އުފަން ތާރީހު: 5 ނޮވެމްބަރު 1992 (28 އަހަރު)

މަގާމު: މިޑްފީލްޑަރު

ގައުމު؛ އިޓަލީ

ކްލަބް: ޕީއެސްޖީ

މީގެ ދެ އަހަރު ކުރިން އިޓަލީގެ ކޯޗުކަމާ ރޮބާޓޯ މަންޗިނީ ހަވާލުވެ އެ ޓީމުގެ ފޯމު ރަނގަޅުކުރިއިރު، ޓީމުގެ މެދުތެރޭގައި އެންމެ އިސް ޒިންމާއެއް ދިން ކުޅުންތެރިންގެ ތެރޭގައި ވެރާޓީ ހިމެނެ އެވެ. އުމުރުން 28 އަހަރުގެ ވެރާޓީ އެންމެ ފުރަތަމަ އިޓަލީ ޓީމަށް ކުޅުނީ 2012 ވަނަ އަހަރު އެވެ. އެއީ އެ އަހަރު ބޭއްވި ޔޫރޯ ފުޓްބޯޅަ މުބާރާތަށް ފަހު އެވެ. އޭގެ ފަހުން އިޓަލީއާ ހަވާލުވި އެކި ކޯޗުންގެ އިރުޝާދުގެ ދަށުން ވެރާޓީ ވަނީ ފުރަތަމަ އެގާރައިގައި ކުޅެފަ އެވެ. އެކަމަކު އިޓަލީގެ ފުޓްބޯޅަ ތަޖުރިބާކާރުން ދެކޭގޮތުގައި ވެރާޓީގެ އެންމެ މޮޅު ކުޅުން އިޓަލީގައި ފެންނަން ފެށީ މަންޗިނީ ހަވާލުވި ފަހުންނެވެ. ނަތީޖާ ނެރުމުގެ އިޓަލީން ފަހަކަށް އައިސް ތަފާތު ދައްކާ އެންމެ ބޮޑު ސަބަބަކީ މެދުތެރެއިން ކުޅުން ރަނގަޅުވުމެވެ.

އިޓަލީގެ ތިން އުމުރުފުރާ ގައުމީ ޓީމަށް ކުޅުނު ވެރާޓީ މިހާތަނަށް ވަނީ ސީނިއާ ގައުމީ ޓީމަށް 40 މެޗުން ތިން ގޯލު ޖަހައިފަ އެވެ. ފްރާންސްގެ ޕީއެސްޖީ އަށް ކުޅެމުން އަންނަ ވެރާޓީ އަށް ފާއިތުވި އަހަރުތަކުގައި އަނިޔާގެ މައްސަލަތައް ގިނައިން ކުރިމަތިވި އެވެ. މި ފަހަރުގެ ޔޫރޯއާ ދިމާކޮށް ވެރާޓީ ވަނި އޭނާގެ ފިޓްނަސް ރަނގަޅު ލެވަލެއްގައި ބަހައްޓަން ހާއްސަ ސަމާލުކަމެއް ދީފަ އެވެ. އިޓަލީން މި ފަހަރު ޔޫރޯގައި ރަނގަޅު ހިސާބަކަށްދާނަމަ ޓީމުގައި އެންމެ އިސް ދައުރެއް އަދާކުރާ ކުޅުންތެރިންގެ ތެރޭގައި ވެރާޓީ ހިމެނޭނެ އެވެ. އޭނާ އަކީ މެދުތެރެއިން ޑިފެންސް އަދި އެޓޭކަށް ވެސް ބޭނުންކުރެވޭ ފަދަ ހުނަރުވެރި ކުޅުންތެރިއެކެވެ.