އުފަން ތާރީހު: 13 ސެޕްޓެމްބަރު 1989 (31 އަހަރު)

މަގާމު: ފޯވާޑް/ އެޓޭކިން މިޑްފީލްޑަރު

ގައުމު: ޖާމަނީ

ކްލަބް: ބަޔާން މިއުނިކް

ޖަރުމަނު ގައުމީ ޓީމަށް 101 މެޗު ކުޅެދީފައިވާ މުލާ އަކީ މި ފަހަރުގެ އެ ޓީމުގެ ސްކޮޑުގައި އެޓޭކަށް ބަލާއިރު، ހުރި އެންމެ ތަޖުރިބާކާރު ކުޅުންތެރިޔާ އެވެ.ޖަރުމަނު ޓީމުން މިދިޔަ 11 ވަރަކަށް އަހަރު ތެރޭ ބައިނަލްއަގުވާމީ ފުޓްބޯޅައިގައި ހޯދި ކާމިޔާބީ އާއި ރަނގަޅު ނަތީޖާތަކުގައި މުލާ ވަނީ އިސް ދައުރެއް އަދާކޮށްފަ އެވެ. ޔުއެފާ ނޭޝަންސް ލީގުގައި 2019 ވަނަ އަހަރު ނޮވެމްބަރު މަހު ނެދަލެންޑްސްއާ ކޮޅަށް ކުޅުނު މެޗަށް ފަހު މުލާ ޖަރުމަނު ގައުމީ ޓީމަށް ނުނަގަ އެވެ. އޭނާ އަށް އަލުން ގައުމީ ޓީމުން ފުރުސަތު ދިނީ މި ފަހަރުގެ ޔޫރޯއާ ދިމާކޮށެވެ. އަލުން އެނބުރި އައިސް ގައުމީ ޓީމަށް ކުޅުނު ފުރަތަމަ މެޗަކީ މި މަހު ދެ ވަނަ ދުވަހު ޑެންމާކާ ބައްދަލުުކުރި މެޗެވެ.

އަލުން ޖަރުމަނު ޓީމުން މުލާ އަށް ފުރުސަތު ދިނުމުގައި މިދިޔަ ދެ އަހަރު ބަޔާން މިއުނިކްގައި އޭނާ ދެއްކި ކުޅުމަށް ވަރަށް ބޮޑަށް ބެލި އެވެ. މުލާ ވަނީ މިދިޔަ ދެ އަހަރެއްހާ ދުވަހުގެ ތެރޭގައި ބަޔާނުން ހަތް ތަށި އުފުލާލިއިރު، އޭގެ މުހިއްމު ރޯލެއް ކުޅެފަ އެވެ. ބަޔާންގެ އެޓޭކްގައި ލެވަންޑޯސްކީ އަށް ފަހު އެއް ލެވަލެއްގައި އެންމެ ރަނގަޅު ކުޅުން ދައްކަނީ މުލާ އެވެ. މުހިއްމު ވަގުތުގައި ގޯލު ޖެހުމުގެ އިތުރުން ގޯލު ޖަަހަން ފުރުސަތު ތަނަވަސްކޮށްދީފައިވެ އެވެ. ގައުމީ ޓީމުގައި މުލާގެ ލަނޑު ޖެހުމުގެ ރެކޯޑަށް ބަލާއިރު، އޭނާ ވަނީ މިހާތަނަށް 38 ގޯލު ޖަހައިފަ އެވެ.