އުފަން ތާރީހު: 16 ޖުލައި 1989 (31 އަހަރު)

މަގާމު: ވިންގް/ ފޯވާޑް

ގައުމު: ވޭލްސް

ކްލަބް: ރެއާލް މެޑްރިޑް

މީގެ 14 އަހަރު ކުރިން 2006 ވަނަ އަހަރު ބޭލް ވަނީ އޭނާގެ އުމުރުން 16 އަހަރާއި 10 ދުވަހުގައި ވޭލްސް އަށް މެޗެއް ކުޅެދީފަ އެވެ. އޭގެ ފަހުން އޭނާ އަންނަނީ ގަވާއިދުން ވޭލްސް ޓީމަށް ކުޅެމުންނެވެ. ބޭލްގެ ކެރިއަރު ރަނގަޅު މިސްރާބަކަށް ދާން ފެށީ 2011 ވަނަ އަހަރާ ހަމައިން ފެށިގެންނެވެ. ފަހުން އޭނާ ރެއާލް މެޑްރިޑަށް ބަދަލުވެ ވަނީ ޗެމްޕިއަންސް ލީގު ހަތަރު ފަހަރު ކާމިޔާބުކޮށްފަ އެވެ. ގައުމީ ޓީމަށް ބޭލް ވަނީ މިހާތަނަށް ކުޅެދިން 92 މެޗުން 33 ގޯލު ޖަހައި 18 ގޯލު ޖަހަން ފުރުސަތު ތަނަވަސްކޮށްދީފަ އެވެ.

މިހާތަނަށް ބޭލް، ވޭލްސްއާ އެކު ބައިނަލްއަގުވާމީ ބޮޑު މުބާރާތެއްގައި ކުޅުނީ އެންމެ ފަހަރަކު އެވެ. އެއީ 2016 ވަނަ އަހަރުގެ ޔޫރޯގަ އެވެ.އެ ފަހަރުގެ މުބާރާތުގައި ވޭލްސް ވަނީ ސެމީ ފައިނަލާ ހަމައަށް ދަތުރުކޮށްފަ އެވެ. އެއީ ކުއާޓާ ފައިނަލުގައި ބެލްޖިއަމް ކަޓުވާލައިފަ އެވެ. އެ ދަތުރުގައި ބޭލް ވަނީ މުހިއްމު ދައުރެއް އަދާކޮށް ލަނޑު ވެސް ޖަހައިފަ އެވެ. ސެމީގައި ވޭލްސް ބަލިވީ މުބާރާތުގެ ޗެމްޕިއަންކަން ހޯދި ޕޯޗުގަލް އަތުންނެވެ. މި ފަހަރުގެ ޔޫރޯއާ ކުރިމަތިލާއިރު، ބޭލް މި ސީޒަން ނިންމާލީ ރަނގަޅު ފޯމެއްގަ އެވެ. ގިނަ މެޗުތަކުގައި ވަނީ ލަނޑު ޖަހައިފަ އެވެ.