އދ. ދިގުރަށް ކައިރި ސްނޯކަލް ކުރަން ދިޔަ ފަތުރުވެރިޔަކު ދޯންޏެއްގެ ބުރަފަތީގައި ޖެހި ލިބުނު ޒަހަމުތަކުގެ ސަބަބުން މަރުވެއްޖެ އެވެ.
އެ ރަށުން "އަދަދު" އާ ވާހަކަ ދެއްކި މީހުން ބުނި ގޮތުގައި މަރުވީ އަންހެނެކެވެ. ދޯނީގެ ބުރަފަތިން ޖެހި އޭނާގެ ހަށިގަނޑަށް ބޮޑެތި ޒަހަމްތަކެއްވި ކަމަށާއި ގިނަ އަދަދަކަށް ލޭ ފައިބާފައިވާ ކަމަށް ވެސް އެ މީހުން ބުންޏެވެ. އޭނާ މަރުވީ ލޭ ހުސްވެގެން ކަމަށް ބެލެވޭ ކަމަށް ވެސް ބައެއް މީހުން ބުންޏެވެ.
ދިގުރަށުން މައުލޫމާތު ދިން އެހެން މީހަކު ބުނި ގޮތުގައި އެ މީހާގެ ހަށިގަނޑު މިހާރު ވަނީ މާލެ ގެނެސްފަ އެވެ. ނަމަވެސް އެކަން އަދި ކަށަވަރެއް ނުކުރެވެ އެވެ.
މި ހާދިސާއާ ގުޅިގެން ފުލުހުން މިހާތަނަށް ބަހެއް ނުބުނެ އެވެ. އެހެންކަމުން މަރުވި ފަތުރުވެރިޔާގެ އެއްވެސް ތަފުސީލެއް މިހާތަނަށް ނުލިބެ އެވެ. ނަމަވެސް މި ހާދިސާއާ ގުޅިގެން ފުލުހުން ދަނީ އެ ރަށުގައި ހަރަކާތްތެރިވަމުންދާ ކަމުގެ މައުލޫމާތު ލިބެ އެވެ.
ދިގުރަށަކީ ގެސްޓްހައުސް ވިޔަފާރީގައި ވަރަށް ކުރީގައި އުޅޭ ރަށެކެވެ. އެ ރަށް މަޝްހޫރު ވެފައިވަނީ ފެހުރިހި ބެލުމަށް ގިނަ އަދަދެއްގެ ފަތުރުވެރިން ފީނަން ދާ ރަށެއްގެ ގޮތުގަ އެވެ.
