އޭއެފްސީ ކަޕްގެ ކޮލިފައިން ދެ ވަނަ ބުރުގައި ބަންގްލަދޭޝްގެ ޑާކާ އަބަހާނީ އާއި ރާއްޖޭގެ ކްލަބް އީގަލްސް ކުޅޭ މެޗު ބަންގްލަދޭޝްގައި ކުޅެވޭނެ ގޮތެއް ނުވުމުން އެ މެޗު ކުޅޭނެ ނިއުޓްރަލް ދަނޑެއް ހޯދުމަށް އަބަހާނީ އަށް އޭއެފްސީން މުހުލަތެއް ދީފި އެވެ.
ބަންގްލަދޭޝްގައި އަންނަ ބުދަ ދުވަހު ކުޅެން އޮތް އަބަހާނީ އާއި އީގަލްސްގެ މެޗު ޝެޑިއުލާ އެއްގޮތަށް ކުރިއަށް ގެންދެވޭ ގޮތްނުވީ ބަންގްލަދޭޝްގައި ކޮވިޑް-19ގެ ކޭސްތައް ގިނަވަމުންދާތީ އެވެ. ބަންގްލަދޭޝް މި ވަގުތު އޮތީ ލޮކްޑައުންއެއްގަ އެވެ.
ބަންގްލަދޭޝްގެ ފުޓްބޯޅަ ފެޑެރޭޝަނާއި އެ ގައުމުގެ ހެލްތު މިނިސްޓްރީން ވަނީ ހާއްސަ ހުއްދައެއްގެ ދަށުން އޭއެފްސީ ކަޕްގެ މެޗު ކުޅެވޭނެ މާހައުލެއް އޮތް ކަމަށް ބުރާސްފަތި ދުވަހު ނިންމައިފަ އެވެ. އެނގިފައިވާ ގޮތުގައި ފަހުން އެ ގައުމުގެ ހެލްތު މިނިސްޓްރީން މާ ބޮޑު އެއްބާރުލުމެއް ނުދޭތީ މެޗު ބޭއްވޭ ގޮތެއްނުވީ އެވެ.
އޭއެފްސީން މިއަދު އަބަހާނީ އަށް އަންގާފައިވަނީ މާދަމާގެ ނިޔަލަށް އީގަލްސްއާ ދެކޮޅަށް ކުޅެން އޮތް މެޗު ކުޅޭނެ ނިއުޓްރަލް ދަނޑެއް ހޯދުމަށެވެ. އެކަން އަބަހާނީ އަށް ނުކުރެވިއްޖެނަމަ މި މަހު 21 ވަނަ ދުވަހު އެ މެޗު ކުޅޭނީ މާލޭގައި ކަމަށް އޭއެފްސީން ވަނީ ނިންމައިފަ އެވެ. އީގަލްސް އާއި އެފްއޭއެމުން އަންނަނީ އެ މެޗު މާލޭގައި ކުޅެވޭނެ ގޮތެއް ހޯދަން މަސައްކަތްކުރަމުންނެވެ.
އީގަލްސް އިން ކޮލިފައިން ދެ ވަނަ ބުރުގެ ފުރުސަތު ހޯދީ މިދިޔަ ބުދަ ދުވަހު މާލޭގައި ބޫޓާންގެ ތިމްޕޫ ސިޓީ އަތުން 2-0 އިން މޮޅުވެގެންނެވެ. އެ ދުވަހު ކުޅުނު ކޮލިފައިންގެ އަނެއް މެޗުން ސްރީލަންކާ ޕޮލިސް އަތުން ނޭޕާލްގެ އާމީ ކްލަބް ވަނީ 5-1 އިން މޮޅުވެފަ އެވެ. ކޮލިފައިން ދެ ވަނަ މެޗުގައި އާމީ ކްލަބް ބުދަ ދުވަހު ކުޅޭނީ އިންޑިއާގެ ބެންގަލޫރުއާ އެވެ.
