ގެލްސެންކާޗެން، ޖާމަނީ (ޖޫން 9) - މެންޗެސްޓާ ސިޓީ އަށް ކުޅޭ ޖަރުމަނުގެ މިޑްފީލްޑަރު އިލްކާއި ގުންޑޮގާން އެ ޓީމުން މި ފަހަރުގެ އިނގިރޭސި ޕްރިމިއާ ލީގު ކާމިޔާބުކުރުމުން ލިބުނު ބޯނަސް ފައިސާ އެއްކޮށް ކުރީގެ ކްލަބް ކަމަށްވާ ހެސްލާ 06 އިން ދަނޑެއް އަޅަން ހަދިޔާކޮށްފި އެެވެ.

ޕްރިމިއާ ލީގު ކާމިޔާބުކުރުމުންނާއި މި ފަހަރުގެ ސީޒަނުގެ ކާމިޔާބީ ފާހަގަކުރުމުގެ ގޮތުން ސިޓީ ކޮންމެ ކުޅުންތެރިއަކަށް ބޯނަހުގެ ގޮތުގައި ފައިސާ ދިނެވެ. އުމުރުން 30 އަހަރުގެ ގުންޑޮގާން އަށް ލިބުނު 365،260 ޑޮލަރު ހަދިޔާކޮށްފައިވަނީ އޭނާ އެންމެ ފުރަތަމަ ކުޅުނު ހެސްލާ 06 އަށެވެ.

ޖަރުމަނުގެ ދަށް ޑިވިޝަނުގައި ވާދަކުރަމުން އަންނަ ހެސްލާ 06 އިން އާޓިފިޝަލް ދަނޑެއް އަޅަން ކުރާ މަސައްކަތަށް އެހީވާން ގުންޑޮގާން ދިން އެހީގެ އިތުރުން ދެން ބާކީ ބޭނުންވާ ފައިސާ ހަމަޖައްސައިދޭނީ އެ ކްލަބް ނިސްބަތްވާ ޖަރުމަނުގެ ގެލްސެންކާޗެންގެ ލޯކަލް އޮތޯރިޓީންނެވެ.

"އަހަރެމެންގެ ކުޑައިރުގެ ހަނދާންތައް ވަނީ އެ ޓީމާ ގުޅިފައި. އެ ޓީމުން އެހީއަށް ބޭނުންވާއިރު އެކަން ނުކޮށްދީ ނުހުރެވޭނެ،" ގުންޑޮގާންގެ މެނޭޖަރު އިލާން ބުންޏެވެ.

ގުންޑޮގާން ޕްރިމިއާ ލީގުގެ ތަށި ހިފައިގެން.

ހެސްލާގެ ޗެއާމަން ރެއިނެއޭ ކޮނިއެޓްޒްކާ ވިދާޅުވީ ގުންޑޮގާންގެ މި އެހީތެރިކަމާނުލައި އެ ޓީމަށް މި ދަނޑުގެ ޕްރޮޖެކްޓް ކުރިއަށް ނުގެންދެވޭނެ ކަމަށެވެ. އަދި ގުންޑޮގާން އެ ކްލަބަށް އެންމެ ފުރަތަމަ ކުޅުމަކީ ލިބޭ ފަހުރެއްގެ ގޮތުގައި ރެއިނެއޭ ސިފަކުރެއްވި އެވެ.

"ގުންޑޮގާން އަކީ ދުނިޔޭގައި ވެސް ފާހަގަކޮށްލެވޭ ކުޅުންތެރިއެއް. އެ ފަދަ ކުޅުންތެރިއަކު އަޅުގަނޑުމެން ޓީމުން ކެރިއަރު ފެށުމަކީ ވެސް ފަހުރުވެރިވާ ކަމެއް،" ރެއިނެއޭ ވިދާޅުވި އެވެ.

އެންމެ ކުޑައިރު ހެސްލާ 06 އަށް ކުޅުމަށް ފަހު ގުންޑޮގާން ބޯކުމް އަށް ބަދަލުވީ 2005 ވަނަ އަހަރު އެވެ. އޭގެ ފަހުން ނިއުރެންބާގަށް ވެސް ކުޅުނު ގުންޑޮގާން ބޮޑަށް ފާހަގަވާން ފެށީ 2011 ވަނަ އަހަރު ޔާގެން ކްލޮޕް ކޯޗުކޮށްދިން ބޮރޫޝިއާ ޑޯޓްމަންޑަށް ބަދަލުވި ފަހުންނެވެ.

މެންޗެސްޓާ ސިޓީ ކޯޗުކަމާ 2016 ވަަނަ އަހަރު ޕެޕް ގާޑިއޯލާ ހަވާލުވުމަށް ފަހު އެންމެ ފުރަތަމަ ސޮއިކުރި ކުޅުންތެރިއަކީ ގުންޑޮގާން އެވެ. ތުރުކީ ދަރިކޮޅަށް އުފަން ގުންޑޮގާނަށް ކެރިއަރުގައި މިހާތަނަށް ސީރިއަސް އަނިޔާގެ މައްސަަލަތަކެއް ކުރިމަތިވި ނަމަވެސް ކޮންމެ ފަހަރަކު ރަނގަޅަށް ރިކަވާވެގެން އައިސް މޮޅަށް ކުޅެ އެވެ.

ސިޓީއާ އެކު އަށް ތަށި އުފުލާލާފައިވާ ގުންޑޮގާނަށް މިއީ ހާއްސަ ސީޒަނެކެވެ. އޭނާ ވަނީ ޕްރިމިއާ ލީގާއި ޗެމްޕިއަންސް ލީގުގެ މި ފަހަރުގެ ޓީމުގައި ހިމެނިފަ އެވެ. އޭނާ އަކީ މި މަހު ފަށާ ޔޫރޯ ފުޓްބޯޅަ މުބާރާތުގައި ވާދަކުރާ ޖަރުމަނު ޓީމުގެ ކުޅުންތެރިއެކެވެ.