ދުނިޔޭގެ މައި ފުޓްބޯޅަ އިދާރާ، ފީފާގެ އެހީއާ އެކު ބޫޓާންގައި އިންޓަނޭޝަނަލް މުބާރާތެއް، "ފީފާ ހިމަލާޔާ ކަޕް"ގެ ނަމުގައި ބޭއްވުމަށް މަޝްވަރާތަކެއް ކުރިއަށްގެންގޮސްފައިވާ ކަމަށް މީޑިއާ ރިޕޯޓްތައް ބުނެފި އެވެ.
މި މަޝްވަރާތައް ކުރިއަށްގެންގޮސްފައިވަނީ، ފީފާގެ ރައީސް ޖިއާނީ އިންފަންޓީނޯ، ބޫޓާނަށް ކުރައްވާ ރަސްމީ ދަތުރުފުޅުގެ ތެރެއިންނެވެ. މިދިޔަ 10 ވަރަކަށް އަހަރަށް ބަލާއިރު، ފުޓްބޯޅައިގައި ގިނަ ކުރިއެރުންތަކެއް ހޯދާފައިވާ ބޫޓާނަށް އިތުރު ފުރުސަތުތައް ހޯދައިދޭން ފީފާ އިން މަސައްކަތް ކުރާނެ ކަމުގެ ޔަގީންކަން އިންފަންޓީނޯ ވަނީ ދެއްވައިފަ އެވެ.
ބޫޓާންގެ ފުޓްބޯޅަ އެސޯސިއޭޝަނުން ޕްރޮޕޯސަލް ފީފާ އަށް ހުށަހެޅީ ފީފާގެ މާލީ އެހީތެރިކަމާ އެކު، އެ ގައުމުގައި އިންޓަނޭޝަނަލް ފުޓްބޯޅަ މުބާރާތެއް ބޭއްވުމަށެވެ. އަދި، ބޫޓާނުން އެ އިންޓަނޭޝަނަލް މުބާރާތް ކުރިއަށްގެންދާއިރު، މައިގަނޑު ގޮތެއްގައި ފުރުސަތު ފަހިކޮށްދޭން ބޭނުންވަނީ ދެކުނު އޭޝިއާގެ ގައުމުތަކަށެވެ.
"ފީފާ ހިމަލާޔާ ކަޕް" ކުރިއަށް ގެންދިއުމަށް ފީފާގެ އެހީތެރިކަން ޔަގީންވާ ހިސާބުން އެ މުބާރާތު ގައި ވާދަކުރުމުގެ ފުރުސަތު ރާއްޖެ ހިމެނޭހެން ދެކުނު އޭޝިއާގެ ހުރިހާ ގައުމަކަށް ފޮނުވަން ބޫޓާނުން ވަނީ ނިންމައިފަ އެވެ. އަދި، މި މުބާރާތް އަންނަ އަހަރު ބާއްވަން ބޫޓާނުން ބޭނުންވެ އެވެ.
ބޫޓާންގައި މި ދުވަސްވަރު އަންނަނީ، އޭއެފްސީ ޗެލެންޖް ލީގުގެ އެއް ގްރޫޕްގެ މެޗުތައް ސެންޓްރަލައިޒްކޮށް ކުރިއަށްގެންދަމުންނެވެ. އަދި، ބޫޓާންގައި ވަނީ ދެކުނު އޭޝިއާގެ ގައުމުތަކުގެ މެދުގައި ކުޅޭ އުމުރުފުރާގެ އެކިއެކި ސާފް މުބާރާތްތައް ހޯސްޓްކޮށްފަ އެވެ. އެކަމަކު، މިހާތަނަށް ބޮޑު މުބާރާތެއް ހޯސްޓްކުރުމުގައި ބޫޓާނަށް އަދި ކުރިއެރުމެއް ނުލިބޭތީވެ، އެ ގައުމުން ފީފާގެ އެހީތެރިކަމަށް އެދުނީ އެވެ.
ދެކުނު އޭޝިއާގެ ގައުމުތަކުގެ މެދުގައި މި ވަގުތު ކުޅޭ އެންމެ ބޮޑު ފުޓްބޯޅަ މުބާރާތް، ސާފް ޗެމްޕިއަންޝިޕްގެ 15 ވަނަ މުބާރާތް އަންނަ މަހު ބަންގްލަދޭޝްގެ ޑާކާގައި އަންނަ މަހު އޮންނާނެ އެވެ. އެ މުބާރާތް ވެސް ފީފާގެ އެންޑޯޒްމަންޓާ އެކު ކުރިއަށްގެންދިއުމަށް ސައުތު އޭޝިއަން ފުޓްބޯލް ފެޑެރޭޝަން (ސާފް) އިން ވަނީ މަޝްވަރާތައް ފަށައިފަ އެވެ.
