އެހެން މީހުންގެ މަސައްކަތްތައް ކޮޕީކުރުމުގެ ތުހުމަތުތަކެއް އަމާޒުވެފައިވާ ކޭމްބްރިޖް ޔުނިވާސިޓީގެ ޕްރޮފެސަރަކު މަގާމުން އިސްތިއުފާ ދެއްވައިފި އެވެ.
ޕްރޮފެސަރު ޖޭސަން އާޑޭގެ "އެކަޑެމިކް ކޮލިފިކޭޝަންތަކާއި ޝަރަފުވެރި މަގާމުތަކާ" ގުޅޭ ގޮތުން ލިބުނު އާ މައުލޫމާތުތަކަކާ ގުޅިގެން، އޭނާގެ މައްސަލަ ތަހުގީގު ކުރަން ފަށާފައިވާ ކަމަށް އެ ޔުނިވާސިޓީން ބުދަ ދުވަހު ވަނީ ހާމަކޮށްފަ އެވެ.
ކޭމްބްރިޖް ޔުނިވާސިޓީގެ ތާރީހުގައި ވެސް އެންމެ ޒުވާން އުމުރުގައި ޕްރޮފެސަރުކަން ހޯއްދެވި ކަޅު ނަސްލުގެ ބޭފުޅާގެ ޝަރަފު 2023 ވަނަ އަހަރު ހޯއްދެވި އާޑޭ ވަނީ، އޭނާގެ މަސައްކަތްތަކުގައި ކުށްތަކެއް ހުރި ކަމަށް އިއުތިރާފުވެފަ އެވެ. ނަމަވެސް، އޭނާއަކީ "ދޮގުވެރިއެއް" ނޫން ކަމަށާއި، އޭނާއަށް އަމާޒުވަމުންދަނީ އާންމުންގެ ހަރުކަށި ފާޑުކިޔުންތަކާއި އަމިއްލަ ޒާތަށް އަމާޒުކޮށްދޭ ހަމަލާތަކެއް ކަމަށް އޭނާ ވިދާޅުވި އެވެ.
އާޑޭ އިސްތިއުފާ ދެއްވާފައި މިވަނީ، އޭނާ ހާސިލްކޮށްފައިވާ ބައެއް ކާމިޔާބީތަކާ މެދު ސުވާލު އުފައްދައި، އޭނާގެ ޕީއެޗްޑީ ތީސީސްގައި ޕްލެޖިއަރިޒަމް ހުރި ކަމަށް ތުހުމަތުކޮށް މީޑިއާތަކުން ރިޕޯޓްތަކެއް އާންމުކޮށްފައިވާ ދަނޑިވަޅެއްގަ އެވެ.
މި މައްސަލައާ ގުޅިގެން އާޑޭ ވިދާޅުވީ، މި ކަންތައްތަކަށް ނިމުމެއް ގެނެވެން އޮތް ހަމައެކަނި ގޮތަކީ މަގާމުން ދުރުވުން ކަމަށް އޭނާއަށް ގަބޫލުކުރެވޭ ކަމަށެވެ.
އާޑޭގެ މަސައްކަތްތަކުގައި ޕްލެޖިއަރިޒަމް ހުރި ކަމަށް އެންމެ ފުރަތަމަ ތުހުމަތުކުރީ އެމެރިކާގެ ރިސާޗަރެއް ކަމަށްވާ ނޭތަން ކޮފްނާސް އެވެ.
ކޮފްނާސް "ސަބްސްޓެކް" ގައި ދައުވާކޮށްފައިވާ ގޮތުގައި، އާޑޭގެ މަސައްކަތްތައް ޕްލެޖިއަރިޒަމް ދެނެގަންނަ ސޮފްޓްވެއާއަކުން ޗެކްކުރިއިރު، އޭގެ ގިނަ ބައިތަކަކީ އަސްލު މަސްދަރުތަކުން ވަރަށް ކުޑަ ބަދަލަކާއެކު ނަގާފައިވާ ބައިތަކެކެވެ. އަދި ބައެއް ފަހަރު އަސްލު ލިޔުމުގައި ހުރި ކުށްތަކާއެކު ވެސް ކޮޕީކޮށްފައިވާ ކަމަށް އޭނާ ބުންޏެވެ.
މި ތުހުމަތުތައް ފެންމަތިވުމުން ކޭމްބްރިޖް ޔުނިވާސިޓީން އެންމެ ފުރަތަމަ ބުނެފައިވަނީ، މިއީ އާޑޭގެ އަބުރު ކަތިލުމަށް ހިންގާ "ކެމްޕޭނެއް" ކަމަށެވެ.