ޝެޑިއުލަށް މި އައި ބަދަލާ އެކު ކޮލިފައިން ދެ ވަނަ މެޗުން މޮޅުވާ ދެ ޓީމު ބައްދަލުކުރާ ޕްލޭއޮފް މެޗު ބާއްވަން އޭއެފްސީން ނިންމާފައިވަނީ މި މަހު 28 ވަނަ ދުވަހު އެވެ. އެ މެޗުން މޮޅުވާ ޓީމަކަށް އޭއެފްސީ ކަޕް ދެކުނު އޭޝިއާ އަށް ހާއްސަ ގްރޫޕްގެ ފަހު ޖާގަ ލިބޭނެ އެވެ.
އެ ގްރޫޕްގައި މި ވަގުތު އޮތީ ރާއްޖޭގެ މާޒިޔާ އާއި ބަންގްލަދޭޝްގެ ބަޝުންދުރާ ކިންގްސް އަދި އިންޑިއާގެ އޭޓީކޭ މޯހަން ބަގާން އެވެ. އެ ގްރޫޕްގެ މެޗުތައް ސެންޓްރަލައިޒްކޮށް ކުޅޭނީ ރާއްޖޭގަ އެވެ. މެޗުތައް އޮތީ އަންނަ މަހު 14 އިން 21 ގެ ނިޔަލަށެވެ.
އަބަހާނީ އަތުން މިހާތަނަށް ރާއްޖޭގެ ކްލަބެއް ބަލިވެފައިނުވެ އެވެ. ރާއްޖޭގެ ކްލަބްތަކާ ދެކޮޅަށް އަބަހާނީ އިން ޖުމްލަ ހަ މެޗެއް ކުޅެފައިވާއިރު، ހަތަރު މެޗުން ވީ ބައްޔެވެ. އަނެއް ދެ މެޗު ނިމުނީ އެއްވަރުވެގެންނެވެ.
އަބަހާނީ އިން މެޗުތައް ކުޅުނީ މާޒިޔާ އާއި ނިއު ރޭޑިއަންޓާ ދެކޮޅަށެވެ. އޭއެފްސީ ކަޕްގެ އިންޓަ ޒޯން ސެމީ ފައިނަލުގައި 2019 ވަނަ އަހަރު ކުޅުނު އަބަހާނީ އެންމެ ފުރަތަމަ އޭއެފްސީ ކަޕްގައި މާޒިޔާއާ ކުޅުނީ 2017 ވަނަ އަހަރުގެ ގްރޫޕް ސްޓޭޖުގަ އެވެ. ބަންގްލަދޭޝްގައި 2-0 އިން އަބަހާނީ ބަލިވިއިރު، މާލޭގައި ވެސް މާޒިޔާ ވަނީ އެ ނަތީޖާ އިން މޮޅުވެފަ އެވެ. އޭގެ ފަހުން 2018 ވަނަ އަހަރުގެ ގްރޫޕް ސްޓޭޖުގައި ނިއު އިން ވަނީ ރަށުންބޭރުގައި އަބަހާނީ 1-0 އިން ބަލިކޮށްފަ އެވެ. އަދި މާލޭގައި ކުޅުނު މެޗުން 5-1 އިން ނިއު ވަނީ މޮޅުވެފަ އެވެ.
މިދިޔަ އަހަރުގެ އޭއެފްސީ ކަޕްގެ ކޮލިފައިން ދެ ވަނަ ބުރުގައި މާޒިޔާ ވަނީ އަބަހާނީ ކަޓުވާލައިފަ އެވެ. ބަންގްލަދޭޝްގައި ކުޅުނު ފުރަތަމަ ލެގު 2-2 އިން އެއްވަރުވިއިރު، މާލޭގައި ކުޅުނު މެޗު ނިމުނީ 0-0 އިން އެއްވަަރުވެގެންނެވެ. މާޒިޔާ އަނެއް ބުރުން ފުރުސަތު ހޯދީ ރަށުންބޭރުގައި ޖެހި ގޯލަށް ބަލައިގެންނެވެ.
