ފިލިޕީންސްގެ ދެކުނުގެ ސިޓީއެއް ކަމަށްވާ ޒަމްބޯންގާގެ ހައިސްކޫލެއްގައި އަންގާރަ ދުވަހު ހިނގި ބަޑިޖެހުމުގެ ހާދިސާއެއްގައި ދެ ދަރިވަރުން މަރުވެއްޖެ އެވެ،
މަރުވި ދެ ކުދިންގެ ތެރޭގައި ހަމަލާދިން ދަރިވަރު ވެސް ހިމެނޭއިރު، މިއީ ފާއިތުވި ދެ މަސްދުވަހުގެ ތެރޭގައި އެ ގައުމުގައި ހިނގި މިފަދަ ދެވަނަ ހާދިސާ އެވެ.
ފުލުހުންގެ ފުރަތަމަ ރިޕޯޓްތަކުން އެނގޭ ގޮތުގައި، މި ހާދިސާ ހިނގާފައިވަނީ އަމިއްލަ ފަރާތަކުން ހިންގާ "އެޓެނިއޯ ޑި ޒަމްބޯންގާ ޔުނިވާސިޓީ" އާ ގުޅިފައިވާ ސްކޫލެއްގަ އެވެ. ހަމަލާދިން ދަރިވަރު ސްކޫލް ކެމްޕަހަށް ފިސްތޯލައަކާއި ރައިފަލެއް ހިފައިގެން ވަދެ، ކްލާސްރޫމް ތެރޭގައި ތިބި ދަރިވަރުންނަށް އަމާޒުކޮށް ވަނީ ބަޑިޖަހާފަ އެވެ.
ފުލުހުން ބުނި ގޮތުގައި ހަމަލާދީފައިވަނީ ގްރޭޑް 9 އެއްގައި ކިޔަވާ ދަރިވަރެކެވެ. އޭނާ ވަނީ ހަމަލާއަށް ފަހު އަމިއްލައަށް މަރުވެފަ އެވެ. މި ހާދިސާގައި މަރުވި އަނެއް ދަރިވަރަކީ އޭނާއަށް ވުރެ އެއް ގްރޭޑް މަތީގައި ކިޔަވާ ދަރިވަރެކެވެ.
މިދިޔަ ޖޫން މަހު ޓެކްލޯބަން ސިޓީގެ ސަރުކާރު ހައިސްކޫލެއްގައި ވެސް ވަނީ މިފަދަ ހަމަލާއެއް ދީފަ އެވެ. އެ ހާދިސާގައި ދެ ދަރިވަރަކު ސްކޫލް ތެރޭގައި ބަޑިޖެހުމުގެ ސަބަބުން މަދުވެގެން ތިން ދަރިވަރުން މަރުވެ، 20 އެއްހާ ކުދިން ޒަހަމްވި އެވެ.
ފިލިޕީންސްގައި ބަޑި ގެންގުޅުމުގެ ހުއްދަ ދިނުމުގައި ކުށުގެ ރެކޯޑް ބެލުމާއި ނަފްސާނީ ދުޅަހެޔޮކަން ދެނެގަތުން ފަދަ ހަރުކަށި ގަވާއިދުތަކެއް އޮވެ އެވެ. އެ ގައުމުގައި ގަވާއިދާ ހިލާފަށް ބަޑި ގެންގުޅޭ މިންވަރު އިތުރު ނަމަވެސް، ސްކޫލްތަކުގައި ބަޑިޖެހުމުގެ ހާދިސާތަކަކީ އާންމުކޮށް ހިނގާ ކަންކަމެއް ނޫނެވެ.
