ރަށްތަކާއި ސިޓީ ކައުންސިލުތަކުގެ އިހުތިސޯސުގެ ތެރޭގައި ހިމެނޭ ބިންތައް ސަރުކާރަށް ބޭނުން އިރެއްގައި ނެގޭ ގޮތަށް ލާމަރުކަޒީ ގާނޫނަށް ގެނައި ބަދަލަކީ މަރުކަޒީ ސަރުކާރަށް ބަރޯސާކުރުވުމަށް ހިންގި ހުދުމުހުތާރު އަމަަލެއް ކަމަށް މޯލްޑިވްސް ލޯކަލް ކައުންސިލްސް އެސޯސިއޭޝަނުން ބުނެފި އެވެ.
ގާނޫނު ބަދަލުކޮށްފައި ވަނީ ސަރުކާރުގެ މަޝްރޫއުތައް ހިންގުމަށް ޓަކައި ކައުންސިލެއްގެ އިހުތަސާސްގެ ތެރޭގައި ހިމެނޭ ބިމެއް ނުވަތަ ތަނެއް ވަކިކުރުމަށް ވަޒީރުންގެ މަޖިލީހުން ނިންމުމަށް ފަހު، ކައުންސިލުގެ މިލްކިއްޔާތުން އެ ތަނެއް ވަކިވާނެ ކަމަށެވެ. އަދި، އެ ތަނަކީ ދައުލަތުގެ ފުރިހަމަ ބާރު ހިނގާ ބިމާއި ތަންތަނަށް ވެގެން ދާނެ އެވެ.
ރާއްޖޭގެ ރަށްރަށާއި ސިޓީ ކައުންސިލްތައް ތަމްސީލުކުރާ ކައުންސިލްސް އެސޯސިއޭޝަނުން ބުނެފައިވާ ގޮތުގައި އެއީ މައި ސަރުކާރުގެ މުށު ތެރެއަށް ބާރުތައް ލުމަށް ގެނައި ބަދަލެކެވެ. އޭގެ ސަބަބުން މުޖުތަމައުގެ ވަސީލަތްތަކާ މެދު ގޮތް ނިންމުމަށް ގާނޫނުއަސާސީން ރައްޔިތުންނަށް ދީފައިވާ ހައްގު ނިގުޅައިގަނެވޭ ކަމަށް އެ އެސޯސިއޭޝުން ވަނީ ބުނެފަ އެވެ.
"ރަށްރަށުގެ އިގުތިސޯދީ ދިރުން ކަމުގައިވާ ބިމާއި ފަޅުތައް އަތުލުމުން، ކައުންސިލްތަކުގެ އާމްދަނީ ހުއްޓި މަރުކަޒީ ސަރުކާރަށް ބަރޯސާވެ ސަލާން ޖަހާ ހާލަތަށް ދާނެ،" އެ އެސޯސިއޭޝަނުން ބުނެފައިވެ އެވެ.
ރަށްރަށުގެ ފިޒިކަލް ޑިވެލޮޕްމަންޓު ޕްލޭން ފާސްކުރުމުގެ ކުރިން ވެސް ސަރުކާރުން ތަރައްގީގެ މަޝްރޫއުއެއް ހިންގަން ބިމެއް ހޯދަން އެދޭ ހާލަތްތަކުގައި އެ ބިން މިހާރު މައި ސަރުކާރާ ހަވާލުކުރަން ޖެހެ އެވެ.
އެ ބަދަލުތަކާ ދެކޮޅު ހަދާ އާންމު ރައްޔިތުންނާއި އިދިކޮޅު ފަރާތްތަކުން މި ބިލަށް ނަން ދީފައި ވަނީ "ބިން ފޭރޭ ބިލު" ގެ ނަމުންނެވެ. އެ ފަރާތްތަކުން ބުނަމުންދަނީ މި ބަދަލުތަކާއެކު ލާމަރުކަޒީ ނިޒާމުގެ ބާރު އެއްކޮށް ކެނޑިގެންދާނެ ކަމަށެވެ.
