އުފަން ތާރީހު: 7 އޭޕްރީލް 1992 (29 އަހަރު)

މަގާމު: ފޯވާޑް

ގައުމު: ސްޕެއިން

ކްލަބް: ވިޔަރެއާލް

ފާއިތުވި ދެ އަހަރަކީ ވިޔަރެއާލަށް ކުޅެމުން އަންނަ ހުނަރުވެރި ފޯވާޑް ޖެރާޑް މޮރޭނޯގެ ކުރިއެރުން ވަރަށް ބޮޑަށް ފާަހަގަވި ދެ ސީޒަނެވެ. މި ސީޒަނުގައި ވިޔަރެއާލުން ޔޫެރޮޕާ ލީގުގެ ޗެމްޕިއަންކަން ހޯދައި ސްޕެނިޝް ލީގުގައި ވެސް ރަނގަޅު ނަތީޖާތަކެއް ނެރުނުއިރު، މިއީ މޮރޭނޯގެ ކެރިއަރުގައި އޭނާ އެއް ސީޒަނެއްގައި އެންމެ ގިނަ ގޯލު ޖެހި ފަހަަރެވެ، އޭނާ ވަނީ 46 މެޗުން 30 ގޯލު ޖަހައި 11 ގޯލު ޖަހަން ފުރުސަތު ތަނަވަސްކޮށްދީފަ އެވެ. މި ފަހަރު ޔޫރޯގައި ސްޕެއިނުގެ އެޓޭކް ލީޑުކުރުމުގެ ޒިންމާ އޮތީ މޮރޭނޯ އަށެވެ.

މޮރޭނޯ އަށް ސްޕެއިން ޓީމަށް ކުޅެން ފުރުސަތު ލިބުނީ އޭނާގެ ކެރިއަރުގައި ބޭނުންވި އިރަށް ވުރެ މާ ފަހުންނެވެ. ސްޕެއިން ޓީމަށް އޭނާ ފުރަތަމަ މެޗެއް ކުޅެދިނީ 2019 ވަނަ އަހަރުގެ އޮކްޓޫބަރު މަހުގައި ސްވިޑަންއާ ދެކޮޅަށެވެ. އޭގެ ފަހުން ގައުމީ ޓީމަށް ކުޅުނު 11 މެޗުން މޮރޭނޯ ވަނީ ފަސް ގޯލު ޖަހައި ހަތަރު ގޯލު ޖަހަން ފުރުސަތު ތަނަވަސްކޮށްދީފަ އެވެ. މޮރޭނޯ ކުޅޭ ސްޓައިލަށް ބަލާއިރު، އޭނާ އަކީ ސީދާ ސްޓްރައިކަރަކަށާއި ދެ ފަޅިން ވެސް ކުޅެވޭ ފެންވަރުގެ ކުޅުންތެރިއެކެވެ.