އުފަން ތާރީހު: 19 ޑިސެމްބަރު 1987 (33 އަހަރު)

މަގާމު: ފޯވާޑް

ގައުމު: ފްރާންސް

ކްލަބް: ރެއާލް މެޑްރިޑް

މި ފަހަރުގެ ޔޫރޯގައި އުމުރުން 33 އަހަރުގެ ފޯވާޑް ކަރިމް ބެންޒެމާގެ ނަން ހިނގާނެ އެންމެ ބޮޑު އެއް ސަބަބަކީ ފަސް އަހަރުގެ މެދުކެނޑުމަކަށް ފަހު އަލުން ފްރާންސް ޓީމުން ފުރުސަތު ލިބުމުންނެވެ. ފްރާންސް ޓީމުން 2015 ވަނަ އަހަރުގެ ފަހުން މި ފަހަރުގެ ޔޫރޯއާ ހަމައަށް ބެންޒެމާ އަށް ފުރުސަތު ނުލިބުނީ ދަނޑު ބޭރުގެ މައްސަލަތަކެއްގެ ސަބަބުންނެވެ. އެއީ އޮރިޔާންކާޑުގެ މައްސަލަައެއްގައި ފްރާންސްގެ ކުޅުންތެރިޔާ މަތިއު ވަލްބުއޭނާ ބްލެކްމެއިލްކުރުމުގެ ތުހުމަތުގަ އެވެ.

ބެންޒެމާ އަށް އަލުން ގައުމީ ޓީމުން ފުރުަސަތު ދޭން ނިންމި ސަބަބާ ބެހޭގޮތުން ފްރާންސްގެ ކޯޗު ޑިޑިއޭ ޑެޝޯމްޕްސް ބުނީ މި ސީޒަނުގައި ބެންޒެމާ ދެއްކި ކުޅުމަށް ބަލާއިރު ބެންޒެމާ އަށް ގައުމީ ޓީމުން ޖާގަ ހައްގުވާ ކަމަށެވެ. މި ފަހަރު ބެންޒެމާ ވަނީ 30 ގޯލު ޖަހައި ނުވަ ގޯލު ޖަހަން ފުރުސަތު ތަނަވަސްކޮށްދީފަ އެވެ. ރެއާލް މެޑްރިޑަށް މި ފަހަރު އޭނާ ޖަހައިދީފައިވާ ގޯލުތަކަށް ބަލާއިރު، މެޗުތަކުގެ ނަތީޖާ އަނބުރާލުމުގެ މުހިއްމު ދައުރެއް އަދާކުރީ ބެންޒެމާގެ ގޯލުތަކެވެ. އަލްޖީރިއާ އަށް އުފަން ބެންޒެމާ އެންމެ ފުރަތަމަ 2007 ވަނަ އަހަރު ފްރާންސަށް މެޗެއް ކުޅެދިންއިރު، އޭނާ ވަނި މިހާތަނަށް 82 މެޗުން 27 ގޯލު ފްރާންސަށް ކާމިޔާބުކޮށްދީފަ އެވެ.