ޓިއުރިން (މެއި 23) - އިޓާލިއަން ލީގުގެ ގަދަ ހަތަރެއްގައި ނިންމައި އަންނަ ސީޒަނުގެ ޗެމްޕިއަންސް ލީގަށް ޔުވެންްޓަސް ކޮލިފައި ކޮށްދިނުމަކީ އޭނާގެ ވަޒީފާ ސަލާމަތްކުރަން ކޮންމެހެން ކުރަން ޖެހޭ ކަމެއްގެ ގޮތުގައި ނުދެކޭ ކަމަށް ޔުވެންޓަސްގެ ކޯޗު އަންދްރެއާ ޕިރްލޯ ބުނެފި އެވެ.

ގަދަ ހަތަރެއްގެ ޖާގަތައް މި ވަގުތު ކަށަވަރުކޮށްފައި އޮތީ ޗެމްޕިއަންކަން ޔަގީންކޮށްފައިވާ އިންޓަ މިލާނާއި ދެ ވަނައިގައި އޮތް އެޓަލަންޓާ އެވެ. އިންޓަ އަށް 37 މެޗުން 88 ޕޮއިންޓް ލިބިފައިވާއިރު، ދެ ވަނައިގައި އޮތް އެޓަލަންޓާ އަށް 37 މެޗުން ވަނީ 78 ޕޮއިންޓް ލިބިފަ އެވެ.

ތިން ވަނައިގައި އޮތް އޭސީ މިލާނާއި ހަތަރެއްގައި އޮތް ނަޕޯލީ އަށް 37 މެޗުން ވަނީ 76 ޕޮއިންޓް ލިބިފަ އެވެ. ނުވަ އަހަރަށް ފަހު ލީގު ޗެމްޕިއަންކަން ގެއްލުނު ޔުވެންޓަސް ފަސް ވަނައިގައި އޮތީ 37 މެޗުން 75 ޕޮއިންޓް ހޯދައިގެންނެވެ.

ޔުވެންޓަސް އަށް ގަދަ ހަތަރެއް ލިބެން އޮތީ އެ ޓީމު ކުޅޭ މެޗުން ބޮލޯނިއާ އަތުން މޮޅުވެ، ނަޕޯލީ އާއި އޭސީ މިލާން ކުޅޭ މެޗުތަކުން މޮޅުނުވެއްޖެނަމަ އެވެ. މިލާން ކުޅެނީ އެޓަލަންޓާއާ އެވެ. ނަޕޯލީ ބައްދަލުކުރާނީ ވެރޯނާއާ އެވެ.

މި ފަހަރު އިޓާލިއަން ސުޕަ ކަޕާއި އިޓާލިއަން ކަޕް ޗެމްޕިއަންކަން ޔުވެންޓަސް އިން ހޯދި ނަމަވެސް އިޓަލީގެ މީޑިއާ ރިޕޯޓްތައް ބުނާގޮތުން ޕިރްލޯ އަށް ޔުވެންޓަސްގެ ކޯޗުގެ މަގާމުގައި ދެމިހުރެވޭނީ ގަދަ ހަތަރެއްގައި ނިންމައިގެންނެވެ. އެކަމަކު ޕިރްލޯ އެކަމަށް އެއްކޮށް އެއްބަހެއްނުވެ އެވެ.

"އަހަންނަށް ހިއެއްނުވޭ ކްލަބުން ގޮތެއް ނިންމާނީ މާދަމާ (މިއަދު) މެޗުތައް ނިމޭ ގޮތަކުން ކަމެއް. އަހަންނަށް ހީވަނީ ކްލަބަށް ވަރަށް ރަނގަޅަށް އެނގޭނެ މި ސީޒަން ދިޔައީ ކިހިނެއް ކަން. ރަނގަޅަށް ދިޔަ ކަންތައްތަކާއި ގޯސްކޮށް ދިޔަ ކަންތައްތައް ވެސް އެނގޭނެ. އަހަރެން ގަބޫލުކުރަނީ އެ މީހުން ގޮތެއް ނިންމާނީ ފަހު މެޗަށް ބަލާފައި ނޫން ހެން،" ޕިރްލޯ ބުންޏެވެ.

ޔުވެންްޓަަސްގެ ކޯޗުކަމާ މި ސީޒަނުގައި ޕިރްލޯ ހަވާލުވީ ކޯޗިންގެ މާ ބޮޑު ތަޖުރިބާއެއް ނެތި އެވެ. އޭނާގެ ރަސްމީ ފުރަތަމަ ކޯޗިން ވަޒީފާ ކަމަށްވާ ޔުވެންޓަސްގެ 23 އަހަރުން ދަށުގެ ޓީމުގެ ކޯޗުކަން ހަވާލުކުރިތާ 10 ދުވަސް ފަހުން ސީނިއާ ޓީމުން ފުރުސަތު ލިބުނީ އެވެ. ޕިރްލޯއާ އެކު ޔުވެންޓަސް އިން ސޮއިކުރި އެއްބަސްވުން ހަމަވާނީ އަންނަ އަހަރުގެ ޖޫން މަހުގެ ނިޔަލަށެވެ.

އުމުރުން 42 އަހަރުގެ ޕިރްލޯގެ އިތުރުން މި ސީޒަނަށް ފަހު ކްރިސްޓިއާނޯ ރޮނާލްޑޯ ވެސް ޔުވެންޓަސް ދޫކޮށްލާނެ ކަމަށް މީޑިއާގައި ވާހަކަ ދެކެވެ އެވެ. ޕިރްލޯ ބުނީ އޭނާ ދެކޭގޮތުގައި އަންނަ ސީޒަނުގައި ވެސް ރޮނާލްޑޯ ކުޅޭނީ ޔުވެންޓަސް އަށެވެ.

މިދިޔަ ހަފްތާގައި ޔުވެންޓަސް އިން ވަނީ އެޓަލަންޓާ ބަލިކޮށް އިޓާލިއަން ކަޕްގެ ތަށި އުފުލާލައިފަ އެވެ. އެހެންވެ މިރޭގެ މެޗަށް ނުކުންނައިރު ޓީމުގެ ކޮންފިޑެންސް ރަނގަޅުވާނެ ކަމަށް ޕިރްލޯ ގަބޫލުކުރެ އެވެ.

ގަދަ ހަތަރެއްގައި ވާދަކުރާ ޓީމުތަކުގެ މެޗުތައް މިރޭ ފަށާނީ ރާއްޖެ ގަޑިން 23:45 ގަ އެވެ. ޗެމްޕިއަން އިންޓަ މިލާނާއި އުދިނޭޒީ ކުޅޭ މެޗު އޮތީ 18:00 ގަ އެވެ.