އދ. ދިގުރަށް ކައިރިއަށް ފެހުރިހި ބަލަން ގޮސް އުޅެނިކޮށް ދޯންޏެއްގެ ބުރަފަތީގައި ޖެހި މަރުވީ ސިންގަޕޫރުގެ ދަރިވަރަށް އިހުމާލުވީ ކަމަށް ބުނެ އެ ކުއްޖާ ކިޔަވަމުންދިޔަ ސްކޫލާ ދެކޮޅަށް ދައުވާކުރަން އޭނާގެ އާއިލާއިން ނިންމައިފި އެވެ.
ޖެނާ ޗާން ނަމަކަށް ކިޔާ އެ ކުއްޖާ މަރުވީ ހާދިސާ ހިނގީ ނޮވެމްބަރު 8، 2024 ގައި އެވެ. މި ހާދިސާއާ ގުޅިގެން އޭރު މައުލޫމާތު ލިބުނީ އެ ކުއްޖާ މަރުވީ ދޯނީގެ ބުރަފަތީގައި ޖެހި ލިބުނު ޒަހަމްތަކާ ގުޅިގެން ލޭ ހުސްވެގެން ކަމަށެވެ. މަރުވީއިރު ޖެނާގެ އުމުރަކީ 15 އަހަރެވެ.
ސިންގަޕޫރުގެ ޗެނަލް ނިއުސް އޭޝިއާގައި ރިޕޯޓުކޮށްފައިވާ ގޮތުގައި، އެ ކުއްޖާ އޭރު ކިޔަވަމުން ދިޔައީ ސެއިންޓް ޖޯސެފްސް އިންސްޓިޓިއުޝަން އިންޓަނޭޝަނަލްގައި އެވެ. އަދި، ފެހުރިހި ބަލައިލުމުގެ ދަތުރު އިންތިޒާމުކުރީ، ފެހުރިހި ދިރާސާކުރާ ރާއްޖޭގައި ރަޖިސްޓްރީކޮށްފައިވާ އިނގިރޭސިވިލާތުގެ އަމިއްލަ ޖަމިއްޔާއެއް ކަމުގައިވާ، މޯލްޑިވްސް ވޭލް ޝާލް ރިސާޗު ޕްރޮގްރާމުންނެވެ.
ޖެނާގެ އާއިލާއިން ހުށަހެޅި ދައުވާގައި ބުނެފައިވަނީ ޖެނާ މަރުވީ ދާން މަޖުބޫރު ސްކޫލު ދަތުރެއްގައި ސްކޫލުގެ ބެލުމުގައި ދަށުގައި ބަހައްޓާފައި ހުއްޓާ ކަމަށެވެ. މި ދަތުރަކީ އެ ސްކޫލުގެ އައުޓްޑޯ ޕްރޮގްރާމުގެ ބައެކެވެ. އަދި، އަނެއް ގްރޭޑަށް ދާން މި ޕްރޮގްރާމުން ފާސް ވާން ޖެހެ އެވެ.
ޖެނާގެ އާއިލާއިން މައްސަލައަކަށް ނެގީ މި ދަތުރު ދާން އެ ކުއްޖާގެ ބެލެނިވެރިކަމުގެ ޒިންމާ ސްކޫލާ ހަވާލުކޮށްފައި ވަނިކޮށް އެ ޒިންމާ ތިން ވަނަ ފަރާތަަކާ ހަވާލުކުރި ކުރުމެވެ.
މި މައްސަލައިގައި ޖެނާގެ ސްކޫލާ ދެކޮޅަށް ދައުވާކުރީ، އެ އާއިލާއިން ބުނީ، އެ މަރާ ގުޅިގެން ޖަވާބު ހޯދަން 20 މަހަށް ވުރެ ގިނަ ދުވަހު މަސައްކަތްކޮށްގެން މަސައްކަތްކޮށް ޖަވާބު ނުލިބުމުން ކަމަށެވެ. އަދި އެ މީހުންގެ މައިގަނޑު މަގުސަދަކީ "އަޅުގަނޑުމެން ކުރިމަތިލާން ޖެހުނު ތަޖުރިބާ އެހެން އެއްވެސް އާއިލާއަކަށް ދާން ނުޖެހޭނެ ކަމުގެ ތަސައްލީ އާއި ޔަގީންކަން" ލިބުން ކަމަށް ވެސް ބުންޏެވެ.
ޖެނާގެ އާއިލާއިން މި މައްސަލައިގައި އެ ސްކޫލާ ދެކޮޅަށް ދައުވާ ކުރަނީ ކޮން ކަހަލަ ބަދަލެއް ހޯދަން ކަމެއް އަދި ނޭނގެ އެވެ. އެކަމަކު ހައިކޯޓުން ބަލަނީ 250،000 ސިންގަޕޫރު ޑޮލަރަށް ވުރެ ބޮޑު ބަދަލެއް ހޯދަން އެދޭ މައްސަަލަތަކުގައި ކަމަށް މީޑިއާ ރިޕޯޓުތަކުގައި ބުނެފައިވެ އެވެ.
މި މައްސަލައިގައި މި ދަތުރު ހިންގި ވޭލް ޝާކް ރިސާޗު ޕްރޮގްރާމު ނޫނީ އެ ދަތުރު އިންތިޒާމުކުރުމުގައި ބައިވެރިވީ ބަޔަކާ ދެކޮޅަށް ފިޔަވަޅެއް އެޅި ކަމެއް ނުވަތަ ނޫން ކަމެއް ނޭނގެ އެވެ.
ސްނޯކްލިންއަށާއި ފީނަން އުޅޭ ޓޫރިސްޓުން ބުރަފަތީގައި ޖެހުމުގެ ހާދިސާތަކަކީ މަދުން ނަމަވެސް ރާއްޖޭގައި މި ފަހުން ހިނގާފައިވާ ހާދިސާތަކެކެވެ. ޖެނާ މަރުވީ ހާދިސާ ހިނގި ފަހުން މިދިޔަ އަހަރުގެ ތެރޭގައި ވެސް ބުރަފައްޗެއްގައި ޖެހި ޖަރުމަނު ޓޫރިސްޓަކު ވަނީ މަރުވެފަ އެވެ.
މި ދެ ހާދިސާ ހިނގި ފަހުން، މި ހާދިސާ ހިނގި ސަރަހައްދު ހިމެނޭ، އަރިއަތޮޅުގެ ސައުތު މެރިން ޕްރޮޓެކްޓަޑް އޭރިއާ (ސަމްޕާ) ގައި އުޅޭއިރު، ދޯނިތަކުގެ ބުރަފަތީގައި ޕްރޮޕެލާ ގާޑު އަޅަން ވަނީ މަޖުބޫރުކޮށްފަ އެވެ.
