އުފަން ތާރީހު: 15 މާޗް 1993 (28 އަހަރު)

މަގާމު؛ މިޑްފީލްޑަރު

ގައުމު: ފްރާންސް

ކްލަބް: މެންޗެސްޓާ ޔުނައިޓެޑް

ޒުވާން އުމުރުގައި ފްރާންސް ގައުމީ ޓީމުން ފުރުސަތު ހޯދި ޕައުލް ޕޮގްބާ އަކީ މި ވަގުތަށް ބެއްޔަސް އެ ޓީމުގައި ނަން ހިނގާ މުހިއްމު ކުުޅުންތެރިއެކެވެ. ޕޮގްބާ އެންމެ ފުރަތަމަ ފްރާންސް ޓީމަށް މެޗެއް ކުޅުނީ 2013 ވަނަ އަހަރު އެވެ. ޕޮގްބާ އަކީ ފްރާންސް އިން އެންމެ ފަހުން ވާދަކުރި ބައިނަލްއަގުވާމީ ބޮޑު ތިން މުބާރާތުގައި ވެސް ޓީމުގެ މެދުތެރޭގައި ކުޅުނު ކުޅުންތެރިއެކެވެ. އޭނާ އެންމެ ފުރަތަމަ ކުޅުނު ބޮޑު މުބާރާތަކީ 2014 ވަނަ އަހަރު ބްރެޒިލްގައި ބޭއްވި ވޯލްޑް ކަޕް އެވެ. އޭގެ ފަހުން 2016 ވަނަ އަހަރު ފްރާންސްގައި ބޭއްވި ޔޫރޯ އާއި 2018 ވަނަ އަހަރު ރަޝިއާގައި ބޭއްވި ވޯލްޑް ކަޕްގައި ޕޮގްބާ ކުޅުނެވެ.

ފްރާންސް ޓީމަށް 79 މެޗު ކުޅެދީފައިވާ ޕޮގްބާ ވަނީ 2018 ވަނަ އަހަރުގެ ވޯލްޑް ކަޕް ފައިނަލުގައި ކްރޮއޭޝިއާ ކޮޅަށް ގޯލު ވެސް ޖަހައިފަ އެވެ. އެއީ މިހާތަނަށް ގައުމީ ޓީމަށް ޕޮގްބާ ޖަހައިދިން 10 ގޯލުގެ ތެރެއިން އެއް ގޯލެވެ. މެދުތެރޭގެ ކޮންމެ މަގާމަކަށް ވެސް ކުޅެވޭ ޕޮގްބާ އަކީ ފްރާންސްގެ ކޯޗު ޑިޑިއޭ ޑެޝޯމްޕްސްގެ ނަޒަރުަގައި މި ވަގުތު ދުނިޔޭގެ ފުޓްބޯޅައިގައި ކުޅެމުން އަންނަ އެންެމެ މޮޅު އެއް މިޑްފީލްޑަރެވެ. އުމުރުން 28 އަހަރުގެ ޕޮގްބާ އަކީ އޭނާ ކުޅެމުން އަންނަ ކްލަބް މެންޗެސްޓާ ޔުނައިޓެޑްގެ ވެސް މުހިއްމު ކުޅުންތެރިއެކެވެ.