ދެ ފަހަރަށް ފަސްކޮށްފައިވާ އޭއެފްސީ ކަޕްގެ ކޮލިފައިން ދެ ވަނަ ބުރުގައި ރާއްޖޭގެ ކްލަބް އީގަލްސްއާ ދެކޮޅަށް ބަންގްލަދޭޝްގެ ޑާކާ އަބަހާނީން ކުޅެން އޮތް މެޗާ ބެހޭގޮތުން އެ ޓީމުން ދައްކާ ވާހަކަތައް އަނެއްކާ ވެސް ބަދަލުވެއްޖެ އެވެ.
އީގަލްސް އާއި އަބަހާނީގެ މެޗު އެންމެ ފުރަތަމަ ޝެޑިއުލްކޮށްފައި އޮތީ މި މަހު 14 ވަނަ ދުވަހު ބަންގްލަދޭޝްގައި ކުޅޭ ގޮތަށެވެ. އެކަމަކު ބަންގްލަދޭޝްގައި ކޮވިޑްގެ ކޭސްތައް ގިނަވެ، ލޮކްޑައުންއެއްގައި އޮތުމުން އެ ގައުމުގައި މެޗު ކުޅެވޭނެ ގޮތެއް ނުވި އެވެ. އެހެންވެ އޭއެފްސީ އަށް ޖެހުނީ ބަދަލުތަކެއް ގެންނާށެވެ. ހާލަތަށް ބަލައި އޭއެފްސީން އަބަހާނީގެ ހުށަހެޅުމަކާ އެއްގޮތަށް އީގަލްސްއާ ދެކޮޅަށް ކުޅޭ މެޗު މި މަހު 21 ވަނަ ދުވަހު ނޭޕާލްގައި ކުޅެން ނިންމި ނަަމަވެސް އޭރު ވެސް ބަންގްލަދޭޝް ލޮކްޑައުންއެއްގައި އޮތުމުން ދަތުރުފަތުރު ކުރުމުގެ ހުއްދަ ނުލިބި އެންމެ ފަހުން 21 ގައި ވެސް މެޗު ކުޅެވޭގޮތް ނުވީ އެވެ.
ފަހުން އަބަހާނީން އޭއެފްސީ އަށް ހުށަހެޅީ ހާއްސަ ވިސާއެއް ހޯދުމަށް ފަހު ނަމަވެސް މިދިޔަ އާދިއްތަ ދުވަހު އިންޑިއާގައި އެ މެޗު ކުޅެވޭތޯ ބެލުމަށެވެ. މިހާރު އެ މުއްދަތު ވެސް ފަހަނައަޅައި ގޮސްފައިވާއިރު، އެ މެޗު ކުޅުމުގެ ފުރުސަތު އެންމެ ބޮޑީ އަންނަ މަހު މާލޭގައި ކަމަށް މީގެ ދެ ދުވަސް ކުރިން ބަންގްލަދޭޝްގެ މީޑިއާ ތަކުން ވަނީ ރިޕޯޓްކޮށްފަ އެވެ.
މީގެ ކުރިން އޭއެފްސީން ވަނީ އަބަހާނީ އަށް މެޗު ކުޅެން ނިއުޓްރަލް ދަނޑެއް ނުދެއްކިއްޖެނަމަ މާލޭގައި މެޗު ކުޅޭނެ ކަމަށް އަބަހާނީ އަށް އަންގައިފަ އެވެ. ވާހަކަ ދެކެވިފައި އޮތީ އަބަހާނީ އާއި އީގަލްސްގެ މެޗު އަށް ވަނަ ދުވަހު ކުޅުމަށް ފަހު އޭގެ ތިން ދުވަސް ފަހުން އެ މެޗުން މޮޅުވާ ޓީމެއް ޕްލޭއޮފްގައި ބެންގަލޫރާ ދެކޮޅަށް ކުޅޭ ގޮތަށް ހެދުމަށެވެ. މި ދެ މެޗު ވެސް މާލޭގައި ކުޅޭގޮތަށެވެ. އެއީ ވީހާ ވެސް ގްރޫޕް ސްޓޭޖް މެޗުތަކާ ކައިރިކޮށްފައި އެ މެޗުތައް ކުޅެފިނަަމަ ކްލަބްތަކުގެ ދަތުރު ފަތުރަށް ލުއިތަކެއް ދޭ ގޮތަށެވެ.
އެކަމަކު އިއްޔެ އަބަހާނީ އާއި ބަންގްލަދޭޝްގެ ފުޓްބޯޅަ ފެޑެރޭޝަން (ބީއެފްއެފް) އިން ބައްދަލުކުރުމަށް ފަހު އެ ގައުމުގެ މީޑިއާތަކަށް ބީއެފްއެފްގެ ޖެނެރަލް ސެކްރެޓަރީ އަބޫ ނައީމް ޝޮހާގް ދިން އިންޓަވިއުއެއްގައި ވިދާޅުވީ އަންނަ މަހުގެ އަށް ވަނަ ދުވަހާއި 11 ވަނަ ދުވަހުގައި މާލޭގައި ކޮލިފައިން ދެ ވަނަ ބުރާއި ޕްލޭއޮފް މެޗު ކުޅެން ރާއްޖޭން ކުރި މަސައްކަތް ކާމިޔާބުނުވި ކަމަށެވެ.
