ކެފޭއެއް ތެރޭގައި ބަޔަކު ތިން ގަޑިއިރަށް ހިފެހެއްޓި މީހަކު ހައްޔަރުކޮށްފި އެވެ.
މި މައްސަލައާ ގުޅިގެން ހައްޔަރުކުރީ ގއ. މާމެންދޫ، އިފަން، އިފްހާމް އަހްމަދު، 19، އެވެ. އޭނާގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން 20 ދުވަސް ވަނީ ޖަހާފަ އެވެ.
މުއްދަތު މަޖިލީހުގައި ފުލުހުންގެ އައިއޯ ބުނީ ކެފޭ ތެރޭގައި ތިބި މީހުންގެ ފޯނު ނުދީފިނަމަ ފުޅިއަކުން ޖަހާނެ ކަމަށް ބުނެ އިފްހާމް އެމީހުންނަށް ބިރު ދައްކައި، ހުއްދަ ނޫން ގޮތުގައި ތިން ގަޑިއިރު ވަންދެން ހިފެހެއްޓި ކަމަށެވެ.
މީގެއިތުރުން މީހުން ކުރިމަތީގައި އަނިޔާ ލިބުނު މީހުންގެ ގަދަރާއި އަބުރަށް އުނިކަން އަންނަ ގޮތަށް ފޯނުން ވީޑިއޯކުރި ކަމަށްވެސް އައިއޯ ކޯޓުގައި ބުންޏެވެ.
އޭނާގެ މައްޗަށް ތުހުމަތު ކުރެވޭ މިންވަރަށް ހެކި ލިބިފައިވާއިރު، އޭގެ ތެރޭގައި އަނިޔާ ލިބުނު ފަރާތުގެ ބަޔާނާއި ހެކިންގެ ބަޔާންތަކާއި އަނިޔާ ލިބުނު ފަރާތްތަކުގެ މެޑިކޯ ލީގަލް ރިޕޯޓާއި ސީސީޓީވީ ފުޓޭޖުގެ ސްނެޕް ޝޮޓްތައް ހިމެނެ އެވެ.
މި މައްސަލައިގައި އިފްހާމްގެ މައްޗަށް މާރާމާރީ ހިންގުމާއި، ބިރުދެއްކުމާއި، ޖިނާއީ މަޖުބޫރުކުރުވުން އަދި ހުއްދަ ނޫން ގޮތުގައި މީހުން ހިފެހެއްޓުމުގެ ކުށް ކުރި ކަމަށް ފުލުހުން ތުހުމަތު ކުރެ އެވެ.
އިފްހާމްގެ ވަކީލު ކޯޓުގައި ބުނީ އޭނާ ޝަރުތުކޮށް ދޫކޮށްލުމަށް އެދޭ ކަމަށެވެ. ނަމަވެސް ގާޒީ ނިންމެވީ މުޖުތަމައުގެ ސަލާމަތާއި ރައްކާތެރިކަމަށްޓަކައި އޭނާ ބަންދުކުރުމަށެވެ.
