އިންޑިއާގެ މަޝްހޫރު ކްރިކެޓް ލީގު ކަމަށްވާ އިންޑިއަން ޕްރިމިއާ ލީގު (އައިޕީއެލް)ގައި ވާދަކުރާ ޓީމުތަކުން ގިނަ އަދަދެއްގެ ކޮވިޑް-19 ކޭސްތަކެއް ފެންނަމުންދާތީ ލީގު ސަސްޕެންޑް ކުރުމުން، އެ މުބާރާތުގައި ވާދަކުރާ އޮސްޓްރޭލިއާގެ ގިނަ ކުޅުންތެރިންނާއި ކޯޗިން ސްޓާފްގެ އިތުރުން ކޮމެންޓޭޓަރުން ރާއްޖެ އަންނަން ނިންމައިފި އެވެ.

އައިޕީއެލް މެދުކަނޑާލަން ނިންމީ މިއަދު އިންޑިއަން ޕްރިމިއާ ލީގުގެ ގަވާނިން ކައުންސިލާއި އިންޑިއާގެ ކްރިކެޓް ބޯޑް (ބީސީސީއައި) އިން ބޭއްވި ކުއްލި ބައްދަލުވުމަކަށް ފަހު އެވެ. މުބާރާތް މެދުކަނޑާލިއިރު، މިހާތަނަށް ވަނީ 29 މެޗެއް ކުޅެފަ އެވެ.

އިންޑިއާގައި ކޮވިޑްގެ ނުރައްކާ އިންތިހާ އަށް ބޮޑުވެފައިވާއިރު، ފާއިތުވި 48 ގަޑިއިރު ތެރޭގައި އައިޕީއެލްގައި ވާދަކުރާ ގިނަ ޓީމުތަކަކުން ވަނީ ކޮވިޑްގެ ޕޮޒިޓިވް ކޭސްތަކެއް ރިޕޯޓްކޮށްފަ އެވެ.

މިކަން އެންމެ ބޮޑަށް އައިޕީއެލްގެ ބޯޑުގެ ސަމާލުކަމަށް އައީ ކޮވިޑް ކޭސްތަކުގެ ސަބަބުން ރޯޔަލް ބެންގަލޫރު ޗެލެންޖް (އާރްބީސީ) އާއި ކަލްކަތާ ނައިޓް ރައިޑާސް (ކޭކޭއާރް) މެޗު ފަސްކުރަން ޖެހުމުންނެވެ. މެޗު ފަސްކުރަން ކުރަން ޖެހުނީ ކަލްކަތާ ޓީމުގެ ތެެރެއިން ކްލަސްޓާ އެއް އުފެދުމުންނެވެ. އެ ޓީމުގެ ދެ ކުޅުންތެރިންގެ އިތުރުން ކޯޗާއި ޓީމުގެ އެހެން އެހީތެރިއަކު ވަނީ ޕޮޒިޓިވްވެފަ އެވެ.

މުބާރާތް ސަސްޕެންޑުކުރި އިރު، އެ މުބާރާތުގައި ކުޅޭ ގިނަ އަދަދެއްގެ ކުޅުންތެރިންނަށް އެނބުރި ގައުމަށް ދެވޭނެ ގޮތެއް ނެތެވެ. ސަބަބަކީ ތަފާތު ވޭރިއަންޓުތަކާއެކު އިންޑިއާގައި ބަލި އިންތިހާއަށް ފެތުރުމާ ގުޅިގެން، ގިނަ ގައުމުތަކުން ވަނީ އިންޑިއާއިން ފްލައިޓުތައް ދަތުރުކުރުން މަނާކޮށްފަ އެވެ.

އެ ގައުމުތަކުގެ ތެރޭގައި އޮސްޓްރޭލިއާ ވެސް ހިމެނޭއިރު، އިންޑިއާ އިން އެއްވެސް މީހަކަށް މި މަހުގެ 15 ވަނަ ދުވަހާ ހަމައަށް އޮސްޓްރޭލިއާ އެތެރެވުން ވަނީ މަނާކޮށްފަ އެވެ.

އަދި މުޅި ދުނިޔެއަށް އެންމެ ބޮޑަށް ހުޅުވާލާފައިއޮތް ދުބާއީއިން ވެސް ވަނީ އިންޑިއާ އިން ފްލައިޓުތައް ދަތުުރުކުރުން މަނާކޮށްފަ އެވެ.

އައިޕީއެލްގައި މިފަހަރު ބައިވެރިވެފައިވާ އޮސްޓްރޭލިއާގެ ކުޅުންތެރިންނާއި ކޯޗިން ސްޓާފްގެ އިތުރުން ކޮމެންޓޭޓަރުންގެ އަދަދު 40 އަށް އަރަ އެވެ.

މުބާރާތް ސަސްޕެންޑު ކުރުމުން ޕެޓް ކަމިންސް، ސްޓީވް ސްމިތު، ގްލެން މެކްސްވެލް، ރިކީ ޕޮންޓިން އާއި ސައިމަން ކެޓިޗް ވެސް މިހާރު ވަނީ ރާއްޖެ އަންނަން މިސްރާބު ޖަހައިފަ އެވެ.

އިންޑިއާ އިން އަންނަ ޓޫރިސްޓުން 96 ގަޑިއިރުނުވާ ޕީސީއާރު ޓެސްޓެއް ހަދަންޖެހޭ ގޮތަށް ރާއްޖޭން ފިޔަވަޅު ހަރުކަށިކޮށްފައިވީ ނަމަވެސް، އެ ކުޅުންތެރިންނަށް އެނބުރި ގައުމަށް މިވަގުތު ދެވެން އޮތް އެންމެ ފަސޭހަ މަގަކީ ރާއްޖެ އެވެ.

ޓޫރިސްޓުންގެ ގޮތުގައި އިންޑިއާއިން އަންނަ މީހުން އަދިވެސް ކަރަންޓީނުވާން ނުޖެހެ އެވެ. އެކަމަކު އެމީހުންނަށް މީހުން ދިރިއުޅޭ ސަރަހައްދެއްގައި ހުންނަ ގެސްޓްހައުސެއްގައި މަޑުކުރުން ވަނީ މަނާކޮށްފަ އެވެ.

އައިޕީއެލް ސަސްޕެންޑު ކުރުމުގެ ސަބަބުން އިންޑިއާގައި ތާށިވެފައިވާ އޮސްޓްރޭލިއާ ކުޅުންތެރިންނަށް އެނބުރި ގައުމަށް ދިއުމަށް ހާއްސަ އިންތިޒާމެއް ހަމަޖައްސައިނުދޭތީ، ބައެއް ކުޅުންތެރިން ދަނީ އޮސްޓްރޭލިއާ ސަރުކާރަށް ވަރަށް ބޮޑަށް ފާޑުކިޔަމުންނެވެ.