މާލެ ސަރަހައްދު ފިޔަވާ އަތޮޅުތެރޭ އެއް ރަށުން އަނެއް ރަށަށް ޒަރޫރީ ބޭނުމެއްގައި ނޫން ގޮތަކަށް ނުދިއުމަށް، ޑިރެކްޓާ ޖެނެރަލް އޮފް ޕަބްލިކް ހެލްތު މައިމޫނާ އަބޫބަކުރު އަންގަވައިފި އެވެ.

މައިމޫނާ މިއަދު ނެރުނު އެންގުމެއްގައި ވިދާޅުވެފައިވަނީ އަންނަ އާންގާރަ ދުވަހުން ފެށިގެން ހަފްތާއެއްގެ މުއްދަތަށް ޒަރޫރީ ބޭނުންތަކަށާއި ސިއްހީ ފަރުވާ ހޯދަން ނޫން ގޮތަކަށް މީހުން ދިރިއުޅޭ އެއް ރަށުން އަނެއް ރަށަށް ނުދާން އަންގާ ކަމަށެވެ.

ހާއްސަ ހާލަތުގައި ރައްޔިތުންނަށް ބޭނުންވާ ކާބޯތަކެއްޗާއި ޒަރޫރީ ބޭނުންތަކަށް ކުރަން ޖެހޭ ދަތުރުތައް ލޯކަލް ކައުންސިލްތަކުން މަގުފަހި ކޮށް ދިނުމަށް ވެސް ވަނީ އަންގައިފަ އެވެ.

"އިސްވެ ބަޔާން ކުރި ފިޔަވަޅުތައް ތަންފީޒު ކުރުމުގައި ވަގުތާއި ހާލަތަށް ރިއާޔަތްކޮށް އަޅަން ޖެހޭ އެންމެހައި ފިޔަވަޅުތައް އަޅާނީ މޯލްޑިވްސް ޕޮލިސް ސާވިސް އާއި ކަމާ ބެހޭ އެހެނިހެން މުއައްސަސާތަކުން،" އެންގުމުގައިވެ އެވެ.

އެއް ރަށުން އަނެއް ރަށަށް ނުދާން އަންގައިފައި މިވަނީ ކޮވިޑަށް ޕޮޒިޓިވްވާ މީހުންގެ އަދަދު ވަރަށް ބޮޑުތަން އިތުރު ވާން ފަށައިފައި ވަނިކޮށެވެ. ވޭތުވެދިޔަ ދެ ދުވަހު ވެސް ޕޮޒިޓިވްވި މީހުންގެ އަދަދު އުޅެނީ 400 މަތީގަ އެވެ. އޭގެ ތެރޭގައި އަތޮޅު ތެރެއިން ޕޮޒިޓިވްވާ މީހުންވެސް ގިނަ އެވެ.

ކޮވިޑަށް މީހުން ޕޮޒިޓިވް ވެގެން އައްޑޫ ސިޓީ އާއި ކުޅުދުއްފުށީ ސިޓީގެ އިތުރުން ގިނަ ރަށްތަކެއް މިހާރު ވެސް އޮތީ މޮނީޓަރިންގެ ހާލަތުގަ އެވެ.