަސްގަނޑަށް ލިބުނު އަނިޔާއެއްގެ ސަބަބުން ކަމަށެވެ. އަދި، މެޗަށް ފަހު، ހެދި ޓެސްޓްތަކުން އެނގުނު ގޮތުގައި، ރޮނާލްޑޯގެ އެ އަނިޔާގެ މައްސަލަ ހީކުރި ވަރަށް ވުރެން ސީރިއަސްވުމުން، އޭނާ ވެސް ބޭނުންވާތީވެ، މެޑްރިޑަށް އިތުރު ފަރުވާ ހޯދަން ދިޔައީ ކަމަށް ޖީސޫސް ބުނެފައިވެ އެވެ.

ފަސް ފަހަރު ބެލޮންޑިއޯ އެވޯޑް ހޯދާފައިވާ ރޮނާލްޑޯ، މެޑްރިޑްގައި ފަރުވާ ހޯދާނީ އޭނާ އާންމުކޮށް ދައްކާ މެޑިކަލް ޓީމުގެ ފަރާތުންނެވެ.

ގައުމީ ޓީމާއި ކްލަބް ކެރިއަރުގައި މިހާތަނަށް 965 ލަނޑު ޖަހާފައިވާ ރޮނާލްޑޯ ވަނީ، ކެރިއަރުގައި 1000 ގޯލު ހަމަކުރުމަކީ އެންމެ ބޮޑު އަމާޒުކަމަށް ބުނެފަ އެވެ.

ޕޯޗުގަލް އިން މި މަހުގެ 29 ވަނަ ދުވަހު މެކްސިކޯއާ ދެކޮޅަށް ކުޅޭ މެޗަށާއި އަންނަ މަހު އެއް ވަނަ ދުވަހު އެމެރިކާއާ ދެކޮޅަށް ކުޅޭ އެކުވެރިކަމުގެ މެޗުތަކަށް ނެގި ސްކޮޑުގައި ރޮނާލްޑޯ ހިމެނި ނަމަވެސް އެ މެޗުތަކުގައި އޭނާ ކުޅޭނެ ކަމުގެ ޔަގީންކަމެއް އަދި ނެތެވެ.