މައިމީހާގެ ރަހިމުގެ ތެރޭގައި އޮތް ތުއްތު ކުއްޖެއްގެ އުފެދުމުގެ އައިބެއް ރަނގަޅު ކުރުމަށްޓަކައި، މީގެ ކުރިން ދުވަހަކު ވެސް ކޮށްފައިނުވާ ފަދަ އިންގިލާބީ އޮޕަރޭޝަނެއް ޑޮކްޓަރުން ކާމިޔާބުކަމާއެކު ފުރިހަމަކޮށްފި އެވެ.
އިނގިރޭސިވިލާތުގެ ލަންޑަނަށް ނިސްބަތްވާ މޭސީ ސަވޭޖްގެ ބަނޑަށް 26 ހަފުތާގައި، އެމެރިކާގެ ޑޮކްޓަރުން ވަނީ އޭނާގެ ރަހިމުގައި ދަރިފުޅު ބާއްވައިގެން މި އޮޕަރޭޝަން ކުރިއަށް ގެންގޮސްފަ އެވެ.
މިހާރު އުމުރުން ފަސް މަސްވެފައިވާ ތިއޯ އަށް ކުރިމަތިވީ "ގެސްޓްރޯސްކައިސިސް" (gastroschisis) ކިޔާ މައްސަލައެކެވެ. މިއީ ބަނޑުގެ ފޫޅު ރަނގަޅަށް އުފެދިފައި ނުވުމުގެ ސަބަބުން، ކުއްޖާގެ ގޮހޮރު ހަށިގަނޑުން ބޭރަށް ނުކުމެފައި ހުންނަ ހާލަތެކެވެ. ނަމަވެސް، މި އޮޕަރޭޝަނަށް ފަހު ތިއޯގެ ހާލަތު މިހާރު އަންނަނީ ވަރަށް ބޮޑަށް ރަނގަޅުވަމުންނެވެ.
މި އޮޕަރޭޝަންގައި ޑޮކްޓަރުން ވަނީ މޭސީގެ ރަހިމުގެ ބައެއް ބޭރަށް ނެރުމަށްފަހު، "ކީހޯލް ސާޖަރީ" ނުވަތަ ކުޑަ ލޯވަޅެއް މެދުވެރިކޮށް ކުރާ އޮޕަރޭޝަނެއްގެ އެހީގައި، ތިއޯގެ ގޮހޮރު މަޑުމަޑުން ބަނޑުގެ އެތެރެއަށް ލައިފަ އެވެ.
ދުނިޔޭގައި އަލަށް ފެށި މި ކްލިނިކަލް ޓްރަޔަލް ނުވަތަ ތަޖުރިބާގެ ދަށުން މިފަދަ އޮޕަރޭޝަނެއް ކުރި ތިންވަނަ ކުއްޖަކީ ތިއޯ އެވެ.
މުދައްރިސުންގެ ގޮތުގައި މަސައްކަތްކުރާ ތިއޯގެ މަންމަ، އުމުރުން 29 އަހަރުގެ މޭސީ އާއި ބައްޕަ، އުމުރުން 36 އަހަރުގެ ޖޯޝް ފްރެންޗް ބުނި ގޮތުގައި، މި އާދަޔާ ހިލާފު އޮޕަރޭޝަން ކާމިޔާބުވުމުން އެމީހުންނަށް ވަނީ ވަރަށް ބޮޑު ހިތްހަމަޖެހުމެއް ލިބިފަ އެވެ.
ނަމަވެސް، މި އޮޕަރޭޝަން ކާމިޔާބު ނުވި ނަމަ ކަންތައްތައް ވެގެންދާނީ ވަރަށް ތަފާތު އަދި ހިތާމަވެރި ގޮތަކަށްކަން އެ ދެމަފިރިންނަށް ވެސް އެނގެ އެވެ.
އުފަންވުމުގައި ހުންނަ މި ނުރައްކާތެރި އައިބަކީ އިނގިރޭސިވިލާތުގައި ކޮންމެ އަހަރަކު އުފަންވާ ކޮންމެ 3،000 ކުދިންގެ ތެރެއިން އެކަކަށް ކުރިމަތިވާ ހާލަތެކެވެ. މީގެ ހާކަތު އެންމެ ރަނގަޅު ކުދިން ވެސް، އުފަންވުމަށްފަހު އެތައް ހަފުތާއެއް ވަންދެން އައިސީޔޫގައި ފަރުވާ ހޯދަންޖެހެ އެވެ. އަދި ހޮޅި ނުވަތަ އައިވީ މެދުވެރިކޮށް ކާނާ ދިނުމާއި، އައިބު ރަނގަޅު ކުރުމަށް އިތުރު އޮޕަރޭޝަންތައް ކުރަން ޖެހެ އެވެ.
ތިއޯގެ ހާލަތު ހުރި ގޮތަށް، އެންމެ ނުރައްކާތެރި ހާލަތްތަކުގައި، ތުއްތު ކުދިން ހަ މަސް ދުވަހާ ހަމައަށް އައިސީޔޫގައި ބާއްވަން ޖެހެ އެވެ. މީގެ އިތުރުން ގިނަ އޮޕަރޭޝަންތަކެއް ކުރުމާއި، ދެ އަހަރު ދުވަހުގެ މުއްދަތަށް އައިވީ މެދުވެރިކޮށް ކާނާ ދިނުމުގެ އިތުރުން، ބައެއް ފަހަރު ގޮހޮރު ބަދަލުކުރުމުގެ އޮޕަރޭޝަނެއް ވެސް ކުރަން ޖެހިދާނެ އެވެ.
އެންމެ މަތީ ފެންވަރުގެ ސިއްހީ ފަރުވާ ލިބުނު ކަމުގައި ވިޔަސް، ކޮންމެ 10 ކުއްޖަކުން އެކަކު މަރުވެ އެވެ.
