މަލްވެއިރާ، ޕޯޗުގަލް (އޮގަސްޓް 23) - ޕޯޗުގަލްގައި ކުރިއަށްދިޔަ އެކުވެރިކަމުގެ މެޗެއްގެ ތެރެއިން ދިމާވި ސިއްހީ ހާލަތެއްގައި، ޕޯޗުގަލް އަށް އުފަން 25 އަހަރުގެ ކުއޭވިން ކާސްޓްރޯ މަރުވެއްޖެ އެވެ.
ޕޯޗުގަލްގެ ރިއަލް ސްޕޯޓް ކްލަބް އަށް ކުޅެމުން އަންނަ ކާސްޓްރޯ އަށް ސިއްހީ ހާލަތެއް ދިމާވީ އެ ޓީމުން އެކުވެރިކަމުގެ މެޗެއްގައި އެސްޓްރެލާ ޑި އަމަޑޯރާއާ ދެކޮޅަށް ކުޅެނިކޮށެވެ. ދަނޑުމައްޗަށް ހޭނެތިގެން ވެއްޓުމާ އެކު، އިރުކޮޅެއްގެ ތެރޭގައި، ކައިރި ހޮސްޕިޓަލަކަށް އޭނާ ގެންދިޔަ އެވެ.
ޕޯޗުގީސް މީޑިއާ ރިޕޯޓްތައް ބުނާގޮތުން، ކާސްޓްރޯ މަރުވެފައިވަނީ، ހޮސްޕިޓަލްގައި ފަރުވާދެމުން ދަނިކޮށެވެ. ކާސްޓްރޯ އަށް ދިމާވި ކަންކަމާ ގުޅޭގޮތުން، ރިޕޯޓެއް ތައްޔާރުކުރަން ޕޯޗުގަލްގެ ފުޓްބޯޅަ ފެޑެރޭޝަނުން ވަނީ އޭނާ ކުޅެމުން އައި ރިއަލް ސްޕޯޓްސް ކްލަބް އަށް އަންގައިފަ އެވެ.
ކާސްޓްރޯ އުފަންވީ ޕޯޗުގަލް އަށް ކަމުގައި ވިޔަސް އޭނާގެ ފުޓްބޯޅަ ކެރިއަރު ބިނާކުރީ އިންގްލެންޑްގަ އެވެ. އެ ގޮތުން، ޅަ އުމުރުގައި އިންގްލެންޑަށް ބަދަލުވެ، އިނގިރޭސި ދަށް ޑިވިޝަނުގެ ގިނަ ޓީމުތަކަކަށް ކުޅުނު ފަހުން، އޭނާ އަށް ފުރުސަތު ލިބުނީ، އިނގިރޭސި ދެ ވަނަ ޑިވިޝަނުގެ ކްލަބް، ވެސްޓް ބްރޮމްވިޗް އަލްބިއަން އިންނެވެ. އެ ޓީމުގައި ތިން އަހަރު ހޭދަކުރި ނަމަވެސް ފުރުސަތު ލިބުނީ އެންމެ ތިން މެޗުގައި ކުޅޭށެވެ. އެ މުއްދަތުގައި އޭނާ ލޯން އުސޫލުން ގިނަ ޓީމުތަކަކަށް ކުޅެފައިވެ އެވެ. އެއީ، ބާޓަން، ނޮޓް ކައުންޓީ އަދި ގޭޓްސްހެޑް އެެވެ.
މީގެ ފަސް އަހަރު ކުރިން، އިނގިރޭސި ލީގު ކަޕްގައި، ވެސްޓް ބްރޮމް އިން އާސެނަލާ ބައްދަލުކުރި މެޗުގައި ކުޅުނު ކާސްޓްރޯ ވަނީ ޔޯކް ސިޓީ، ކިންގްސް ލިން، ޗިޕެންހަމް، ކޭމްބްރިޖް ސިޓީ އަދި އީސްޓްބޯން އަަށް ވެސް ކުޅެފަ އެެވެ.
