އުފަން ތާރީހު: 29 މާޗް 1991 ( 30 އަހަރު )

މަގާމު: މިޑްފީލްޑަރު

ގައުމު: ފްރާންސް

ކްލަބް: ޗެލްސީ

ލެސްޓާ ސިޓީން 2016 ވަނަ އަހަރު އިނގިރޭސި ޕްރިމިއާ ލީގުގެ ޗެމްޕިއަންކަން ހޯދި އަހަރު ގިނަ ބަޔެއްގެ ސަމާލުކަން ހުއްޓުނު ކާންޓޭ އަކީ މި ވަގުތު ދުނިޔޭގައި ހުރި އެންމެ މޮޅު ޑިފެންސިވް މިޑްފީލްޑަރެވެ. އޭނާ ވަނީ މި ފަހަރުގެ ޗެމްޕިއަންސް ލީގުގެ ޗެމްޕިއަންކަން ޗެލްސީން ހޯދިއިރު، އޭނާގެ ފެންވަރު ސާބިތުކޮށްދީފަ އެވެ. ސެމީ ފައިނަލުގައި ރެއާލް މެޑްރިޑާއި ދެކޮޅަށް ކުޅުނު ދެ ލެގާއި ފައިނަލުގައި މެންޗެސްޓާ ސިޓީއާ ދެކޮޅަށް ކުޅުނު މެޗުގެ މޮޅު ކުޅުންތެރިއަކީ ކާންޓޭ އެވެ.

ކާންޓޭ އަށް ފްރާންސް ޓީމުން ފުރުސަތު ލިބުނީ 2016 ވަނަ އަހަރުގެ މާޗް މަހު އެވެ. އޭގެ ފަހުން ފްރާންސް ޓީމު ލިސްޓުން ކާންޓޭގެ ނަން ބާކީއެއް ނުވެ އެވެ. ފްރާންސް އިން 2016 ވަނަ އަހަރުގެ ޔޫރޯގެ ފައިނަލާ ހަމައަށްދިޔައިރު ކާންޓޭ ވަނީ މޮޮޅު ކުޅުމެއް ދައްކައިފަ އެވެ. އަދި 2018 ވަނަ އަހަރު ފްރާންސް އިން ފީފާ ވޯލްޑް ކަޕްގެ ޗެމްޕިއަންކަން ހޯދިއިރު، ޓީމުގެ މެދު ތެރޭގައި ތަފާތު މޮޅު ކުޅުމެއް ކާންޓޭ ވަނީ ދައްކައިފަ އެވެ. އަދި މި ވަގުތު ކާންޓޭ ހުރި ފޯމަށް ބަލާއިރު، އޭނާ މި ފަހަރު ޔޫރޯގައި މޮޅު ކުޅުމެއް ދައްކައިފިނަމަ ފީފާގެ މޮޅު ކުޅުންތެރިޔާގެ މަގާމު އޭނާ އަށް ލިބުމުގެ ފުރުސަތު ބޮޑެވެ.