"އޭއެފްސީން އޮތީ ރާއްޖެ އަށް ޕްރޮޕޯސްކޮށްފައި އަންނަ މަހުގައި އެ ދެ މެޗު މާލޭގައި ކުޅެން. އެކަމަކު އެ މެޗު ކުޅެން ބޭނުންވާ ހުއްދަ ރާއްޖޭގެ ފުޓްބޯޅަ އެސޯސިއޭޝަނަށް އެ ގައުމުގެ ސަރުކާރުން ނުހޯދުނު. އެހެންވެ އަހަރެމެން ހުށަހަޅަނީ އަންނަ މަހު 5 އިން 7 އާ ދެމެދު އެ މެޗު ބަންގްލަދޭޝްގައި ކުޅެން. ބަންގްލަދޭޝްގައި އޮތް ލޮކްޑައުން މުއްދަތު އިތުރު އެއް ހަފްތާ އަށް ދައްމައިފިނަމަ އަހަރެެމެން މިނިސްޓްރީތަކާ ވާހަކަ ދައްކައިގެން ހައްލެއް ހޯދާނަން. އެކަމަކު މެޗު ކުޅޭނަމަ ކޮވިޑް-19ގެ ރައްކާތެރި ފިޔަވަޅުތަކުގެ ތެރެއިން އީގަލްސް އިން ކަރަންޓީނު މުއްދަތެއް ވެސް ފުރިހަަމަކުރަން ޖެހޭނެ،" ޝޮހާގް ވިދާޅުވި އެވެ.
އެފްއޭއެމްގެ ޖެނެރަލް ސެކްރެޓަރީ ހުސެއިން ޖަވާޒް (ޖަވާ) "އަދަދު" އަށް ވިދާޅުވީ ރާއްޖޭން އެ މެޗުތައް ހޯސްޓްނުކުރެވޭނެ ކަމަށް ބުނެފައިނުވާނެ ކަމަށާއި ވަރަށް އަވަހަށް އޭއެފްސީން އެކަމާ ބެހޭގޮތުން މިއަދު ގޮތެއް ނިންމާނެ ކަމަށެވެ.
އަބަހާނީން އީގަލްސްއާ ދެކޮޅަށް ކުޅެން އޮތް މެޗު ފަސްކުރަން މީގެ ކުރިން ވެސް ގިނަ ގޮތްގޮތަކުން ވަނީ މަސައްކަތްކޮށްފަ އެވެ.
އެފްއޭއެމުން އޭއެފްސީ ކަޕްގެ ކޮލިފައިންގައި ދެން ނުކުޅެ އޮތް ދެ މެޗު މާލޭގައި ހޯސްޓްނުކުރެވޭނެ ކަމަށް ބުނެފައިވާ ކަމަށް ބީއެފްއެފް އިން ބުނި ނަމަވެސް އެއީ މާ ބުރަދަނެއް ހުރި ވާހަކައެއްގެ ގޮތުގައި ނުބެލެވެ އެެވެ. އެއީ އަންނަ މަަހުގެ 14 އިން 21 އަށް މާލޭގައި އޭއެފްސީ ކަޕްގެ ދެކުނު އޭޝިއާގެ ގްރޫޕްގެ މެޗުތައް ހޯސްޓްކުރަން ރާއްޖޭން ބިޑެއް ކާމިޔާބު ކޮށްގެން ނިންމާފައިވާއިރު، އިތުރު ދެ މެޗެއް ކުޅެން ރާއްޖޭން ހުއްދަ ނުލިބޭނެ ސަބަބެއް ނޯންނާނެތީ އެވެ. އަނެއްކޮޅުން އީގަލްސް އިން ކޮލިފައިން ފުރަތަމަ ބުރުގައި ބޫޓާންގެ ތިމްޕޫ ސިޓީއާ ކުޅުނު މެޗު ވެސް ހޯސްޓްކުރީ ރާއްޖޭގަ އެވެ. އެއީ ވެސް ކަމާބެހޭ ފަރާތްތަކުގެ ހުއްދަ ހޯދައި ސަލާމަތީ ގޮތުން އަޅަންޖެހޭ ފިޔަވަޅުތައް އަޅައިގެންނެވެ.
އެނގިފައިވާ ގޮތުގައި އީގަލްސް އާއި އަބަހާނީގެ މެޗާ ބެހޭގޮތުން މިއަދު އޭއެފްސީން ގޮތެއް ނިންމާނެ އެވެ.
