މޯލްޑިވްސް އެއާޕޯޓްސް ކޮމްޕެނީ ޕްރައިވެޓް ލިމިޓެޑް (އެމްއޭސީއެލް) ގެ މުވައްޒަފުންނަށް ކޮންމެ އަހަރަކު ދެމުންގެންދާ އަހަރީ ބޯނަސް ދޭނެ ދުވަހެއް ހޯދުމަށް އެ ކުންފުނީގައި ސުވާލުކުރުމުން އެ ސުވާލަށް ޖަވާބު ދިނުމަށް ދެކޮޅު ހަދައިފި އެވެ.
އާންމުގޮތެއްގައި އޮގަސްޓް މަހު ޖަމާވާ އެމްއޭސީއެލްގެ އަހަރީ ބޯނަސް މިހާތަނަށް މުވައްޒަފުންނަށް ޖަމާކޮށްފައެއް ނުވެ އެވެ. އެކަމާ ގުޅޭގޮތުން އަދަދު އިން ސުވާލުކުރުމުން އެމްއޭސީއެލް އިން މިހާތަނަށް އެއްވެސް އެއްޗެއް ބުނެފައެއް ނުވެ އެވެ.
މިދިޔަ އަހަރު އެމްއޭސީއެލްގެ މުވައްޒަފުންގެ ބޯނަސް ފައިސާ ހިފަހައްޓައިގެން އުޅުމަށްފަހު ޖަމާކުރީ ސެޕްޓެމްބަރު މަސް ނިމި، އޮކްޓޯބަރު މަސް ތެރޭގަ އެވެ. އެފަހަރު ބޯނަސް ފައިސާ ހިފެހެއްޓުމުން މުވައްޒަފުން އެކަމާ ގުޅިގެން ނުރުހުން ފާޅުކުރި އެވެ.
މިދިޔަ އަހަރު އެމްއޭސީއެލްގެ މުވައްޒަފުންނަށް ޖަމާކުރަނީ 25،000ރ. އެވެ. އެއީ އެ ކުންފުނީގެ ކޮންމެ މުވައްޒަފަކަށް ބޯނަހުގެ ގޮތުގައި އެ އަދަދު ޖެހިޖެހިގެން ދިން ހަތަރުވަނަ އަހަރެވެ.
އެމްއޭސީއެލްއަށް 2024 ވަނަ އަހަރު ސާފު ފައިދާގެ ގޮތުގައި އެއް ބިލިއަން ރުފިޔާ ލިބިފައިވެ އެވެ. ބޮޑު އަހަރީ ބޯނަހެއްގެ އިތުރުން ސަރުކާރު ކުންފުނިތަކުގެ ތެރެއިން ޑޮލަރުން މުސާރަ ދެމުންދިޔަ ހަމައެކަނި ކުންފުންޏަކީވެސް އެމްއޭސީއެލް އެވެ.
އެމްއޭސީއެލް ހިމެނޭގޮތަށް ސަރުކާރުގެ ކުންފުނިތަކުގެ ހަރަދުތައް ކުޑަކުރަން ސަރުކާރުން ވަނީ ނިންމާފަ އެވެ. އެގޮތުން ކުންފުނިތަކުން ގިނަ އަދަދެއްގެ މުވައްޒަފުން ދަނީ ވަކިކުރަމުންނެވެ. ނަމަވެސް ކުންފުނިތަކަށް ނަގާ މުވައްޒަފުންގެ އަދަދެއް މަދު ނުވާއިރު، ވަކިކުރަމުންދަނީ އިދިކޮޅު އެމްޑީޕީއަށް ނިސްބަތްވާ މުވައްޒަފުން ކަމަށް އެ ޕާޓީން ބުނެ އެވެ.
