އުފަން ތާރީހު: 8 ފެބްރުއަރީ 1995 (26 އަހަރު)

މަގާމު: މިޑްފީލްޑަރު/ ޑިފެންޑަރު

ގައުމު: ޖާމަނީ

ކްލަބް: ބަޔާން މިއުނިކް

ޖަރުމަނު ޓީމުގެ މި ވަގުތު އެންމެ މުހިއްމު ކުޅުންތެރިއަކަށް ވާނެ އެއް ނަަމަކީ ޔޯސުއާ ކިމިކް އެވެ. އޭނާ އަކި ޑިފެންސްލައިނާއި މެދުތެރޭގެ އެކި މަގާމުތަކަށް ވެސް އެއް ފެންވަރެއްގައި މޮޅަށް ކުޅޭ ކުޅުންތެރިއެކެވެ. ކްލަބް ލެވަލްގައި ބަޔާން މިއުނިކަށާއި ޖަރުމަނު ގައުމީ ޓީމުގެ މެޗުތަކުގައި އޭނާ ވަނީ އެކަން ސާބިތުކޮށްދީފަ އެެވެ. ޖަރުމަނުގެ ކޯޗު ޔަކީމް ލޯ ސިފަކުރާގޮތުގައި ކިމިކް އަކީ ޖަރުމަނު ޓީމަށް ފިލިލް ލާމް ފަދައިން މުހިއްމު ދައުރެއް އަދާކުރެވިދާނެ ކުޅުންތެރިއެކެވެ. އިސްކޮޅުން ދިގު ނޫން ކަމުގައި ވިޔަސް ހުނަރުވެރިކަމަށް ބަލާއިރު ކިމިކަށް ޓިމަށް ފައިދާހުރި އެތައް ކަމެއް ކުރެވިދާނެ އެވެ

ޖާމަނީގެ ހަ އުމުރުފުރާްއެއްގެ ގައުމީ ޓީމަށް ކުޅެ ކެޕްޓަން ބޭންޑް އަޅައިގެން ވެސް ކުޅުނު ކިމިކް ގައުމީ ޓީމަށް ފުރަތަމަ ފަހަރަށް މެޗެއް ކުޅުނީ 2016 ވަނަ އަހަރުގެ މެއި މަހުގަ އެވެ. އޭނާ ވަނީ އެ އަހަރު ފްރާންސްގައި ބޭއްވި ޔޫރޯ ފުޓްބޯޅަ މުބާރާތުގައި ވެސް ކުޅެފަ އެވެ. މިއީ ކިމިކް ޖަރުމަނު ޓިމާ އެކު ކުރިމަތިލާ ބައިނަލްއަގުވާމީ ބޮޑު ތިން ވަނަ މުބާރާތެވެ. އުމުރަށް ބަލާއިރު މިހާރު ވެސް ކިމިކް ވަނީ ޖަރުމަނު ޓީމަށް ގިނަ މެޗުތަކެއް ކުޅެދީފަ އެވެ. އޭނާ ވަނީ ޖަރުމަނު ޓީމަށް 53 މެޗުން ތިން ގޯލު ޖަހައިފަ އެވެ.