ޓައިޕް 2 ހަކުރުބަލީގެ ފަރުވާ އާއި ބަރުދަން ލުއިކުރުމަށް ބޭނުންކުރާ "ގްލޫކަގަން-ލައިކް ޕެޕްޓައިޑް-1" (ޖީއެލްޕީ-1) ބޭސްތައް ބޭނުންކުރާ މިންވަރު އިތުރުވަމުންދާއިރު، މި ބޭސްތަކުގެ ސަބަބުން އިންސާނާގެ ސިއްހަތަށް ކުރާ އެހެނިހެން ފައިދާތައް ދިރާސާކުރަން ސައިންސްވެރިން ވަނީ ފަށާފަ އެވެ.
މީގެ ކުރިން ހަދާފައިވާ ދިރާސާތަކުން ދައްކާ ގޮތުގައި، ޖީއެލްޕީ-1 ބޭސްތަކުގެ ސަބަބުން ކިޑްނީގެ ބަލިތަކާއި، މެޓަބޮލިކް ސިންޑްރޯމް އާއި، ފުރަމޭގެ ބަލިތަކުގެ އިތުރުން ނިދާއިރު ނޭވާލާން އުނދަގޫވުން (ސްލީޕް އެޕްނިއާ) ފަދަ ބަލިތަކުގެ ނުރައްކާ ކުޑަކޮށްދެ އެވެ. މީގެ އިތުރުން އަލްޒައިމާސް ބައްޔާއި، ހިތުގެ ބަލިތަކުގެ އިތުރުން ބަނގުރާ ބޭނުންކުރުމަށް ދެވިހިފާފައިވާ މީހުންނަށް ފަރުވާ ދިނުމުގައި ވެސް މި ބޭސްތަކުގެ އެހީތެރިކަން ލިބޭކަން ވަނީ ފާހަގަކުރެވިފަ އެވެ.
މިކަމާ ގުޅޭ ގޮތުން "ދަ ބީއެމްޖޭ" ޖާނަލްގައި ދާދި ފަހުން ޝާއިއުކުރި އާ ދިރާސާއަކުން ވަނީ ޖީއެލްޕީ-1 ބޭސްތަކާއި ހިތުގެ ދުޅަހެޔޮކަމާ ދެމެދު އޮތް ގުޅުން އިތުރަށް ކަށަވަރުކޮށްދީފަ އެވެ.
ދިރާސާވެރިން ހާމަކުރި ގޮތުގައި، "މައުންޖާރޯ" އަދި "ޒެޕްބައުންޑް" ފަދަ ބޭސްތަކުގައި ހިމެނޭ މައިގަނޑު މާއްދާއެއް ކަމަށްވާ "ޓާޒެޕަޓައިޑް"، ހަކުރުބައްޔާއި ހިތުގެ ބަލި ހުންނަ މީހުންގެ އާންމު ފަރުވާގެ ތެރޭގައި ހިމެނުމުން، ސްޓްރޯކް ޖެހުމާއި ހާޓް އެޓޭކް ފަދަ ހިތުގެ ނުރައްކާތެރި ހާދިސާތައް ދިމާވުމުގެ ފުރުސަތު ކުޑަކޮށްދެ އެވެ.
މި ދިރާސާގައި ސައިންސްވެރިން ވަނީ ޓައިޕް 2 ހަކުރުބައްޔާއި ހިތުގެ ބަލި ތަހައްމަލު ކުރަމުންދާ ގާތްގަނޑަކަށް 53،000 މީހުންގެ ކްލިނިކަލް މައުލޫމާތު ދިރާސާކޮށްފަ އެވެ.
މި ދިރާސާގައި ބައިވެރިވި މީހުން ދެ ގްރޫޕަކަށް ބަހާލެވުނެވެ. އޭގެ ތެރެއިން އެއް ގްރޫޕަކަށް "ޓާޒެޕަޓައިޑް" ބޭނުންކުރަން ފެށިއިރު، ދެވަނަ ގްރޫޕުން ބޭނުންކުރީ ހަކުރުބައްޔަށް އާންމުކޮށްދޭ ބޭހެއް ކަމަށްވާ "ސިޓަގްލިޕްޓިން" އެވެ. މި ދިރާސާގެ މައިގަނޑު ބޭނުމަކީ ހާޓް އެޓޭކާއި، ސްޓްރޯކް އަދި އެކި ސަބަބުތަކާ ހުރެ މަރުވުން ފަދަ ހިތުގެ ނުރައްކާތެރި ހާދިސާތައް މަދުވާ މިންވަރު ދެނެގަތުމެވެ.
