ރައީސުލްޖުމްހޫރިއްޔާ މުހައްމަދު މުއިއްޒުއާ ބައްދަލުކުރަން ބޭނުންވާ ރައްޔިތުންނަށް ނަން ނޯޓު ކުރުމުގެ ފުރުސަތު ހުޅުވާލައިފި އެވެ.
ރައީސް އޮފީހުން ބުނީ އެ ފުރުސަތު މި ފަހަރު ހުޅުވާލައިފައި ވަނީ ހުޅުދޫ ދާއިރާ އާއި ހޯރަފުށި ދާއިރާގެ އިތުރުން ހުޅުމާލެ އުތުރު އަދި ހުޅުމާލެ މެދު ދާއިރާއަށް ކަމަށެވެ.
މުއިއްޒުއާ ބައްދަލުކުރަން އެދޭ ރައްޔިތުން ނަން ނޯޓު ކުރާނީ އެކަމަށް ހާއްސަ ޕޯޓަލް މެދުވެރިކޮށް ކަމަށް ވެސް ރައީސް އޮފީހުން ބުންޏެވެ. މުއިއްޒުއާ ބައްދަލުކުރަން ނަން ނޯޓު ކުރުމުގެ ސުންގަޑިއަކީ އަންނަ ބުދަ ދުވަހުގެރޭ 12:00 އެވެ.
ރާއްޖޭގެ ހުރިހާ ދާއިރާތަކެއްގެ ރައްޔިތުންނާ އަލުން ބައްދަލުކުރެއްވުމަށް ނިންމަވައި ވަކި ޕްރޮގްރާމެއް އެކަމަށް ހިންގަވާނެކަން މުއިއްޒު ހާމަކުރެއްވީ މިދިޔަ މަހުގެ 25، ގަ އެވެ.
އެ ނިންމުމާ އެއްގޮތަށް ރައްޔިތުންގެ ބައްދަލުވުންތައް ބާއްވަން ނިންމާފައި ވަނީ ރައީސް އޮފީހުގަ އެވެ. އެކަމަށްޓަކައި ރައީސްއޮފީހުން އާންމުކޮށްފައިވާ އުސޫލުގައިވާ ގޮތުން، މަޖިލީހުގައި މެންބަރުން ތަމްސީލުކުރާ 93 ދާއިރާއާ މުއިއްޒު ބައްދަލުކުރައްވާނެ އެވެ.
އެ އުސޫލުގެ ދަށުން ބައްދަލުވުން ބާއްވާނެ ތަނާއި ވަގުތާއި ތަރުތީބާއި ބައްދަލުވުން ބާއްވާނެ އަދަދު ކަނޑައަޅާނީ ރައީސް އޮފީހުންނެވެ.
