އުފަން ތާރީހު: 5 ފެބްރުއަރީ 1985 (36 އަހަރު)

މަގާމު: ފޯވާޑް

ގައުމު: ޕޯޗުގަލް

ކްލަބް: ޔުވެންޓަސް

މިއީ އުމުރުން 36 އަހަރުގެ ކްރިސްޓިއާނޯ ރޮނާލްޑޯ ކުޅޭނެ ފަހު ޔޫރޯ ފުޓްބޯޅަ މުބާރާތް ކަމަށް އޭނާ ވެސް ވަނީ މީޑިއާގައި ބުނެފަ އެވެ. ދުނިޔޭގެ މޮޅު ކުޅުންތެރިޔާގެ މަގާމު ފަސް ފަހަރު ހޯދާފައިވާ ރޮނާލްޑޯ ވަނީ މިހާތަނަށް ޕޯޗުގަލްއާ އެކު ހަތަރު ޔޫރޯ ފުޓްބޯޅަ މުބާރާތުގައި ކުޅެފަ އެވެ. އެންމެ ފުރަތަމަ 2004 ވަަނަ އަހަރު ޕޯޗުގަލްގައި ހޯސްޓްކުރި ޔޫރޯ އިން ފެނުނު ރޮނާލްޑޯ އަކީ އެ ފަހަރުގެ ފައިނަލުގައި ގްރީސް އަތުން ޕޯޗުގަލް ބަލިވި މެޗުގައި ވެސް ފުރަަތަމަ އެގާރައިގައި ކުޅުނު ކުޅުންތެރިއެކެވެ. އޭގެ 12 އަހަރު ފަހުން ފްރާންސްގައި 2016 ވަނަ އަހަރު ބޭއްވި ޔޫރޯ ކާމިޔާބުކުރި ޕޯޗުގަލް ޓީމުގެ ކެޕްޓަނަކީ ރޮނާލްޑޯ އެވެ

ރޮނާލްޑޯ ވަނީ 2019 ވަަނަ އަހަރު ޔުއެފާ ނޭޝަންސް ލީގުގެ ޗެމްޕިއަންކަން ޕޯޗުގަލް އަށް ހޯދައިދޭން އެހީތެރިވެފަ އެވެ. މި ފަހަރު ޔޫރޯ ކޮލިފައިންގައި ވެސް ޕޯޗުގަލް އަށް އެންމެ ގިނަ ގޯލު ޖަހައިދިން ރޮނާލްޑޯ މި ފަހަރުގެ ޔޫރޯއާ ކުރިމަތިލާނީ ވެސް ލަނޑު ޖެހުމުގެ ރެކޯޑް ރަނގަޅު ސީޒަނަކަށް ފަހު އެވެ. އޭނާ ކުޅެމުން އަންނަ އިޓާލިއަން ލީގުގައި އެންމެ ގިނަ ގޯލު ޖެހީ ވެސް ރޮނާލްޑޯ އެވެ. ރޮނާލްޑޯ މި ފަހަރުގެ ޔޫރޯ އަށް ނުކުންނައިރު އޭނާ ވަނީ މިހާތަނަށް ގައުމީ ޓީމަށް ކުޅުނު 174 މެޗުން 103 ގޯލު ޖަހައިފަ އެވެ. ގައުމީ ޓީމަށް އެންމެ ގިނަ ގޯލު ޖަހައިގެން އީރާންގެ ކުރީގެ ފޯވާޑް އަލީ ދާއީ ހަދާަފައިވާ ރެކޯޑް މުގުރާލަން ރޮނާލްޑޯ އަށް ބޭނުންވަނީ ހަތް ގޯލެވެ.