ނިއުޔޯކުގައި ހުންނަ ސަދަބީޒް އޯކްޝަން ހައުސްގައި ބޭއްވި ނީލަމެއްގައި، 67 މިލިއަން އަހަރުވީ ޓައިރަނޯސޯރަސް ރެކްސް (ޓީ-ރެކްސް) އެއްގެ ކަށިގަނޑު 50.1 މިލިއަން އެމެރިކާ ޑޮލަރަށް ވިއްކާލައިފި އެވެ.
މިއީ މިހާތަނަށް ޑައިނަސޯއެއްގެ ކަށިގަނޑު ވިއްކާލި އެންމެ ބޮޑު އަގު ކަމަށް ރެކޯޑުތަކުން ދައްކަ އެވެ.
ސަދަބީޒް އިން ހާމަކޮށްފައިވާ ގޮތުގައި، ނުރައްކާތެރި ޝިކާރަވެރިއެއްގެ ގޮތުގައި މަޝްހޫރުވެފައިވާ މި ޖަނަވާރުގެ ފޮސިލްގެ އުސްމިނުގައި 12 ފޫޓު (4 މީޓަރު) ހުރެ އެވެ. އަދި މިއީ މިހާތަނަށް ފެނިފައިވާ އެންމެ ފުރިހަމަ ފޮސިލްތަކުގެ ތެރޭގައި ހިމެނޭ އެކައްޗެވެ. އެގޮތުން މި ޑައިނަސޯގެ ކަށިތަކުގެ 60 އިންސައްތައަށް ވުރެ ބޮޑު ބައެއް ވަނީ ހޯދިފަ އެވެ.
އަންގާރަ ދުވަހު ބޭއްވި މި ނީލަމުގައި އެންމެ ބޮޑު އަގު ހުށަހަޅައިގެން މި ކަށިގަނޑު ގަތް ފަރާތަކީ ކޮބައިކަން އަދި ހާމަކޮށްފައެއް ނުވެ އެވެ.
"ގަސް" ގެ ނަމުން ނަންދީފައިވާ މި ޓީ-ރެކްސް ފެނިފައިވަނީ 2021 ވަނަ އަހަރު އެމެރިކާގެ ސައުތު ޑަކޯޓާ ސްޓޭޓްގެ އެކަހެރި ސަރަހައްދެއްގައި އޮންނަ ދަނޑަކުންނެވެ.
ސަދަބީޒްގެ ވޯލްޑްވައިޑް ހެޑް އޮފް ސައިންސް އެންޑް ނެޗުރަލް ހިސްޓްރީ، ކެސަންޑްރާ ހެޓަން ވިދާޅުވި ގޮތުގައި، މި ނަތީޖާއަކީ އެތައް އަހަރެއްގެ މަސައްކަތުން ހާސިލްކުރެވުނު ކާމިޔާބީއެކެވެ.
"ގަސް އަކީ ހަމައެކަނި އާދަޔާ ހިލާފު ހޯދުމެއް ނޫން. މިއީ ވަރަށް ފުރިހަމައަށް ކޮނެގެން ނަގައި، ލިޔެކިޔުންތައް ތައްޔާރުކޮށް، ރައްކާތެރިކަމާއެކު ބަލަހައްޓާފައިވާ ނަމޫނާއެއް،" ކެސަންޑްރާ ވިދާޅުވި އެވެ.
މިއާއެކު، 2024 ވަނަ އަހަރު ސްޓެގޯސޯރަސް އެއް ވިއްކައިގެން ގާއިމުކޮށްފައިވާ ރެކޯޑު ވަނީ މުގުރާލާފަ އެވެ. އަދި މިއީ ޑައިނަސޯއެއްގެ ކަށިގަނޑު 50 މިލިއަން ޑޮލަރަށް ވުރެ ބޮޑު އަގަކަށް ވިއްކާލި ފުރަތަމަ ފަހަރެވެ.
