މަގުމައްޗަށް ނުކުމެ، ސަރުކާރު ހަމަ މަގަށް އެޅުވުމުގެ މަސައްކަތަށް ތައްޔާރުވަމުން އަންނަ ކަމަށް މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ ޗެއާޕާސަން ރައީސް މުހައްމަދު ނަޝީދު ވިދާޅުވެއްޖެ އެވެ.
ބުދަ ދުވަހުގެ ރޭ ޗާންދަނީ މަގުގައި ހުންނަ ދަނޑިކޮށީ ހަރުގޭގައި ބޭއްވި ޖަލްސާގައި ވާހަކަ ދައްކަމުން ނަޝީދު ވަނީ މަގުމައްޗަށް ނުކުތުމަށް ތައްޔާރަށް ހުންނެވި ކަމަށް ވިދާޅުވެފަ އެވެ. އެ މަސައްކަތުގައި ރައްޔިތުން ބައިވެރިވާނެ ކަމުގެ ފުރިހަމަ ޔަގީންކަން އޮންނެވި ކަމަށް ނަޝީދު ވިދާޅުވި އެވެ.
"ވަރަށް ގިނަ މީހުން އަހާ މަގުަމައްޗަށް ނުކުމެ މި ސަރުކާރު ހަމަ މަގަށް އެޅުވުމަށް މަސައްކަތް ކުރުމަށް، އަޅުގަނޑު މި ހުރީ ވަރަށް ތައްޔާރަށް. އަޅުގަނޑުމެން މި ދަނީ މި މަސައްކަތަށް ރާވަމުން،" ނަޝީދު ވިދާޅުވި އެވެ.
ރާއްޖޭގެ ރައްޔިތުންނަށް ކަންކަން ތަހައްމަލު ނުކުރެވޭ ހިސާބަށް ކަންކަން ދިޔުމަށް ސަރުކާރާ ދެކޮޅަށް ރައްޔިތުން ތެދުވާނެ ކަމުގެ ޔަގީންކަން އޮންނެވި ކަމަށް ނަޝީދު ވިދާޅުވި އެވެ.
"އަޅުގަނޑުމެން އެ ރައްޔިތުންނާ އެކީގައި އަބަދުވެސް ނުކުންނާނަން، އަބަދުވެސް އިރާދުކުރެއްވިއްޔާ އަޅުގަނޑުމެން އެ ރައްޔިތުންނާ އެކީގައި ތިބޭނަން، ނަޝީދު ވިދާޅުވި އެވެ.
ރައީސުލްޖުމްހޫރިއްޔާގެ މަގާމު ކުރިން އަދާ ކުރައްވާފައިވާ ބޭފުޅަކު މުޒާހައަރާކަށް ވަޑައިގަންނަވާ ނަމަ އެ ވަގުތަކަށް ސެކިއުރިޓީ ކަނޑާލަން ދާދިފަހުން މަޖިލީހުގެ 241 ކޮމިޓީން ވަނީ ނިންމާފަ އެވެ. ސެކިއުރިޓީ ކަނޑާލިޔަސް މުޒާހަރާއަށް ނުކުންނަވާނެ ކަމުގެ ޔަގީންކަން ނަޝީދު އޮތީ ދެއްވާފަ އެވެ.
