ރައީސް މުހައްމަދު މުއިއްޒުގެ އެއްބަނޑު ކޮއްކޮ، އަދި ރައްޔިތުންގެ މަޖިލީހުގެ ނިލަންދޫ ދާއިރާގެ މެންބަރު ފާތިމަތު ސައުދާއަށް 2.4 މިލިއަން ރުފިޔާގެ ލޯނު ދިން މީހާ އެއީ ކާކުކަން ހާމަކުރަން ބޭނުން ނުވާ ކަމަށް ސައުދާ ބުނެފި އެވެ.
ސައުދާ އަދަދު އަށް ވިދާޅުވީ ލޯނު ދިން މީހާގެ މައުލޫމާތު މާލީ ބަޔާނުގައި ހާމަނުކުރީ އެކަން އެގޮތަށް ކުރަން މަޖުބޫރު ނުވުމުން ކަމަށާއި ލޯނު ދިން މީހާވެސް އެއީ ކާކުކަން ހާމަކުރަން ބޭނުން ނުވާ ކަމަށެވެ.
"އިންނާނެ އަމިއްލަ ފަރާތަކުންނޭ ޖަހާފައި [މާލީ ބަޔާނުގައި]. ދެން މާލީ ބަޔާނުގައި ސީދާ މީހާގެ ނަމާއި އައިޑީކާޑާއި ހުރިހާ އެއްޗެއް ހުށަހަޅާކަށް ނީނދޭ އެނގޭތޯ. އޭގައި ހާމަކުރަންޖެހޭ ވަރަށް އަޅުގަނޑު ހާމަކޮށްފައި އެއިނީ އެނގޭތޯ. އަޅުގަނޑެއް ނޫން. އަޅުގަނޑު މީހެއް އަތުން ނެގީ. އެމީހާ ބޭނުން ނުވަންޏާ އަޅުގަނޑަށް އެމީހާގެ މައުލޫމާތެއް ނުދެވޭނެތާ ދެއްތޯ،" އޭނާ ވިދާޅުވި އެވެ.
ސައުދާ މީގެކުރިން ވިދާޅުވެފައިވަނީ 2.4 މިލިއަން ރުފިޔާގެ ލޯނަކީ ވިޔަފާރިވެރިއެއް އަތުން ނެގި ސްޓޫޑަންޓް ލޯނެއް ކަމަށެވެ. އޭނާ ވިދާޅުވީ އެކަމާ ބެހޭ ހުރިހާ މައުލޫމާތެއް ބޭންކަށް ހުށަހަޅާފައިވާ ކަމަށެވެ.
ސައުދާގެ އެކައުންޓަށް މިލިއަނުން ފައިސާ ޖަމާވުމުން އެކަން މޯލްޑިވްސް މަނިޓަރީ އޮތޯރިޓީ (އެމްއެމްއޭ) އަށް ފްލެގްވި އެވެ. އެކަން އެންޓި ކޮރަޕްޝަން ކޮމިޝަން (އޭސީސީ) އިން ބެލި ކަމެއް ނޭނގެ އެވެ.
މި އަހަރާއި މިދިޔަ އަހަރު ސައުދާ މަޖިލީހަށް ހުށަހެޅި މާލީ ބަޔާނުން އެނގޭ ގޮތުގައި އަހަރެއްގެ ތެރޭގައި 990،000ރ. އޭނާއަށް މުސާރައިގެ ގޮތުގައި ވަނީ ލިބިފަ އެވެ. އޭނާގެ އެކައުންޓްތަކުގައި މި އަހަރު މާލީ ބަޔާން ހުށަހެޅިއިރު ހުރީ 11،697ރ. އާއި 119.61 ޑޮލަރެވެ.
