މަޝްހޫރު ރެޕް ލަވަކިޔުންތެރިޔާ ޓޫޕާކް ޝަކުރާ މަރާލުމުގެ މޭސްތިރިއެއްގެ ގޮތުގައި ހަރަކާތްތެރިވި ކުރީގެ ގޭންގު ލީޑަރެއް ކަމަށްވާ ޑުއޭން "ކެފީ ޑީ" ޑޭވިސްގެ މައްޗަށް ކުށް ސާބިތުވާ ކަމަށް ކޯޓުން ނިންމައިފި އެވެ.
މިއީ މީގެ ގާތްގަނޑަކަށް 30 އަހަރު ކުރިން ހިނގި މި ހާދިސާއާ ގުޅިގެން މީހެއްގެ މައްޗަށް ކުށް ސާބިތުވި ފުރަތަމަ ފަހަރެވެ.
ސެޕްޓެމްބަރު 7، 1996 ގައި ލަސްވޭގަސްގައި ދުއްވާފައި ދިޔަ ކާރެއްގެ ތެރެއިން ބަޑިޖަހައި ޓޫޕާކް މަރާލި މައްސަލައިގައި، ނުރައްކާތެރި ހަތިޔާރެއް ބޭނުންކޮށްގެން މީހަކު މަރާލުމުގެ ދައުވާ ޑޭވިސްގެ މައްޗަށް ސާބިތުވާ ކަމަށް ޖޫރީން ވަނީ ކަނޑައަޅާފަ އެވެ.
ކަޅު ކުލައިގެ ސޫޓެއްގައި ހުރި އުމުރުން 63 އަހަރުގެ ޑޭވިސް، ލަސްވޭގަސްގެ ކޯޓުގައި ހުކުމް އިއްވި ފަހުން ބުނީ އެ މައްސަލަ އިސްތިއުނާފު ކުރާނެ ކަމަށެވެ.
ޝަރީއަތުގެ މަރުހަލާގައި، 2008 ވަނަ އަހަރު ފުލުހުން ޑޭވިސްއާ ކުރި އިންޓަވިއުއެއްގެ ރެކޯޑިން ކޯޓަށް ވަނީ ހުށަހަޅާފަ އެވެ. އެ އިންޓަވިއުގައި ޑޭވިސް ބުނެފައިވަނީ ޓޫޕާކަށް ހަމަލާދިން ވަގުތު އޭނާ އިނީ ބަޑިޖެހި ކާރުގެ ތެރޭގައި ކަމަށާއި، ނަމަވެސް ޓޫޕާކް މަރުވި ވަޒަންތައް ފޮނުވާލީ އޭނާ ނޫން ކަމަށެވެ.
ދައުލަތުގެ ވަކީލުން ބުނި ގޮތުގައި، "ސައުތު ސައިޑް ކޮމްޕްޓަން ކްރިޕްސް" ނަމަކަށް ކިޔާ ގޭންގުގެ ކުރީގެ ލީޑަރު ޑޭވިސް އަމިއްލައަށް ބަޑި ނުޖެހި ނަމަވެސް، އެ ހަމަލާދިނުމަށް އަމުރުކުރީ އޭނާ އެވެ. އަދި އޭނާގެ ކޮއްކޮ އޯލަންޑޯ އެންޑަސަން ބަޑިޖެހުމަށް ބޭނުންކުރި ހަތިޔާރު ފޯރުކޮށްދިނީ ވެސް ޑޭވިސް ކަމަށް ވަކީލުން ބުންޏެވެ.
ޓޫޕާކް މަރާލުމުގައި ބައިވެރިވި ކަމަށް އިންކާރު ކުރި އެންޑަސަން ވަނީ، 1998 ވަނަ އަހަރު ހިނގި އެހެން ބަޑިޖެހުމެއްގެ ހާދިސާއެއްގައި މަރުވެފަ އެވެ.
މިދިޔަ ހޯމަ ދުވަހު ކޯޓުން ހުކުމް އިއްވަމުން ދިޔަ ވަގުތު، ޓޫޕާކްގެ އާއިލާގެ މެންބަރުން ތިބީ އެކަކު އަނެކަކުގެ އަތުގައި ހިފަހައްޓައިގެންނެވެ. އަދި ބައެއް މީހުން ރޮމުން އެކަކު އަނެކަކުގެ ގައިގައި ބައްދައި ހެދި އެވެ.
ޓޫޕާކް ޝަކުރާ މަރާލިއިރު އޭނާގެ އުމުރަކީ 25 އަހަރެވެ. ރެޕް މިއުޒިކްގެ ދުނިޔޭގައި އެންމެ ނުފޫޒުގަދަ އެއް ފަންނާނުގެ ގޮތުގައި ފާހަގަކުރެވުނު ޓޫޕާކްގެ 75 މިލިއަނަށްވުރެ ގިނަ ރެކޯޑް މުޅި ދުނިޔޭގައި ވަނީ ވިކިފަ އެވެ.