މި ދިރާސާގެ އިސް މުސައްނިފު، ބޮސްޓަންގެ ބްރިގަމް އެންޑް ވިމެންސް ހޮސްޕިޓަލުގެ ފިޒިޝަން ޑޭޓާ ސައިންޓިސްޓް ޑރ. ނިލްސް ކްރޫގާ "މެޑިކަލް ނިއުސް ޓުޑޭ" އަށް މައުލޫމާތު ދެއްވަމުން ވިދާޅުވީ، ޖީއެލްޕީ-1 ބޭސްތަކަކީ ފުރަތަމަ ހަކުރު ކޮންޓްރޯލް ކުރުމަށް އުފެއްދި ބޭސްތަކެއް ނަމަވެސް، އޭގެ ފައިދާ ހަމައެކަނި ހަކުރާއި ބަރުދަން ލުއިކުރުމަށްވުރެ މާ ފުޅާ ދާއިރާއެއްގައި ކުރާ ކަމަށެވެ.
ދުނިޔޭގެ ނިސްބަތުން ބަލިތަކާއި މަރުގެ އެންމެ ބޮޑު ސަބަބަކީ ހިތުގެ ބަލިތައް ކަމަށްވާތީ، މި ބޭސްތަކުގެ ސަބަބުން ހާޓް އެޓޭކާއި، ސްޓްރޯކް އަދި ހާޓް ފެއިލިއާ ފަދަ ކަންކަން މަދުކުރެވޭތޯ ބެލުމަކީ ވަރަށް މުހިންމު ކަމެއް ކަމަށް ޑރ. ކްރޫގާ އިތުރަށް ފާހަގަކުރެއްވި އެވެ.
އޭނާ ވިދާޅުވި ގޮތުގައި، މިފަދަ ފުޅާ ދާއިރާއެއްގައި ކުރެވޭ ދިރާސާތަކުގެ ސަބަބުން، ޑޮކްޓަރުންނާއި ބަލިމީހުން ފަރުވާގެ ނިންމުންތައް ނިންމާއިރު ހަމައެކަނި ހަކުރު ކޮންޓްރޯލް ކުރުމަށް ބެލުމުގެ ބަދަލުގައި، އެ ބޭހަކުން ލިބިދާނެ އެހެނިހެން ފައިދާތަކާއި ނުރައްކާތަކަށް ރިއާޔަތްކުރުމުގެ ފުރުސަތު ލިބިގެންދާނެ އެވެ.
ދިރާސާ ނިމުނުއިރު ސައިންސްވެރިންނަށް ފާހަގަކުރެވުނު ގޮތުގައި، އެއް އަހަރު ދުވަހުގެ ފަހުން "ޓާޒެޕަޓައިޑް" ބޭނުންކުރި މީހުންގެ ތެރެއިން ހިތުގެ ނުރައްކާތެރި ހާދިސާތައް ދިމާވުމުގެ ފުރުސަތު އޮތީ 2.9 އިންސައްތައިގަ އެވެ. ނަމަވެސް "ސިޓަގްލިޕްޓިން" ބޭނުންކުރި މީހުންގެ މެދުގައި މި ނިސްބަތް ހުރީ 4.4 އިންސައްތައިގަ އެވެ.
މީގެ އިތުރުން، "ސިޓަގްލިޕްޓިން" ބޭނުންކުރާ މީހުންނާ އަޅާބަލާއިރު، "ޓާޒެޕަޓައިޑް" ބޭނުންކުރުމުން ހާޓް އެޓޭކް ޖެހުމުގެ ފުރުސަތު 33 އިންސައްތަ ދަށްކޮށްދޭކަން ދިރާސާއިން ވަނީ ހާމަވެފަ އެވެ.
